ໜັງສືພິມສະຫວັນພັດທະນາລາຍງານໃຫ້ຮູ້ວ່າ ໃນຕອນເຊົ້າຂອງວັນທີ 6 ພຶດສະພາທີ່ຜ່ານມາ ເຈົ້າໜ້າທີ່ກວດກາການຄ້າ ຫ້ອງການອຸດສາຫະກໍາ ແລະ ການຄ້າ ນະຄອນໄກສອນ ພົມວິຫານ ແຂວງ ສະຫວັນນະເຂດ ໄດ້ສົມທົບກັບກໍາລັງທະຫານຊາຍແດນ ໄດ້ອອກຕະເວນກວດກາລຽບຕາມຊາຍແດນແມ່ນໍ້າຂອງໃນບໍ່ດົນມານີ້ ພົບການລັກລອບນໍາເຂົ້າຊີ້ນໝູ ຈາກປະເທດເພື່ອນບ້ານ.
ອີງຕາມການລາຍງານຈາກເຈົ້າໜ້າທີ່ໃຫ້ຮູ້ວ່າ ໄດ້ພົບເຫັນເຮືອຫາງຍາວ ຈໍານວນ 1 ລໍາ ທີ່ຈອດຢູ່ ແຄມແມ່ນໍ້າຂອງເບື້ອງຝັ່ງລາວ ໂດຍບໍ່ມີຄົນຂັບ ແລະ ຜູ້ໂດຍສານ, ຫຼັງເຂົ້າກວດຄົ້ນພົບສິນຄ້າປະເພດຊີ້ນໝູທີ່ໄດ້ແຍກສ່ວນ ຫຼື ຄົວແລ້ວ ບັນຈຸໄວ້ຢູ່ໃນກະສອບ, ລວມມີນໍ້າໜັກ 2.536 ກິໂລກຣາມ, ຊຶ່ງຄາດວ່າໄດ້ລັກລອບນໍາເຂົ້າມາຈາກປະເທດເພື່ອນບ້ານ, ມີມູນຄ່າ ເກືອບ 35.757.600 ກີບ, ນອກນັ້ນຍັງພົບລົດໂຕໂຢຕ້າ ວີໂກ ສີດໍາ ຈໍານວນ 1 ຄັນ ເລກທະບຽນ ກໍາແພງນະຄອນ ກຂ 5445, ຈອດຢູ່ແຄມຝັ່ງແມ່ນໍ້າຂອງ, ສ່ວນຜູ້ກະທໍາຜິດສາມາດຫຼົບໜີໄປໄດ້ ທາງເຈົ້າໜ້າທີ່ ແລະ ພາກສ່ວນທີ່ກ່ຽວຂ້ອງກໍາລັງເລັ່ງຕິດຕິດຕາມຕົວເພື່ອມາດໍາເນີນຄະດີຕາມກົດໝາຍ.
ດັ່ງນັ້ນ, ເຈົ້ານະຄອນໄກສອນ ພົມວິຫານ ຈຶ່ງເຫັນດີຕົກ ລົງອະນຸມັດໃຫ້ທໍາລາຍຊີ້ນໝູດັ່ງກ່າວຖິ້ມ ເພື່ອເປັນການຊຸກຍູ້ການຜະລິດພາຍໃນ ແລະ ທັງປ້ອງກັນບໍ່ໃຫ້ມີການແຜ່ລະບາດຂອງເຊື້ອພະຍາດທີ່ອາດຈະຕິດມາກັບຊີ້ນໝູ ໂດຍການຂຸດຂຸມເລິກ 4-5 ແມັດ, ໂຮຍປູນຂາວແລ້ວນໍາຊີ້ນໝູລົງຂຸມ ພ້ອມທັງສີດຢາຂ້າເຊື້ອ ແລ້ວຈຶ່ງຝັງດິນ.
ຮຽບຮຽງຂ່າວ: ພຸດສະດີ