ສຳນັກຂ່າວໄທຣັດລາຍງານວ່າ ສປປ ລາວ ເປີດການຍົກລະດັບດ່ານສາກົນ ປາງມອນ ຢ່າງເປັນທາງການ ເພື່ອເຊື່ອມກັບ ອຳເພີ ພູຊາງ ຈັງຫວັດ ພະເຍົາຂອງປະເທດ ໄທ ໄປສູ່ຫຼວງພະບາງ ເພື່ອຊ່ວຍໃຫ້ເສດຖະກິດ, ການຄ້າ, ການທ່ອງທ່ຽວທັງສອງຝ່າຍດີຂຶ້ນ.

ໃນວັນທີ 1 ກຸມພາ 2020, ທ່ານ ທອງສະຫວັນ ພົມວິຫານ ຮອງລັດຖະມົນຕີ ກະຊວງ ການຕ່າງປະເທດ ເປັນປະທານເປີດພິທີການຍົກລະດັບດ່ານສາກົນປາງມອນ ທີ່ເມືອງ ຄອບ ແຂວງ ໄຊຍະບູລີ ຢ່າງເປັນທາງການ ເພື່ອເຮັດໃຫ້ດ່ານດັ່ງກ່າວມີຄວາມເທົ່າທຽມກັບດ່ານສາກົນບ້ານ ຮວກ ອຳເພີ ພູຊາງ ຈັງຫວັດ ພະເຍົາ ທີ່ເຄີຍມີການຍົກລະດັບກ່ອນໜ້ານີ້.

ການຍົກລະດັບດ່ານປະເພນີປາງມອນເປັນດ່ານສາກົນ ໄດ້ເຮັດຕາມບົດບັນທຶກຂໍ້ຕົກລົງໃນກນປະຊຸມເຈົ້າແຂວງ ແລະ ຜູ້ວ່າການຈັງຫວັດຊາຍແດນລາວ-ໄທ ຄັ້ງທີ 10 ເມືອວັນທີ 28 ກັນຍາ 2017 ທີ່ນະຄອນຫຼວງວຽງຈັນ. ເຊິ່ງທັງສອງປະເທດໄດ້ເຫັນດີຍົກລະດັບດ່ານປະເພນີທັງລາວ-ໄທ ເປັນດ່ານສາກົນຖາວອນ ເມື່ອວັນທີ 18 ກັນຍາ 2019 ແລະ ເປີດດ່ານປະເພນີບ້ານ ຮວກ ອຳເພີ ພູຊາງ ເປັນດ່ານສາກົນໃນວັນທີ 18 ທັນວາ 2019 ທີ່ຜ່ານມາ.

ການຍົກລະດັບດ່ານທັງສອງປະເທດຈະຊ່ວຍໃຫ້ເກີດການຂະຫຍາຍຕົວໃນເລື່ອງຂອງການຄ້າ ການລົງທຶນລວມເຖິງການທ່ອງທ່ຽວເພີ່ມຂຶ້ນ ຖືເປັນປະຕູດ່ານເຊື່ອມຕໍ່ດ້ານເສດຖະກິດທາງພາກເໜືອຂອງ ສປປ ລາວ ແລະ ພາກເໜືອຂອງປະເທດໄທ.

ຮຽບຮຽງຂ່າວ: ພຸດສະດີ