ການລະບາດຂອງພະຍາດໂຄວິດ-19 ໃນສປປ ລາວ ໄດ້ສ້າງຜົນກະທົບຫຼາຍສົມຄວນ ໂດຍສະເພາະແມ່ນການສູນເສຍລາຍຮັບ ແຕ່ກັບມີລາຍຈ່າຍທີ່ຄົງທີ່ ແລະ ເພີ່ມຂຶ້ນເລື້ອຍໆ ເຮັດໃຫ້ການດໍາລົງຊີວິດຂອງປະຊາຊົນຝືດເຄືອງ.
ຫ້ອງການຄຸ້ມຄອງ ແລະ ບໍລິການຕົວເມືອງນະຄອນຫຼວງວຽງຈັນ ອອກແຈ້ງການເມື່ອວັນທີ 24 ເມສາ ນີ້ ກ່ຽວກັບນະໂຍບາຍຫຼຸດຄ່າບໍລິການຂົນສົ່ງ ແລະ ຄ່າບຳບັດຂີ້ເຫຍື້ອຢູ່ສະໜາມຫຼັກ 32 ລົງ 50 ເປີເຊັນ ຂອງມູນຄ່າສັນຍາ ສຳລັບ 3 ເດືອນ ເຊິ່ງຈະເລີ່ມແຕ່ວັນທີ 1 ເມສາ ຫາ ວັນທີ 30 ມິຖຸນາ 2020.
ນະໂຍບາຍດັ່ງກ່າວແມ່ນສະເໜີ ໃນໂອກາດກອງປະຊຸມຂອງຄະນະສະເພາະກິດ ກ່ຽວກັບການແກ້ໄຂຜົນກະທົບ ແລະ ຜັນຂະຫຍາຍນະໂຍບາຍ, ມາດຕະການເພື່ອຫຼຸດຜ່ອນຜົນກະທົບຈາກພະຍາດໂຄວິດ-19 ໃນວັນທີ 20 ເມສາ 2020 ທີ່ ກະຊວງ ແຜນການ ແລະ ການລົງທຶນ ກ່ອນທີ່ຈະນໍາສະເໜີຢູ່ທີ່ກອງປະຊຸມປະຈໍາເດືອນຂອງລັດຖະບານສະໄໝສາມັນປະຈຳເດືອນເມສາ 2020 ໄດ້ເປີດຂຶ້ນໃນຕອນເຊົ້າ ແລະ ປິດລົງໃນຕອນແລງ ຂອງວັນທີ 23 ເມສາ 2020ທີ່ຜ່ານມາ.
ຮຽບຮຽງຂ່າວ: ພຸດສະດີ
ແຫຼ່ງຂໍ້ມູນ: ຫ້ອງການຄຸ້ມຄອງ ແລະ ບໍລິການຕົວເມືອງນະຄອນຫຼວງວຽງຈັນ