ສະຖານທູດຈີນໃນການາດາຖະແຫຼງການຜ່ານເວັບໄຊເຖິງລັດຖະບານການາດາໃຫ້ຍຸຕິສົ່ງອອກຊີ້ນງົວ ແລະ ຊີ້ນໝູໄປຈີນນັບແຕ່ວັນທີ 25 ມິຖຸນາ 2019 ເປັນຕົ້ນໄປ ພາຍຫຼັງເຈົ້າໜ້າທີ່ພາສີຈີນພົບເອກະສານຮັບຮອງການສົ່ງອອກຊີ້ນຂອງບໍລິສັດ ຟຣີໂກ ຣໍຢັລ ອິນຊ ຈາກການາດາຜິດປົກກະຕິດ້ານຄວາມປອດໄພຫຼາຍກວ່າ 188 ສະບັບ.
ການກວດສອບທີ່ເມືອງນານຈິງ ທາງພາກຕາເວັນອອກພົບວ່າການໃຊ້ສານຕ້ອງຫ້າມຊະນິດແຣັກໂຕພາມິນຊຶ່ງເປັນສານເລັ່ງຊີ້ນແດງທີ່ນຳໃຊ້ຢ່າງກວ້າງຂວາງໃນອາເມຣິກາ ແຕ່ຫ້າມໃຊ້ໃນສະຫະພາບເອີຣົບ (EU) ແລະ ສປ ຈີນ ຊຶ່ງສົ່ງຜົນກະທົບຕໍ່ການສົ່ງອອກຊີ້ນໄປຍັງຈີນທີ່ຖືເປັນຕະຫຼາດໃຫຍ່ອັນດັບ 3 ຂອງການາດາ.
ຂະນະທີ່ລັດຖະມົນຕີກະຊວງກະສິກຳຂອງການາດາ ແລະ ສຳນັກງານກວດສອບອາຫານ ຫຼື CFIA ກໍໄດ້ຮັບຮູ້ເຖິງບັນຫາ ແລະ ຢືນ ຢັນວ່າພົບເອກະສານຮັບຮອງການສົ່ງອອກປອມແລ້ວ ຊຶ່ງຂະນະນີ້ແມ່ນຢູ່ລະຫວ່າງການປະສານງານກັບອຸດສາຫະກຳລ້ຽງສັດ ແລະ ເຈົ້າໜ້າທີ່ຈີນຢ່າງໃກ້ຊິດ.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: thairath