ສຳນັກຂ່າວວຽງຈັນທາມລາຍງານວ່າ ສະຖານີຂົນສົ່ງໂດຍສານສາຍໃຕ້ ຫຼື ຄິວລົດສາຍໃຕ້ ປະກາດປິດການບໍລິການຮອບ 2 ແບບບໍ່ມີກໍານົດໃນບໍ່ດົນມານີ້ ຫຼັງຈາກມີການແຈ້ງການ ຂອງຫ້ອງວ່າການສໍານັກງານນາຍົກລັດຖະມົນຕີ ໃນວັນທີ 1 ພຶດສະພາ 2020 ເລື່ອງສືບຕໍ່ປະຕິບັດມາດຕະການໃນການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການລະບາດຂອງ ໂຄວິດ-19 ໃນລະຫວ່າງວັນທີ 4-17 ພຶດສະພາ 2020.

ກ່ອນໜ້ານີ້ສະຖານີຂົນສົ່ງໂດຍສານສາຍໃຕ້ ໄດ້ປະກາດປິດການບໍລິການໄປຄັ້ງໜຶ່ງແລ້ວ ໃນໄລຍະທີ່ມີຄໍາສັ່ງຂອງທ່ານນາຍົກລັດຖະມົນຕີ ສະບັບເລກທີ 06/ນຍ ອອກມາ ເພື່ອເປັນການສະກັດກັ້ນ, ຄວບຄຸມການລະບາດຂອງພະຍາດໂຄວິດ-19.

ແຈ້ງການໄດ້ລະບຸບາງເນື້ອໃນສໍາຄັນວ່າ: ຫ້າມບຸກຄົນເດີນທາງລະຫວ່າງແຂວງຕໍ່ແຂວງ, ຍົກເວັ້ນກໍລະນີຈໍາເປັນ ເປັນຕົ້ນແມ່ນ ການໄປເຮັດວຽກທາງການ, ນັກຮຽນ, ນັກທຸລະກິດ, ການເຈັບເປັນ, ການເສຍຊີວິດ, ການຂົນສົ່ງສິນຄ້າ, ການນໍາສົ່ງຄົນເຈັບ ແມ່ນສາມາດເດີນທາງໄດ້ ແຕ່ຕ້ອງມີເອກະສານຢັ້ງຢືນ.

ຮຽບຮຽງຂ່າວ: ພຸດສະດີ