ເຈົ້າໜ້າທີ່ຕຳຫຼວດສະກັດກັ້ນແລະປາບປາມຢາເສບຕິດ ທ່ານໜຶ່ງທີ່ບໍ່ປະສົງອອກນາມໄດ້ບອກທີມຂ່າວ ລາວໂພສຕ໌ໃຫ້ຮູ້ວ່າ ກ່ອນການການຈັບກຸມແລະທັບມ້າງ ຄອບຄົວຢາບ້າລາຍໃຫຍ່ທີ່ເປັນຂ່າວດັງ ໃນວັນທີ 5 ຕຸລາ ທີ່ຜ່ານມາໄດ້ນັ້ນ ແມ່ນຍ້ອນການຮ່ວມໄມ້ຮ່ວມມືຈາກສັງຄົມ ເຊິ່ງມີພົນລະເມືອງດີທ່ານໜຶ່ງໄດ້ແຈ້ງຕໍ່ ເຈົ້າໜ້າທີ່ພວກເຮົາ ຈາກນັ້ນເຈົ້າໜ້າທີ່ຈຶ່ງໄດ້ຂຶ້ນແຜນຕິດຕາມ ແລະໃນທີ່ສຸດຈຶ່ງໄດ້ມີການປິດລ້ອມຈັບກຸມ ແລະມ້າງຂະບວນການລາຍໃຫຍ່ຄັ້ງນີ້ໄດ້ ຈົນສຳເລັດ.
ເຈົ້າໜ້າທີ່ທ່ານດັ່ງກ່າວໄດ້ສະແດງຄວາມຂອບໃຈເປັນຢ່າງສູງ ຕໍ່ພົນລະເມືອງດີທ່ານດັ່ງກ່າວກໍຄືທ່ານອື່ນໆ ທີ່ເຄີຍໄດ້ຊ່ວຍເປັນຫູເປັນຕາ ແລະຂໍຮຽກຮ້ອງໃຫ້ພໍ່ແມ່ປະຊາຊົນທຸກທ່ານ ຖ້າຫາກພົບເຫັນການ ເສບ ການຊື້-ຂາຍ ແລະມີຢາເສບຕິດໄວ້ໃນຄອບຄອງ ຈົ່ງໄດ້ແຈ້ງຕໍ່ເຈົ້າໜ້າທີ່ຂັ້ນເທິງເພື່ອຕິດຕາມກວດກາ ແລະທັບມ້າງຂະບວນການນີ້ໃຫ້ໝົດໄປຈາກ ແຜ່ນດິນລາວເທື່ອລະໜ້ອຍ ເພາະບັນຫາຢາເສບຕິດໄດ້ສ້າງຄວາມເສຍຫາຍ ອັນໃຫຍ່ຫຼວງຕໍ່ການພັດທະນາເສດຖະກິດ ສັງຄົມຂອງລາວ ໂດຍສະເພາະແມ່ນຊັບພະຍາກອນມະນຸດ ມັນໄດ້ສ້າງໃຫ້ຊາວໜຸ່ມ-ເຍົາວະຊົນລາວ ເປັນຄົນເສຍທາດຂາດຄຸນ ສັງຄົມວຸ່ນວາຍ ແລະກະທົບເຖິງອະນາຄົດຂອງຊາດເຮົາພ້ອມ.