ສຳນັກຂ່າວ BBC ລາຍງານວ່າມື້ນີ້ (8 ເມສາ) ເມືອງ ອູຮັ່ນ ແຂວງ ຫູເປີ່ຍ ເມືອງທີ່ເປັນຈຸດເລີ່ມຕົ້ນຂອງການແຜ່ລະບາດຂອງພະຍາດໄວຣັດໂຄວິດ-19 ໄດ້ຍົກເລີກມາດຕະການປິດເມືອງແລ້ວ, ສຳຫຼັບປະຊາຊົນໃນທ້ອງຖິ່ນທີ່ໄດ້ລະຫັດສີຂຽວໃນແອັບສຸຂະພາບໃນໂທລະສັບມືຖື ແມ່ນໄດ້ຮັບອານຸຍາດໃຫ້ອອກຈາກທີ່ພັກຂອງຕົນ. ພ້ອມກັນນີ້, ລົດໄຟ ແລະ ຖະໜົນ ກໍ່ໄດ້ກັບມາເປິດໃຫ້ໃຊ້ບໍລິການ. ເພື່ອເປັນການຄວບຄຸມການລະບາດໃນເມືອງ ອູຮັ່ນ ທາງການກໍ່ໄດ້ອອກຂໍ້ບັງຄັບໃນການເດີນທາງ ພ້ອມທັ້ງສັ່ງປິດທຸລະກິດຫຼາຍແຫ່ງ ໃນຕົວເມືອງ ເຊິ່ງມີຜູ້ທີ່ອາໄສຢູ່ໃນເຂດນັ້ນ 11 ລ້ານຄົນ.
ໃນເດືອນກ່ອນ, ເມື່ອເມືອງອູຮັ່ນລາຍງານວ່າບໍ່ມີກໍລະນີຕິດເຊື້ອເພີ່ມຂຶ້ນ ເປັນເວລາ 1 ອາທິດເຕັມໆ ຫ້າງສັບພະສິນຄ້າກໍ່ໄດ້ກັບມາເປີດໃຫ້ບໍລິການ, ປະຊາຊົນທີ່ບໍ່ໄດ້ອາໄສຢູ່ໃນເຂດສ່ຽງກໍ່ສາມາດອອກຈາກບ້ານໄດ້ 2 ຊົ່ວໂມງ. ຕັ້ງແຕ່ມື້ນີ້ເປັນຕົ້ນໄປ ປະຊາຊົນທີ່ໄດ້ຮັບອານຸຍາດ ສາມາດນຳໃຊ້ລົດຂົນສົ່ງສະທາລະນະ ຖ້າເຂົາເຈົ້າມີ QR Code ເພື່ອສະແກນເບິ່ງສະຖານະຂໍ້ມູນສຸຂະພາບ.
ປະຊາຊົນທີ່ເຮັດວຽກໃນສາຍການອຸປະກອນການແພດ ແລະ ເຄື່ອງໃຊ້ປະຈຳວັນແມ່ນໄດ້ຮັບອະນຸຍາດໃຫ້ກັບໄປເຮັດວຽກ, ອຸດສະຫະກຳອື່ນໆມີຜົນກະທົບຕໍ່ການສະໜອງທັ້ງໃນ ແລະ ນອກປະເທດແມ່ນສາມາດກັບມາເປີດໃຫ້ທຳການໄດ້.
ມາດຕະການປິດເມືອງທີ່ເຄັ່ງຄັດ ຍັງມີຜົນຢູ່ບາງພື້ນທີ່ໃນຈີນ, ເມືອງ ປັກກິ່ງກໍໄດ້ຍົກລະດັບມາດຕະການໃຫ້ເຄັ່ງຄັດຂຶ້ນ ຫຼັງມີກໍລະນີຕິດເຊື້ອເພີ່ມຂຶ້ນ 31 ກໍລະນີ ໃນວັນທີ 6 ເມສາທີ່ຜ່ານມາ, ຜູ້ໃດທີ່ຈະເດີນທາງເຂົ້າເມືອງແມ່ນຕ້ອງຜ່ານການກັກຕົວ (Quarantine) ແລະ ກວດສຸຂະພາບມາແລ້ວ.
ຮຽບຮຽງໂດຍ: ວະນິດາ