ໃຜທີ່ໄດ້ຕິດຕາມເພຈຂອງໂຮງຮູບເງົາແຫ່ງໜຶ່ງໃນລາວ ກໍ່ອາດຈະໄດ້ເຫັນມາດຕະການການຈັດບ່ອນນັ່ງໃຫ້ຢູ່ຫ່າງກັນສອງບ່ອນນັ່ງແລະໜຶ່ງແຖວບ່ອນນັ່ງ ຫຼືການທີ່ທາງລັດຖະບານລາວໄດ້ອອກມາດຕະການຕ່າງໆເຊັ່ນ ໂຈະຫຼືເລື່ອນງານທີ່ມີຜູ້ເຂົ້າຮ່ວມຈຳນວນຫຼາຍ, ປິດໂຮງຮຽນທຸກລະດັບຊັ້ນຊົ່ວຄາວ. ວີທີການນີ້ຖືເປັນໜຶ່ງໃນວິທີການເວັ້ນໄລຍະຫ່າງໃນສັງຄົມ ຫຼື Social-Distancing ເຊິ່ງເປັນອີກວິທີປ້ອງກັນຈາກການຕິດເຊື້ອພະຍາດໄວຣັສທີ່ກຳລັງແຜ່ລະບາດໃນຕອນນີ້. ການເວັ້ນໄລຍະຫ່າງໃນສັງຄົມ (Social-Distancing) ແມ່ນວິທີການເວັ້ນໄລຍະຫ່າງ ຫຼື ແຍກອອກຈາກກັນ ເພື່ອຫຼຸດຜ່ອນການແຜ່ລະບາດຂອງພະຍາດ ໂດຍສະເພາະກັບພະຍາດສາຍພັນໃໝ່ນີ້
ວິທີການເວັ້ນໄລຍະຫ່າງກໍ່ມີຫຼາຍທາງເຊັ່ນ:

1. ແຍກປ່ຽວຫຼັງຈາກໄປບ່ອນສຸ່ມສ່ຽງຈາກພະຍາດ
2. ງົດການໄປຊຸມນຸມ ຫຼື ສັງສັນທີ່ຕ້ອງໄດ້ພົບປະກັບຄົນຈຳນວນຫຼາຍ
3. ເວັ້ນໄລຍະຫ່າງຈາກອີກຄົນບໍ່ຕໍ່າກວ່າ 2 ແມັດ ເພື່ອຫຼີກລ່ຽງຕົວເອງຈາກການສູດດົມອະອອງນໍ້າຈາກການໄອ ຫຼື ຈາມ
4. ຫຼຸດການສຳຜັດໃນໄລຍະໃກ້ເຊັ່ນ ການຈັບມື ຫຼື ກອດ
5. ກິນອາຫານຄົນລະຈານ
6. ງົດອອກນອກບ້ານຖ້າບໍ່ມີເຫດຈຳເປັນ

ການເວັ້ນໄລຍະຫ່າງໃນສະຖານະການຄັ້ງນີ້ແມ່ນເປັນສິ່ງທີ່ທຸກຄົນຄວນປະຕິບັດຕາມແລະຮັບຜິດຊອບເພື່ອຫຼຸດການແຜ່ລະບາດຂອງໄວຣັສສາຍພັນໃໝ່ ໃນເມື່ອໄວຣັສຕົວນີ້ຍັງບໍ່ມີວັກຊີນປ້ອງກັນ; ພ້ອມກັບທີ່ວ່າຄົນທີ່ຕິດໄວຣັສຕົວນີ້ບໍ່ຄ່ອຍສະແດງອາການ ແຕ່ສາມາດແຜ່ເຊື້ອໄດ້ ການເວັ້ນໄລຍະຫ່າງຖືວ່າຈຳເປັນສຳຫຼັບຕອນນີ້.

ຮຽບຮຽງຂ່າວໂດຍ: ບຸດສະດີ