ສະຖານນີໂທລະພາບສຳນັກງານຕຳຫຼວດແຫ່ງຊາດລາຍງານວ່າ ເກີດເຫດຊາຍຄົນໜຶ່ງຍິງປືນຂຶ້ນຟ້າກວ່າ 20ນັດ ຈາກຕຶກແຖວທີ່ຖະໜົນບັນທັດທອງ ເຂດປະທຸມວັນ ກຸງເທບມະຫານະຄອນ ປະເທດໄທ ຕຳຫຼວດໄດ້ເຂົ້າໄປຄວບຄຸມສະຖານະການ ແລະ ຢູ່ລະຫວ່າງການເຈລະຈາໃຫ້ຜູ້ກໍ່ເຫດມອບຕົວ.
ພັນໂທ ກຳປະນາດ ສະຫງວນສັກ ໄດ້ໃຫ້ສຳພາດກັບສະຖານີໂທລະພາບໄທພີບີເອສວ່າ ເມື່ອເວລາ 09:35ໂມງ ຕຳຫຼວດໄດ້ນຳກຳລັງເຂົ້າປິດລ້ອມພື້ນທີ່ໄວ້ ແລະ ສົ່ງທີມເຈລະຈາເຂົ້າໄປໃນຕຶກແຖວຫຼັງດັ່ງກ່າວເພື່ອສົນທະນາກັບຜູ້ກໍ່ເຫດ.
ກຸ່ມໄວຮຸ່ນ 4 ຄົນເປັນຜູ້ທີ່ເຫັນເຫດການໄດ້ໃຫ້ສຳພາດກັບທາງໂທລະພາບຊ່ອງ 3 ວ່າ ພວກເຂົານັ່ງລວມກຸ່ມກັນຢູ່ບໍລິເວນໃກ້ທີ່ເກີດເຫດ ເວລາປະມານ 03.00ໂມງ ໄດ້ຍິນສຽງປືນດັງຂຶ້ນ 3 ນັດ ແຕ່ຄິດວ່າແມ່ນຈູດດອກໄມ້ໄຟ ແຕ່ບໍ່ດົນຫຼັງຈາກນັ້ນຊາຍຄົນດັ່ງກ່າວກໍ່ໄດ້ຍິງປືນອີກ ແລະ ຍັງໄດ້ຍິງມາທາງກຸ່ມພວກເຂົາພ້ອມ ຈຶ່ງພາກັນແລ່ນໜີ ໂຊກດີທີ່ບໍ່ມີຜູ້ໄດ້ຮັບບາດເຈັບ ແລະ ສຽງປືນໄດ້ມິດລົງເມື່ອເວລາ 05.00ໂມງ.
ຫຼ້າສຸດ ມີລາຍງານເຂົ້າມາວ່າຜູ້ກໍ່ເຫດຍັງຢູ່ໃນຕຶກແຖວ ເບື້ອງຕົ້ນຍັງບໍ່ມີລາຍງານຜູ້ໄດ້ຮັບບາດເຈັບ ຫຼື ເສຍຊີວິດ ຖ້າມີຄວາມຄືບໜ້າແນບໃດທາງທີມຂ່າວຈະລາຍງານໃຫ້ຮັບຊາບຄັ້ງຕໍ່ໄປ.
ຮຽບຮຽງຂ່າວ: ພຸດສະດີ