ໂອກາດຢ້ຽມຢາມ ແລະ ເຮັດວຽກທີ່ແຂວງເຊກອງຂອງ ທ່ານ ບຸນທອງ ຈິດມະນີ ຮອງນາຍົກລັດຖະມົນຕີ ປະທານກວດກາສູນກາງພັກ ປະທານອົງການກວດກາລັດຖະບານ ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ ທ່ານໄດ້ໃຫ້ກຽດພົບປະໂອ້ລົມການນໍາຂັ້ນຕ່າງໆຂອງແຂວງ ໂດຍໃຫ້ການຕ້ອນຮັບຢ່າງອົບອຸ່ນຂອງ ທ່ານ ຄໍາເຜີຍ ບຸດດາວຽງ ເຈົ້າແຂວງໆເຊກອງ ໃນວັນທີ 20 ມິຖຸນາຜ່ານມານີ້.
ທ່ານ ຄໍາເຜີຍ ບຸດດາວຽງ ໄດ້ລາຍງານສະພາບການຊີ້ນໍາໆພາວຽກງານຮອບດ້ານ ແລະ ການພັດທະນາເສດຖະກິດ-ສັງຄົມຂອງແຂວງໃນ 6 ເດືອນຕົ້ນປີ 2019 ວ່າ ໄດ້ເອົາໃຈໃສ່ຊີ້ນໍາ-ນໍາພາປະຊາຊົນທ້ອງຖິ່ນເຮັດການຜະລິດ ປັບປຸງກໍ່ສ້າງກໍາລັງປ້ອງກັນຊາດ-ປ້ອງກັນຄວາມສະຫງົບຢ່າງຕໍ່ເນື່ອງ ດ້ານເສດຖະກິດຍລວມຍອດຜະລິດຕະພັນພາຍໃນຂະຫຍາຍຕົວຢູ່ໃນລະດັບ 8,3% ສະເລ່ຍລາຍຮັບໃສ່ພົນລະເມືອງເທົ່າກັບ 12 ລ້ານກວ່າກີບຕໍ່ຄົນຕໍ່ປີ ຄຽຄູ່ກັນນີ້ແຂວງກໍຍັງໄດ້ເອົາໃຈໃສ່ໃນການພັດທະນາຂົງເຂດວັດທະນະທໍາ-ສັງຄົມ ໂດຍໄດ້ເລັ່ງໃສ່ວຽກງານສຶກສາ ແລະ ສາທາລະນະສຸກເປັນຕົ້ນຕໍ ອັນພົ້ນເດັ່ນໃນປັດຈຸບັນແມ່ນສາມາດລຶບລ້າງຄອບຄົວທຸກຍາກໄດ້ແລ້ວ 23.829 ຄອບຄົວກວມເອົາ 95,3% ຂອງຄອບຄົວທັງໝົດທົ່ວແຂວງ.
ຈາກນັ້ນ ທ່ານຮອງນາຍົກລັດຖະມົນຕີກໍໄດ້ມີການເຈາະຈີ້ມໃນຫຼາຍໆບັນຫາເພື່ອໃຫ້ການນໍາຂອງແຂວງນໍາໄປປຶກສາຫາລື ແລະ ແກ້ໄຂຕໍ່ໄປ ພ້ອມກັນນີ້ທ່ານຍັງໄດ້ເນັ້ນໃຫ້ຄະນະພັກ-ຄະນະນໍາ ແລະ ພະນັກງານຫຼັກແຫຼ່ງຂອງແຂວງສືບຕໍ່ເອົາໃຈໃສ່ປະຕິບັດວຽກງານປ້ອງກັນຊາດ-ປ້ອງກັນຄວາມສະຫງົບ ຊຸກຍູ້ສົ່ງເສີມປະຊາຊົນຜະລິດກະສິກໍາ (ປູກຝັງ-ລ້ຽງສັດ) ໃຫ້ນັບມື້ຫຼາຍຂຶ້ນ ພັດ ທະນາພື້ນຖານໂຄງລ່າງຮັບໃຊ້ການຜະລິດ ແລະ ຊີວິດການເປັນຢູ່ຂອງປະຊາຊົນ ສຸມໃສ່ແກ້ໄຂຈຸດອ່ອນ ຂໍ້ຄົງຄ້າງ ແລະ ສິ່ງທີ່ເປັນອຸປະສັກຕໍ່ການພັດທະນາເສດຖະກິດຂອງແຂວງໃຫ້ຕົກໄປ ສິ່ງສໍາຄັນຕ້ອງຫັນລົງກໍ່ສ້າງຮາກຖານການເມືອງ ພັດທະນາຊົນນະບົດ-ລຶບລ້າງຄວາມທຸກຍາກ ແລະການປະຕິບັດວຽກງານ 3 ສ້າງຢູ່ແຂວງເຊກອງໃຫ້ປະກົດຜົນເປັນຈິງໂດຍໄວ.
ພ້ອມນີ້ ທ່ານຮອງນາຍົກລັດຖະມົນຕີ ພ້ອມດ້ວຍຄະນະຍັງໄປຢ້ຽມຢາມຟາມລ້ຽງງົວ ແລະ ໂຮງງານນໍ້າຕານຂອງບໍລິສັດແມ່ຂອງຮ່ວມທຸລະກິດທີ່ຕັ້ງຢູ່ບ້ານຕິ້ວ ເມືອງລະມາມ ແຂວງເຊກອງຕື່ມອີກ.
ໂດຍ: ສະຫະລັດ ວອນທິວົງໄຊ