ອີງຕາມການລາຍງານຈາກ ເພຈຂ່າວຈາກປະເທດໄທ ໃຫ້ຮູ້ວ່າ ຕອນເຊົ້າວັນທີ 7 ພຶດສະພາ 2020 ເວລາ 9:00 ບໍລິເວນຂ້າງເສັ້ນທາງ ແລະ ລານອາຄານການຄ້າ ຂົວມິດຕະພາບລາວ-ໄທ ຈັງຫວັດໜອງຄາຍ ເຈົ້າໜ້າທີ່ສາທາລະນາສຸກ ຈັງຫວັດໜອງຄາຍ ໄດ້ຮ່ວມກັນກວດຄັດກອງ ແລະ ເຮັດບັນທຶກປະຫວັດແຮງງານລາວ ຈຳນວນ 250 ຄົນ ທີ່ລໍຖ້າຂ້າມແດນກັບປະເທດ.
ພໍມາຮອດວັນທີ 09 ພຶດສະພາ 2020, ເຈົ້າໜ້າທີ່ ປກສ ນະຄອນຫຼວງວຽງຈັນ ປະຈຳດ່ານສາກົນ ຂົວມິດຕະພາບລາວ-ໄທ 1 ແມ່ນຈຶ່ງໄດ້ສືບຕໍ່ຮັບເອົາບັນດາແຮງງານລາວ ທີ່ເດີນທາງກັບຄືນເຂົ້າມາປະເທດ ລວມມີ 349 ຄົນ, ຍິງ 177 ຄົນ; ໃນນີ້ ເຈົ້າ ໜ້າທີ່ໄດ້ນໍາສົ່ງເຂົ້າສູນກັ່ນຕອງ ທີ່ສະໜາມຍິງປືນກອງທັບ ຫຼັກ 27 ເພື່ອໄຈ້ແຍກກໍລະນີສົງໄສຕິດເຊື້ອໂຄວິດ-19.
ໃນກໍລະນີສົງໄສແມ່ນຈະໄດ້ນຳສົ່ງໄປໂຮງໝໍທັນທີ, ແຕ່ຖ້າບໍ່ມີອາການຫຍັງ ສຳລັບຄົນຕ່າງແຂວງແມ່ນຈະໄດ້ມອບໃຫ້ຄະນະສະເພາະກິດ ຂອງແຕ່ລະແຂວງນຳຕົວໄປສູນກັກກັນຂອງແຂວງ ເພື່ອສືບຕໍ່ຕິດຕາມອາການ ເປັນໄລຍະເວລາ 14 ວັນ, ຖ້າບໍ່ມີອາການຫຍັງ ຈຶ່ງຈະໃຫ້ກັບເມືອບ້ານ ແລ້ວໄປຕິດຕາມອາການຂອງຕົນຕື່ມອີກ 14 ວັນ ເພື່ອເຮັດໃຫ້ທຸກຄົນທີ່ເຂົ້າມາໃນປະເທດລາວເຮົາ ມີຄວາມປອດໄພ ບໍ່ຕິດເຊື້ອພະຍາດອັກເສບປອດສາຍພັນໃໝ່ (ໂຄວິດ-19) ເພີ່ມ ແລະ ເພື່ອເປັນການກັນບໍ່ໃຫ້ພະຍາດມີການແຜ່ຂະຫຍາຍອອກໄປວົງກວ້າງ.
ຮຽບຮຽງຂ່າວ: ພຸດສະດີ
ແຫຼ່ງຂໍ້ມູນ: ໜັງສືພິມເສດຖະກິດ-ການຄ້າ