ສປປ ລາວ ກໍ່ເປັນປະເທດໜຶ່ງທີ່ກຳລັງໄດ້ຮັບໄພຂົ່ມຂູ່ຢ່າງຫຼວງຫຼາຍຈາກພະຍາດດັ່ງກ່າວ ແລະ ລັດຖະບານກຳລັງດຳເນີນມາດຕະການຕ່າງໆ ເພື່ອປ້ອງກັນ ແລະ ຕອບໂຕ ເສດຖະກິດຂອງ ສປປ ລາວ, ມີຄວາມເປັນໄປໄດ້ທີ່ຈະປະເຊີນກັບການທົດຖອຍຈາກການຄາດຄະເນການຂະຫຍາຍຕົວ 6.4% ມາເປັນ 6% ໃນປີນີ້ ເນຶ່ອງຈາກອິດທິພົນການແຜ່ລະບາດຂອງໄວຣັສໂຄວິດ-19 (COVID-19) ຢູ່ຫຼາຍປະເທດໃນໂລກ.
ທ່ານ ປ.ອ ລີເບີ ລີບົວປາວ ຮັກສາການ ຫົວໜ້າ ສະຖາບັນຄົ້ນຄວ້າເສດຖະກິດ ແຫ່ງຊາດ ໄດ້ໃຫ້ສຳພາດຕໍ່ໜັງສືພິມວຽງຈັນທາມ ໃນວັນຈັນທີ່ຜ່ານມາວ່າ: ເຖິງແມ່ນວ່າ ປະເທດເຮົາຍັງບໍ່ທັນພົບພະຍາດນີ້ກໍ່ຕາມ ແຕ່ໄວຣັສດັ່ງກ່າວໄດ້ສົ່ງຜົນກະທົບຕໍ່ເສດຖະກິດໄປແລ້ວຢ່າງຫຼວງຫຼາຍ.
ຂະແໜງທຳອິດທີ່ຖືກກະທົບຫຼາຍທີ່ສຸດ ແມ່ນ ການທ່ອງທ່ຽວ, ການລົງທຶນ ແລະ ການຄ້າ. ພະຍາດດັ່ງກ່າວ ກຳລັງກົດໜ່ວງການຂະຫຍາຍຕົວຂອງຂະແໜງການສຳຄັນເຫຼົ່ານີ້, ເຊິ່ງເປັນໄມ້ງັດອັນສໍາຄັນທາງດ້ານເສດຖະກິດ.
ລາຍໄດ້ຈາກການທ່ອງທ່ຽວ, ເຊິ່ງເປັນແຫຼ່ງລາຍຮັບສຳຄັນ ຂອງ ສປປ ລາວ ໄດ້ຫຼຸດລົງຢ່າງຊັດເຈນ ເນື່ອງຈາກວ່າ ບັນດາທຸລະກິດຂົນສົ່ງຜູ້ໂດຍສານຈາກພາຍໃນ ແລະ ຕ່າງປະເທດຈໍານວນໜຶ່ງໄດ້ໂຈະການບໍລິການ ຈຳນວນນັກທ່ອງທ່ຽວຕ່າງປະເທດ ເຊັ່ນວ່າ: ຈີນ ແລະ ເກົາຫຼີໃຕ້ ໄດ້ຍົກເລີກແຜນການເດີນທາງມາທ່ຽວ ສປປ ລາວ, ບັນຍາກາດແຫຼ່ງທ່ອງທ່ຽວຕ່າງໆ ກໍ່ງຽບເຫງົາ ເພາະຈຳນວນນັກທ່ອງທ່ຽວໄດ້ຫຼຸດລົງ.
ການຂະຫຍາຍຕົວຂອງເສດຖະກິດ ແມ່ນພົວພັນກັບການບໍລິການ, ການລົງທຶນ ແລະ ການຄ້າ; ຖ້າປັດໄຈເຫຼົ່ານີ້ຖືກກະທົບການຂະຫຍາຍຕົວຂອງເສດຖະກິດກໍ່ຈະຊັກຊ້າລົງ ໃນປີ 2020, ອີງຕາມການຄາດຄະເນຂອງນັກຄົ້ນຄ້ວາຈາກສະຖາບັນ ເຊິ່ງລັດຖະບານໄດ້ວາງແຜນການຂະຫຍາຍຕົວຂອງເສດຖະກິດ 6,7% ເພີ່ມຂຶ້ນປະມານ 0,3% ທຽບໃສ່ປີຜ່ານມາ ແຕ່ປີນີ້ ມີຄວາມເປັນໄປໄດ້ທີ່ຈະບໍ່ບັນລຸເປົ້າໝາຍທີ່ກຳນົດໄວ້.
ຮຽບຮຽງຂ່າວ: ພຸດສະດີ