ສຳນັກຂ່າວຕ່າງປະເທດລາຍງານຈາກເມືອງ ຢາງກຸງ ປະເທດ ມຽນມາ ເມື່ອວັນທີ 24 ມີນາ ວ່າ ກະຊວງ ສາທາລະນະສຸກ ຂອງມຽນມາອອກມາຖະແຫຼງການເມື່ອຄໍ່າຄືນຂອງວັນທີ 23 ມີນາ ກ່ຽວກັບກໍລະນີພົບຜູ້ຕິດເຊື້ອໂຄວິດ-19 ຢ່າງນ້ອຍ 2 ຄົນ ເຊິ່ງເປັນຊາຍອາຍຸ 36 ປີ ທີ່ຫາກໍ່ເດີນທາງກັບມາຈາກອາເມລິກາ ແລະ ຊາຍອາຍຸ 26 ປີ ທີ່ມີປະຫວັດເດີນທາງໄປທີ່ປະເທດອັງກິດເມື່ອບໍ່ດົນມານີ້. ປັດຈຸບັນ, ທາງເຈົ້າໜ້າທີ່ກຳລັງເລັ່ງຕິດຕາມຜູ້ທີ່ໄດ້ສຳພັດໃກ້ຊິດກັບຊາຍທັງສອງຄົນເພື່ອເຂົ້າພົບເຈົ້າໜ້າທີ່ສາທາລະນະສຸກແລ້ວ.
ແນ່ນອນວ່າການປະກາດດັ່ງກ່າວຂອງລັດຖະບານໄດ້ສ້າງຄວາມແຕກຕື່ນຢ່າງໜັກໃຫ້ກັບປະຊາຊົນ ໂດຍສະເພາະເມືອງ ຢາງກຸງທີ່ເປັນເມືອງໃຫຍ່ ມີປະຊາຊົນຈຳນວນຫຼາຍພາກັນອອກໄປຊື້ສິນຄ້າເພື່ອກັກຕຸນ.
ລັດຖະບານມຽນມາ ຍົກລະດັບມາດຕະການປ້ອງກັນເຊື້ອໂຄວິດ-19 ໃນປະເທດເມື່ອກາງເດືອນນີ້ ລວມເຖິງການຫ້າມຈັດງານທີ່ມີຜູ້ເຂົ້າຮ່ວມຈຳນວນຫຼາຍຈົນໝົດເດືອນເມສານີ້ ເຊິ່ງກໍ່ໝາຍຄວາມວ່າງານສົງການໃນປີນີ້ຖືກຍົກເລີກໂດຍອັດຕະໂນມັດ ແລະ ຍັງຂໍໃຫ້ປະຊາຊົນເພີ່ມວິຈາລະຍານໃນການກັ່ນກອງຂ່າວສານ ແລະ ການກຳນົດແນວທາງຊ່ວຍເຫຼືອພາກທຸລະກິດທີ່ໄດ້ຮັບຜົນກະທົບຈາກການລະບາດຂອງໄວຣັສ ເນື່ອງຈາກວຽກງານການຜະລິດສ່ວນໃຫຍ່ຂອງມຽນມາແມ່ນວັດຖຸດິບຈາກຈີນ.
ນອກຈາກນີ້, ກະຊວງການຕ່າງປະເທດຂອງມຽນມາອອກຖະແຫຼງການເມື່ອວັນເສົາທີ່ຜ່ານມາ ລະງັບການອອກວີຊ່າອິເລັກໂທຣນິກ ແລະ ການກວດກາໜ້າດ່ານໃຫ້ກັບພົນລະເມືອງທຸກຊາດ ຈົນເຖິງ 30 ເມສານີ້ ຍົກເວັ້ນເຈົ້າໜ້າທີ່ທາງການທູດທີ່ມີສະຖານທູດໃນມຽນມາ ເຈົ້າໜ້າທີ່ໜ່ວຍງານໃນສັງກັດສະຫະປະຊາຊາດ ແລະ ເຈົ້າໜ້າທີ່ອົງການລະຫວ່າງປະເທດ.
ຮຽບຮຽງຂ່າວ: ພຸດສະດີ