ເຈົ້າໜ້າທີ່ໃນເມືອງຮາບິນ ມົນທົນ ເຮີຍຫຼົງຈຽງ ຂອງຈີນ ເພີ່ມຄວາມເຂັ້ມງວດມາດຕະການເດີນທາງຂອງປະຊາຊົນ ແລະ ການຫ້າມລວມກຸ່ມ ເພື່ອຄວບຄຸມການແຜ່ລະບາດຂອງໄວຣັດໂຄວິດ-19 ຮອບທີ 2 ຫຼັງຈາກພົບຜູ້ປ່ວຍຄົນໜຶ່ງສາມາດແຜ່ເຊື້ອໃຫ້ກັບຄົນອື່ນອີກ 78 ຄົນ ເຊິ່ງໃນ 23 ຄົນ ເປັນຜູ້ປ່ວຍທີ່ບໍ່ສະແດງອາການ.
ການແຜ່ລະບາດໃນຄັ້ງນີ້ເລີ່ມຂຶ້ນຈາກຊາຍສູງໄວຄົນໜຶ່ງ ເຊິ່ງມີຊື່ວ່າ ທ້າວ ເສິນ ອາຍຸ 87 ປີ ທີ່ເຂົ້າຮັກສາຕົວໃນໂຮງໝໍ 2 ແຫ່ງ ຕັ້ງແຕ່ວັນທີ 2 ເມສາທີ່ຜ່ານມາ ຫຼັງຈາກໄປຮ່ວມກິນອາຫານຄໍ່າກັບເພື່ອນບ້ານຂອງລູກຊາຍ ເຊິ່ງພາຍຫຼັງກໍ່ພົບວ່າ ຜູ້ທີ່ຮ່ວມກິນອາຫານຄໍ່າ 2 ຄົນໄດ້ຕິດເຊື້ອເຊັ່ນດຽວກັນ ແລະ ເມື່ອວັນ 21 ເມສາ ທີ່ຜ່ານມາກໍ່ພົບວ່າມີຜູ້ຕິດເຊື້ອທີ່ເລີ່ມຕົ້ນຈາກຜູ້ປ່ວຍ 87 ປີຄົນນີ້ເຖິງ 78 ຄົນ.
ເມືອງຮາບິນເປີດເຜີຍວ່າ ປັດຈຸບັນກຳລັງເຝົ້າລະວັງອາການຂອງຄົນທີ່ສົງໃສວ່າຕິດເຊື້ອປະມານ 1,400 ຄົນ ເຊິ່ງທັງໝົດມີປະຫວັດສຳພັດກັບຜູ້ຕິດເຊື້ອ.
ນອກຈາກນີ້, ເມືອງຮາບິນ ໄດ້ສັ່ງຫ້າມບໍ່ໃຫ້ຄົນ ແລະ ພາຫະນະເຂົ້າໄປໃນເຂດພື້ນທີ່ອຸດສາຫະກຳ ຫຼື ເຂດຊຸມຊົນ ພ້ອມຍັງສັ່ງຫ້າມບໍ່ໃຫ້ມີການຈັດງານດອງ ແລະ ງານປາສະນາກິດສົບ ລວມເຖິງຫ້າມຈັດກິດຈະກຳທີ່ມີຄົນເຂົ້າຮ່ວມຈຳນວນຫຼາຍເຊັ່ນ: ງານກິລາ, ການຊຸມນຸມ, ການສະແດງ ແລະ ຈັດນິເທດສະການຕ່າງໆ.
ຮຽບຮຽງຂ່າວ: ພຸດສະດີ