ມາດຕະການປິດເມືອງເພື່ອປ້ອງກັນການແຜ່ລະບາດຂອງເຊື້ອໄວຣັດໂຄວິດ-19 ທີ່ທາງລັດຖະບານໄດ້ວາງອອກ ເຮັດໃຫ້ປະຊາຊົນສ່ວນໃຫຍ່ຕ້ອງຢູ່ເຮືອນ ບໍ່ສາມາດອອກໄປທາງນອກໄດ້ຕາມໃຈຄືເມື່ອກ່ອນໄດ້ ການສັ່ງອາຫານມາກິນຢູ່ເຮືອນຈຶ່ງໄດ້ຮັບຄວາມນິຍົມຫຼາຍໃນໄລຍະນີ້ ຄຽງຄູ່ກັບການຈະເລີນເຕີບໂຕຂອງທຸລະກິດດ້ານອາຫານ ສັງເກດໄດ້ວ່າ ປັດຈຸບັນ ຈະມີຢູ່ 3 ກຸ່ມທີ່ເຮັດອາຫານສົ່ງຄື: ກຸ່ມຮ້ານອາຫານ-ໂຮງແຮມໃຫຍ່, ກຸ່ມຮ້ານນ້ອຍທົ່ວໄປ ແລະ ກຸ່ມທີ່ເກີດຂຶ້ນໃໝ່ແມ່ນ ກຸ່ມຄອບຄົວທີ່ເຮັດອາຫານສົ່ງ ກຸ່ມທີສາມນີ້ເປັນກຸ່ມທີ່ໃຊ້ເວລາວ່າງໃນໄລຍະນີ້ຫາກິດຈະກຳເຮັດເພື່ອສ້າງລາຍຮັບ.
ເມື່ອມີຄວາມຫຼາກຫຼາຍຈາກແຫຼ່ງທີ່ມາຂອງອາຫານ ແນ່ນອນວ່າຕ້ອງເກີດຄວາມສົງໃສຂອງຜູ້ບໍລິໂພກກ່ຽວກັບຄວາມສະອາດຂອງອາຫານ ແລະ ມາດຕະການປ້ອງກັນຕົນເອງຂອງຜູ້ເຮັດໜ້າທີ່ປຸງແຕ່ງອາຫານວ່າມີປະສິດທິພາບຫຼາຍໜ້ອຍພຽງໃດ ເພື່ອຮັບປະກັນບໍ່ໃຫ້ເກີດການລະບາດຂອງເຊື້ອໄວຣັດໂຄວິດ-19 ທີ່ອາດປົນເປື້ອນມາກັບອາຫານ.
ດັ່ງນັ້ນ, ຜູ້ປະກອບການຕ້ອງໄດ້ຖືເອົາຫຼັກສຸຂະອານາໄມເປັນທີ່ຕັ້ງ ເພື່ອສ້າງຄວາມໝັ້ນໃຈ ແລະ ຄວາມປອດໄພໃຫ້ກັບລູກຄ້າ ຜູ້ທີ່ເຮັດໜ້າທີ່ປຸງແຕ່ງອາຫານຕ້ອງຮັກສາຄວາມສະອາດຕົນເອງໃຫ້ຖືກຕາມຫຼັກການອານາໄມຄື: ມັດຜົມ ໃສ່ໝວກກັນຜົມຕົກໃສ່ຂອງກິນ, ສວມໃສ່ຜ້າກັນເປື້ອນ, ໃສ່ຖົງມື, ໃສ່ຜ້າປິດປາກ-ດັງຄັກແນ່, ສຳລັບສະຖານທີ່ເຮັດອາຫານ ຫຼື ຫ້ອງຄົວ ຕ້ອງສະອາດ ແລະ ປອດເຊື້ອໂຣກ, ໂຕະວາງສິ່ງຂອງ ຫຼື ພາຊະນະທີ່ນຳມາໃຊ້ປຸງແຕ່ງອາຫານກໍ່ຕ້ອງໄດ້ຜ່ານການລ້າງ ການເຊັດຂ້າເຊື້ອຢ່າງດີ, ລວມເຖິງວັດຖຸດິບທີ່ນຳມາໃຊ້ປຸງແຕ່ງອາຫານທຸກຄັ້ງກໍ່ຕ້ອງສົດໃໝ່ ແລະ ຜ່ານການລ້າງຢ່າງສະອາດ.
ຫາກຜູ້ທີ່ປຸງແຕ່ງອາຫານມີອາການບໍ່ສະບາຍ ມີຄວາມຜິດປົກກະຕິໃນລະບົບທາງເດີນຫາຍໃຈ ຄື: ເປັນຫວັດ, ໄອ ຫຼື ເປັນໄຂ້ ແມ່ນໃຫ້ຢຸດເຊົາ ແລະ ຟ້າວໄປພົບແພດເພື່ອເຮັດການກວດຮັກສາ ເພາະຈະໄດ້ປ້ອງກັນການແຜ່ກະຈາຍຂອງເຊື້ອໄຣກໄດ້ທັນເວລາ.
ບົດໂດຍ: ພຸດສະດີ
ແຫຼ່ງຂໍ້ມູນ: amarinacademy.com, thaihealth.or.th