ອີງຕາມການລາຍງານຂ່າວຈາກ nbc news ໃຫ້ຮູ້ວ່າ ທ່ານ ແຈັດ ດໍຣຊີ່ (Jack Dorsey) ຫົວໜ້າບໍລິຫານ ທະວິດເຕີ້ ກ່າວກັບພະນັກງານຂອງເຂົາເມື່ອວັນອັງຄານທີ່ຜ່ານມາວ່າ ພະນັກງານຈະໄດ້ຮັບອະນຸຍາດໃຫ້ເຮັດວຽກຢູ່ເຮືອນຂອງຕົນເອງໄດ້ ເຖິງແມ່ນວ່າຈະສິ້ນສຸດວິກິດການໂຄວິດ-19 ແລ້ວກໍ່ຕາມ ແລະ ຄາດວ່າທະວິດເຕີ້ຈະເປີດຫ້ອງການໄວທີ່ສຸດໃນເດືອນກັນຍາ ສ່ວນກິດຈະກຳກ່ຽວກັບການປະຊຸມ ຫຼື ການພົບປະກັນແມ່ນຈະເລື່ອນອອກໄປຈົນເຖິງປີໜ້າ. ທັງນີ້, ທາງທະວິດເຕີ້ຈະມີແຜນການປະເມີນສະຖານະການຂອງປີ 2021 ກັນອີກຄັ້ງໃນໄລຍະ 6 ເດືອນທ້າຍປີນີ້.
ໂຄສົກຂອງທະວິດເຕີ້ໄດ້ກ່າວວ່າ ບໍລິສັດໃຫ້ຄວາມສຳຄັນກັບການກະຈາຍອຳນາດ, ການເຮັດວຽກ ໂດຍບໍ່ຢຶດຕິດກັບສູນກາງ ແລະ ສະໜັບສະໜູນໃຫ້ຄົນເຮັດວຽກຢູ່ສະຖານທີ່ໃດກໍ່ໄດ້ ໃນໄລຍະ 2-3 ເດືອນທີ່ຜ່ານມາ. ມັນໄດ້ຊີ້ໃຫ້ເຫັນວ່າ ການເຮັດວຽກຢູ່ເຮືອນນັ້ນແມ່ນເຮັດໄດ້ ເຊິ່ງໝາຍຄວາມວ່າ ຖ້າພະນັກງານສາມາດເຮັດວຽກຢູ່ເຮືອນຂອງພວກເຂົາໄດ້ກໍ່ໃຫ້ເຮັດຕໍ່ໄປເລີຍ ແລະ ຖ້າຄົນໃດເຮັດວຽກຢູ່ເຮືອນບໍ່ໄດ້ກໍ່ໃຫ້ກັບເຂົ້າມາເຮັດວຽກຢູ່ສຳນັກງານໄດ້ສະເໝີ ສຳນັກງານຈະເປີດຮັບທຸກຄົນຢ່າງອົບອຸ່ນ ເຖິງແມ່ນວ່າອາດຕ້ອງໃຊ້ມາດຕະການຄວາມປອດໄພແນ່ກໍ່ຕາມ.
ກ່ອນໜ້ານີ້, ບໍລິສັດເທັກໂນໂລຢີຊັ້ນນຳຢ່າງ ກູໂກ້ (Google) , ເຟສບຸກ (Facebook) ແລະ ໄມໂຄຣຊອຟ (Microsoft) ກໍ່ໄດ້ໃຫ້ຄວາມສຳຄັນກັບການເຮັດວຽກຢູ່ເຮືອນ ແລະ ຍັງບໍ່ມີກຳນົດໃຫ້ກັບມາເຮັດວຽກທີ່ສຳນັກງານຈົນໝົດປີນີ້.
ຮຽບຮຽງຂ່າວ: ພຸດສະດີ