ເມື່ອວັນທີ 21 ມິຖຸນາຜ່ານມາເກີດເຫດລົດບັສໂດຍສານຕົກພູທີ່ລັດຫິມາຈັລປະເທດໃນພາກເໜືອຂອງອິນເດຍ ສົ່ງຜົນໃຫ້ມີຜູ້ເສຍຊີວິດ 44 ລາຍ ແລະ ບາດເຈັບ 28 ຄົນ.
ອຸບັດເຫດດັ່ງກ່າວແມ່ນເກີດກັບລົດບັສຂອງເອກະຊົນທີ່ບັນຈຸຜູ້ໂດຍສານມາເຕັມຄັນລົດ ແຕ່ເມື່ອມາຮອດຈຸດເກີດເຫດຄົນຂັບບໍ່ສາມາດຄວບຄຸມລົດໄດ້ ເຮັດໃຫ້ລົດພຸ່ງຕົກລົງຊ່ອງພູທີ່ເມືອງຄຸລລູ ລັດຫິມາຈັລປະເທດຊຶ່ງຕັ້ງຢູ່ເຂດຕີນພູຫິມາໄລຊຶ່ງເປັນທາງໂຄ້ງ ແລະ ຈຸດທີ່ລົດປະສົບອຸບັດເຫດແມ່ນສູງປະມານ 150 ແມັດ.
ຊຶ່ງເບື້ອງຕົ້ນເຈົ້າໜ້າທີ່ລາຍງານວ່າມີຜູ້ເສຍຊີວິດໃນທີ່ເກີດເຫດຢ່າງໜ້ອຍ 25 ລາຍ ແຕ່ຕໍ່ມາກໍໄດ້ປັບເພີ່ມເປັນຢ່າງໜ້ອຍ 44 ລາຍ ຂະນະທີ່ຜູ້ບັງຄັບການຕຳຫຼວດເມືອງຄຸລລູໄດເປີດເຜີຍວ່າ ເຈົ້າໜ້າທີ່ກູ້ຊີບໄດ້ນຳຕົວຜູ້ບາດເຈັບໄປສົ່ງໂຮງໝໍທີ່ໃກ້ທີ່ສຸດ ສຳລັບຜູ້ເສຍຊີວິດໃນຄັ້ງນີ້ສ່ວນໃຫຍ່ເປັນເພດຍິງ ແລະ ເດັກນ້ອຍທີ່ເດີນທາງກັບຈາກເຮັດວຽກ ແລະ ໂຮງຮຽນ.
ທັງນີ້ ໜັງສືພິມຊື່ດັງຂອງອິນເດຍໄດ້ລາຍງານວ່າ ລະຫວ່າງປີ 2009-2018 ມີສະຖິຕິອຸບັດເຫດຕາມທ້ອງຖະໜົນໃນລັດຫິມາຈັລປະເທດຫຼາຍກວ່າ 30.000 ຄັ້ງ ມີຜູ້ເສຍຊີວິດຫຼາຍກວ່າ 11.000 ລາຍ ແລະ ບາດເຈັບຫຼາຍກວ່າ 54.000 ຄົນ ສາເຫດສ່ວນໃຫຍ່ມາຈາກສະພາບຖະໜົນທີ່ສູງຊັນ ແລະ ເປັນຂຸມ ລວມທັງການຂັບລົດດ້ວຍຄວາມໄວ ແລະ ລົດແຕ່ລະຄັນກໍບັນຈຸຜູ້ໂດຍສານເກີນຂະໜາດອັນເປັນອີກໜຶ່ງສາເຫດທີ່ເຮັດໃຫ້ລົດເສຍການຄວບຄຸມ.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: thaipost