ໃນວັນທີ 16 ມີນາ 2020 ທ່ານ ທອງລຸນ ສີສຸລິດ ນາຍົກລັດຖະມົນຕີ ພ້ອມດ້ວຍຄະນະ ໄດ້ລົງຕິດຕາມການເຝົ້າລະວັງ ແລະ ຄວບຄຸບການລະບາດຂອງພະຍາດ COVID-19 ຢູ່ທີ່ຂົວມິດຕະພາບແຫ່ງທີ 1, ໂຮງໝໍ 103, ໂຮງໝໍມິດຕະພາບ ແລະ ສະໜາມບິນສາກົນວັດໄຕ ເຊິ່ງການລົງເຄື່ອນໄຫວເຮັດວຽກໃນຄັ້ງນີ້ ທ່ານນາຍົກໄດ້ຮັບຟັງການລາຍງານຫຍໍ້ກ່ຽວກັບສະພາບການຈັດຕັ້ງປະຕິບັດ ມາດຕະການຕ້ານ ແລະ ຄວບຄຸມການແຜ່ລະບາດເຊື້ອພະຍາດ COVID-19 ຈາກພາກສ່ວນທີ່ກ່ຽວຂ້ອງ.
ຫຼັງຈາກນັ້ນ ທ່ານໄດ້ໃຫ້ສຳພາດຕໍ່ສື່ມວນຊົນໂດຍໄດ້ຢັ້ງຢືນວ່າ: ປັດຈຸບັນນີ້ ສປປ ລາວ ໄດ້ມີຄວາມພ້ອມໃນທຸກດ້ານເພື່ອຮອງຮັບການລະບາດຂອງພະຍາດທີ່ອາດຈະແຜ່ລະບາດ ຢູ່ ສປປ ລາວ ບໍ່ວ່າທາງດ້ານບຸກຄະລາກອນ, ອຸປະກອນການແພດທີ່ທັນສະໄໝ, ສະຖານທີ່ຮອງຮັບຄົນເຈັບ ແລະ ໂຮງໝໍຕ່າງໆ ກໍ່ມີຄວາມກຽມພ້ອມທຸກຢ່າງ. ພ້ອມນັ້ນ, ກໍ່ໄດ້ຍ້ອງຍໍຊົມເຊີຍຕໍ່ຜູ້ທີ່ປະຕິບັດໜ້າທີ່ໃນການເຝົ້າລະວັງຢູ່ທຸກຂະແໜງການທີ່ກ່ຽວຂ້ອງທີ່ເອົາໃຈໃສ່ໃນການປະຕິບັດໜ້າທີ່ວຽກງານຂອງຕົນຢ່າງມີຄວາມຮັບຜິດຊອບສູງ.
ໃນການໃຫ້ສຳພາດທ່ານນາຍົກຍັງກ່າວຢໍ້າຕື່ມອີກວ່າ ກໍລະນີຜູ້ໃດທີ່ມີອາການທີ່ເຂົ້າໃນນິຍາມຂອງພະຍາດ COVID-19 ແມ່ນໃຫ້ໄປກວດຟຣີໂດຍບໍ່ໄດ້ເສຍຄ່າ ແລະ ຖ້າຫາກຜູ້ໃດທີ່ຕິດເຊື້ອພະຍາດ COVID-19 ແມ່ນປິ່ນປົວຟຣີເຊັ່ນດຽວກັນ.
ຮຽບຮຽງຂ່າວ: ພຸດສະດີ
ແຫຼ່ງຂໍ້ມູນ: Lao Youth Radio FM 90.0 Mhz