ສູນຄວບຄຸມ ແລະ ປ້ອງກັນພະຍາດເກົາຫຼີໃຕ້ ໄດ້ຖະແຫຼງການເມື່ອວັນທີ 21 ກຸມພາ ທີ່ຜ່ານມາວ່າ ພົບຜູ້ປ່ວຍຕິດເຊື້ອໄວຣັສໂຄໂຣນາເພີ່ມອີກ 52 ຄົນ ເຮັດໃຫ້ຈຳນວນສະສົມຂອງຜູ້ປ່ວຍ ແລະ ເຄີຍປ່ວຍເປັນໂຣກອັກເສບໂຄໂຣນາໃນປະເທດເພີ່ມຈຳນວນເປັນ 156 ຄົນ.
ເພສ Drama-addict ໄດ້ເຜີຍແຜ່ເລື່ອງເລົ່າຂອງ “ຜູ້ປ່ວຍຕິດເຊື້ອຄົນທີ 31“ ຂອງເກົາຫຼີໃຕ້ ໂດຍລະບຸວ່າ ຜູ້ຕິດເຊື້ອລາຍນີ້ຄືແມ່ປ້າໄວອາຍຸ 61 ປີ ມີປະຫວັດທີ່ໜ້າສົນໃຈຫຼາຍ ເນື່ອງຈາກວ່າປ້າອາໄສຢູ່ແຕ່ພາຍໃນປະເທດ ແຕ່ເປັນຜູ້ປ່ວຍຕິດເຊື້ອໄວຣັດໂຄໂຣນາ ແລະ ທີ່ສຳຄັນໃນເວລານີ້ປ້າໄດ້ກາຍເປັນ Super Spreader ຫຼື ຜູ້ກະຈາຍເຊື້ອສູ້ຄົນຈຳນວນຫຼາຍເປັນທີ່ຮຽບຮ້ອຍແລ້ວ ຈາກທຳອິດທີ່ເກົາຫຼີໃຕ້ມີຜູ້ຕິດເຊື້ອກ່ອນໜ້ານີ້ບໍ່ຮອດ 30 ຄົນ ແຕ່ຕອນນີ້ມີຍອດຜູ້ປ່ວຍເພີ່ມຂຶ້ນເປັນຫຼາຍຮ້ອຍຄົນ ຈົນເຮັດໃຫ້ລັດຖະບານສັ່ງເມືອງແທກູ (ເມືອງທີ່ປ້າອາໄສຢູ່) ເຊິ່ງເປັນເມືອງທີ່ມີການແຜ່ລະບາດຂອງໂຣກໜັກທີ່ສຸດເປັນສະຖານທີ່ກັກກັນໂຣກໄປຮຽບຮ້ອຍແລ້ວ.
ຜູ້ຕິດເຊື້ອໄວຣັສໂຄໂຣນາຄົນທີ່ 31 ມີອາຍຸ 61 ປີ ອາໄສໃນເມືອງແທກູ ທີ່ເກົາຫຼີໃຕ້ ແລະ ເປັນສະມາຊິກຂອງລັດທິຊິນຊອນຈິ ເຊິ່ງລັດທິນີ້ຈະມີກິດຈະກຳໃຫ້ສະມາຊິກສວດມົນຮ່ວມກັນເລື້ອຍໆ ແຕ່ເມື່ອທາງລັດທິຮູ້ຂ່າວກ່ຽວກັບການລະບາດຂອງໄວຣັດໂຄໂຣນາ ຕັ້ງແຕ່ເດືອນມັງກອນ ແລະ ທາງລັດທິໄດ້ມີການປະກາດເຖິງສະມາຊິກທຸກຄົນວ່າ ຖ້າໃຜຫາກມີອາການປ່ວຍໃຫ້ແຈ້ງຕໍ່ພະນັກງານ ແລະ ໃຫ້ເກັບຕົວຢູ່ແຕ່ໃນເຮືອນເພື່ອຟັງເບິ່ງອາການ.
ຜູ້ປ່ວຍລາຍນີ້ມີອາການໄອຈາມມາເປັນເວລາດົນແລ້ວ ແຕ່ຄິດວ່າຕົນເອງເປັນຫວັດ ບໍ່ແມ່ນຕິດເຊື້ອໂຄໂຣນາ ດັ່ງນັ້ນ, ຜູ້ປ່ວຍຄົນດັ່ງກ່າວຈຶ່ງເດີນທາງໄປທີ່ລັດທິຕາມປົກກະຕິ ພ້ອມທັງເຮັດກິດຈະກຳຂອງໂບດ ເຊິ່ງກິດຈະກຳຈະໃຫ້ສະມາຊິດຢືນຕິດໆກັນພ້ອມຮ້ອງເພງສຽງດັງໆ ເຊິ່ງຄົນໄປຮ່ວມກິດຈະກຳໃນແຕ່ລະຄັ້ງກໍ່ຈະມີປະມານໜຶ່ງພັນກວ່າຄົນ ແລະ ບໍ່ພຽງແຕ່ໄປຮ່ວມກິດຈະກຳທີ່ໂບດເທົ່ານັ້ນ ຜູ້ປ່ວຍລາຍນີ້ຍັງໃຊ້ຊີວິດຕາມປົກກະຕິເຖິງຈະມີອາການໄອຈາມຢູ່ ບໍ່ວ່າຈະເປັນການເດີນທາງໂດຍລົດໂດຍສານປະຈຳທາງໄປທ່ຽວ, ເດີນທາງໄປຮ່ວມງານແຕ່ງຂອງເພື່ອນ, ໄປຍ່າງເລາະຫ້າງສັບພະສິນຄ້າ, ນັ່ງລົດປະຈຳທາງໄປນະຄອນຫຼວງໂຊລ ແລະ ຕໍ່ມາປ້າຄົນດັ່ງກ່າວກໍ່ເກີດອຸບັດຕິເຫດໃນວັນທີ 7 ກຸມພາ 2020 ແລ້ວລະຫວ່າງທີ່ແພດແອັດມິດ ປ້າກໍ່ມີອາການໄອ ມີໄຂ້ ເມື່ອຍ. ຫຼັງຈາກນັ້ນໃນວັນທີ 10 ກຸມພາ, ແພດໄດ້ຂໍກວດຫາເຊື້ອໄວຣັສໂຄໂຣນາ ເພາະຜົນເອັກສະເລ (X-Ray) ສະແດງໃຫ້ເຫັນວ່າປ້າມີອາການປອດບວມຊັດເຈນ, ແຕ່ປ້າກໍ່ບໍ່ຍອມໃຫ້ແພດກວດ ໂດຍໃຫ້ເຫດຜົນວ່າ ຕົນບໍ່ໄດ້ເດີນທາງໄປຕ່າງປະເທດດົນແລ້ວ ຈະໄປຕິດເຊື້ອໄວຣັສໂຄໂຣນາມາຈາກໃສ ແພດກໍ່ເລີຍຮັກສາດ້ວຍການໃຫ້ຢາຂ້າເຊື້ອ, ຕໍ່ມາປ້າຄົນນີ້ຍັງໄດ້ໄປກວດສຸຂະພາບທີ່ຫຼາຍໂຮງໝໍ ເພື່ອໃຫ້ແພດຮັກ ແລະ ແພດກໍ່ສະເໜີໃຫ້ກວດຫາເຊື້ອໄວຣັສໂຄໂຣນາແຕ່ປ້າກໍ່ບໍ່ຍອມກວດ ແລະ ວົນວຽນເຂົ້າ-ອອກໂຮງໝໍຢ່າງໜ້ອຍ 4 ແຫ່ງ. ຈົນໃນທີ່ສຸດໃນວັນທີ 17 ກຸມພາ ເມື່ອປ້າໄປກວດທີ່ໂຮງໝໍແຫ່ງໜຶ່ງຈຶ່ງຍອມໃຫ້ແພດກວດຫາເຊື້ອໄວຣັສໂຄໂຣນາ ແລະ ໃນວັນທີ 18 ກຸມພາ ຜົນກວດບອກວ່າ ປ້າຕິດເຊື້ອໄວຣັສໂຄໂຣນາເປັນຄົນທີ 31 ຂອງເກົາຫຼີໃຕ້. ຫຼັງຈາກຮູ້ຜົນວິໄຈຂອງປ້າແລ້ວ ກໍມີປະຊາຊົນເກົາຫຼີໃຕ້ມີອາການຕ້ອງສົງໃສວ່າຕິດເຊື້ອໄວຣັດໂຄໂຣນາເພື່ອຂຶ້ນມາອີກຫຼາຍສິບຄົນ ແລະ ເມື່ອເຮັດການສືບປະຫວັດຄົນປ່ວຍ ຈຶ່ງເຮັດໃຫ້ຮູ້ວ່າ ຜູ້ປ່ວຍຫຼາຍສິບຄົນມີຄວາມກ່ຽວຂ້ອງກັບປ້າຜູ້ປ່ວຍຕິດເຊື້ອຄົນທີ 31 ບໍ່ວ່າຈະເປັນສາວຄົນໜຶ່ງທີ່ເປັນສະມາຊິກລັດທິດຽວກັນກັບປ້າ, ຄົນທີ່ໄປຮ່ວມງານແຕ່ງງານດຽວກັນກັບປ້າ ຫຼື ຄົນທີ່ມາຮັບບໍລິການທີ່ໂຮງໝໍແຫ່ງດຽວກັນກັບປ້າຕອນທີ່ເກີດຸບັດຕິເຫດ ແລະ ຈາກການທີ່ສູນຄວບຄຸມໂຣກເກົາຫຼີໃຕ້ພົບວ່າ ຄົນທີ່ສຳພັດໂຣກກັບປ້າຄົນນີ້ ມີເຖິງ 1,160 ຄົນ.
ຫຼ້າສຸດ KCDC ຫຼື ອົງການຄວບຄຸມໂຣກຕິດຕໍ່ຂອງເກົາຫຼີໃຕ້ອອກມາເຜີຍວ່າ ປ້າຄົນດັ່ງກ່າວຍອມຮັບແລ້ວວ່າເຄຍເດີນທາງໄປເມືອງ ອູຮັ່ນ ເມື່ອເດືອນທັນວາ 2019.
ປັດຈຸບັນ, ທາງລັດຖະບານໄດ້ສັ່ງໃຫ້ຄົນທີ່ມີປະຫວັດສຳພັດກັບປ້າທຸກຄົນກັກຕົວຢູ່ເຮືອນເພື່ອລໍເບິ່ງອາການ ແລະ ໃຫ້ຮີບກວດຫາເຊື້ອທັນທີ ສ່ວນຫ້າງຊັບພະສິນຄ້າຕ່າງໆທີ່ປ້າເຄີຍໄປກໍ່ໃຫ້ປະກາດປິດຊົ່ວຄາວ ລວມເຖິງໂບດທີ່ປ້າໄປຮ່ວມກິດຈະກຳກໍ່ໃຫ້ປິດຊົ່ວຄາວເຊັ່ນດຽວກັນ.