ນັບຕັ້ງແຕ່ມີການລະບາດຂອງພະຍາດໂຄວິດ-19, ສປປ ລາວ ກໍໄດ້ຮັບຜົນກະທົບຫຼາຍສົມຄວນ ໂດຍສະເພາະແມ່ນການສູນເສຍລາຍຮັບ ແຕ່ກັບມີລາຍຈ່າຍທີ່ຄົງທີ່ ແລະ ເພີ່ມຂຶ້ນເລື້ອຍໆ ເຊິ່ງເຮັດໃຫ້ການດໍາລົງຊີວິດຂອງປະຊາຊົນຝືດເຄືອງ. ຕໍ່ສະພາບດັ່ງກ່າວກໍມີສຽງຮຽກຮ້ອງຈາກປະຊາຊົນໃຫ້ລັດຖະບານຊ່ວຍແກ້ໄຂເລື່ອງຄ່ານໍ້າ, ຄ່າໄຟຟ້າ.
ຕາມການລາຍງານຈາກໜັງສືພິມວຽງຈັນທາມໃຫ້ຮູ້ວ່າ ລັດຖະບານ ໄດ້ແນະນໍາພາກສ່ວນກ່ຽວຂ້ອງໃຫ້ໄປຄົ້ນຄວ້ານະໂຍບາຍດ້ານອື່ນໆແທນ ສໍາລັບການສະເໜີຂໍຫຼຸດອັດຕາອາກອນມູນຄ່າເພີ່ມໄຟຟ້າ ແລະ ນໍ້າປະປານັ້ນ ເນື່ອງຈາກຈະມີຜົນກະທົບຕໍ່ການເກັບລາຍຮັບຫຼາຍສົມຄວນ ຈຶ່ງເຫັນວ່າບໍ່ທັນຕົກລົງໄດ້ເທື່ອ.
ການແນະນໍາດັ່ງກ່າວ ແມ່ນໃນໂອກາດກອງປະຊຸມລັດຖະບານ ສະໄໝສາມັນປະຈຳເດືອນເມສາ 2020 ໄດ້ເປີດຂຶ້ນໃນຕອນເຊົ້າ ແລະ ປິດລົງໃນຕອນແລງ ຂອງວັນທີ 23 ເມສາ 2020 ໂດຍເປັນກອງປະຊຸມທາງໄກ (Video Conference), ພາຍໃຕ້ການເປັນປະທານຂອງ ທ່ານ ທອງລຸນ ສີສຸລິດ, ນາຍົກລັດຖະມົນຕີ; ມີບັນດາທ່ານຮອງນາຍົກລັດຖະມົນຕີ, ສະມາຊິກລັດຖະບານ ພ້ອມດ້ວຍຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການແຜ່ລະບາດ ຂອງພະຍາດໂຄວິດ-19 ເຂົ້າຮ່ວມ.
ພ້ອມນີ້ ກອງປະຊຸມຍັງເຫັນດີໃຫ້ການປະຕິບັດນະໂຍບາຍຕໍ່ຊາວຜູ້ອອກແຮງງານທີ່ໄດ້ເຂົ້າໃນລະບົບປະກັນສັງຄົມໃຫ້ປະຕິບັດຕາມລະບຽບກົດໝາຍ, ສໍາລັບແຮງງານທີ່ຢູ່ນອກລະບົບມອບໃຫ້ກະຊວງແຮງງານ ແລະ ສະຫວັດດີການສັງຄົມ ນຳໄປຄົ້ນຄວ້າລະອຽດ ແລ້ວມາລາຍງານຕໍ່ກອງປະຊຸມນາຍົກ-ຮອງນາຍົກລັດຖະມົນຕີ.
ຮຽບຮຽງຂ່າວ: ພຸດສະດີ