ອີງໃສ່ສະພາບການແຜ່ລະບາດຂອງເຊື້ອພະຍາດໂຄວິດ-19 ໃນ ສປປ ລາວ ແລະ ເກືອບທຸກປະເທດໃນໂລກ ຍັງສືບຕໍ່ເພີ່ມຂຶ້ນຢ່າງຕໍ່ເນື່ອງ, ເພື່ອເປັນການຄວບຄຸມ-ປ້ອງກັນ,ສະກັດກັ້ນ ແລະ ຮັບມືກັບການລະບາດຂອງພະຍາດໂຄວິດ-19 ບໍ່ໃຫ້ມີການແຜ່ລາມອອກໄປ ເປັນວົງກວ້າງ, ກະຊວງໂຍທາທິການ ແລະ ຂົນສົ່ງ (ຍທຂ) ອອກແຈ້ງການເມື່ອວັນທີ 30 ມີນາ 2020 ເຖິງບັນດາຜູ້ປະກອບການຫົວໜ່ວຍທຸລະກິດ ບໍລິສັດ, ສະມາຄົມຂົນສົ່ງໂດຍສານ, ສະຖານີລົດຂົນສົ່ງໂດຍສານລັດວິສາຫະກິດລົດເມນະຄອນຫຼວງວຽງຈັນ (ຕະຫຼາດຂົວດິນ), ສະຖານີຂົນສົ່ງໂດຍສານສາຍໃຕ້ ແລະ ສາຍເໜືອ ນະຄອນຫຼວງວຽງຈັນ ແຈ້ງໂຈະຊົ່ວຄາວການບໍລິການຂົນສົ່ງໂດຍສານພາຍໃນ, ສາຍແຂວງຕ່າງໆ ແລະ ສາຍຕ່າງປະເທດ ນັບຕັ້ງແຕ່ວັນທີ 1 – 19 ເມສາ 2020 ເພື່ອຄວາມປອດໄພຂອງຜູ້ໂດຍສານ.
ນອກຈາກນີ້, ຫ້ອງການໂຍທາທິການ ແລະ ຂົນສົ່ງ ເມືອງ ພູຄູນ ແຈ້ງມາຍັງທຸກພາກສ່ວນ ເລື່ອງໂຈະການບໍລິການຂົນສົ່ງໂດຍສານທັງພາຍໃນ ແລະ ຕ່າງແຂວງ ທີ່ຂື້ນກັບ ເມືອງ ພູຄູນ ໃນໄລຍະລະບາດພະຍາດອັກເສບປອດໂຄວິດ-19 ສຳລັບການໂຈະຊົ່ວຄາວແມ່ນບໍ່ມີກຳນົດຈົນກ່ວາຈະມີຄຳສັງ ແລະແຈ້ງການສະບັບໃໜ່.
ຮຽບຮຽງຂ່າວ: ພຸດສະດີ
ແຫຼ່ງຂໍ້ມູນ: ກະຊວງໂຍທາທິການ ແລະ ຂົນສົ່ງ (ຍທຂ)