ອົງການສະຫະປະຊາຊາດໂດຍສຳນັກງານເສດຖະກິດ ແລະ ສັງຄົມໄດ້ເປີດເຜີຍຜົນການສຶກສາທີ່ລະບຸວ່າ ໃນອະນາຄົດປະຊາກອນໂລກຈະເພີ່ມສູງຂຶ້ນເຖິງ 9.700 ລ້ານຄົນໃນປີ 2050 ຫຼື ອີກປະມານ 30 ປີຂ້າງໜ້າ ຊຶ່ງປັດຈຸບັນປະຊາກອນໂລກມີຢູ່ປະມານ 7.500 ລ້ານຄົນ ລາຍງານດຽວກັນລະບຸອີກວ່າ ປະຊາກອນໂລກສາມາດເພີ່ມຂຶ້ນເຖິງ 11.000 ລ້ານຄົນພາຍໃນປີ 2100 ຕາມການລາຍງານຂອງໂຄງການປະຊາກອນໂລກ.
ນອກຈາກນີ້ ພາຍໃນປີ 2050 ປະຊາກອນຫຼາຍກວ່າເຄິ່ງໜຶ່ງຂອງໂລກຈະແອອັດຢູ່ພາຍໃນ 9 ປະເທດຄື ອິນເດຍ ໄນຈີເຣຍ ປາກິສຖານ ດີອາຣຄອງໂກ ເອທິໂອປີ ແທນຊາເນຍ ອິນໂດເນເຊຍ ເອຢິບ ແລະ ອາເມຣິກາ ຂະນະທີ່ປັດຈຸບັນປະເທດທີ່ມີປະຊາກອນຫຼາຍທີ່ສຸດໃນໂລກກໍຄື ສປ ຈີນ ຊຶ່ງຄາດຄະເນວ່າປະຊາກອນຈະຫຼຸດລົງປະມານ 2,2% ຫຼື ປະມານ 31,4 ລ້ານຄົນໃນຊ່ວງລະ ຫວ່າງປີ 2019-2050.
ຂະນະທີ່ພາບລວມຂອງຜົນການວິໄຈພົບວ່າ ມີຢ່າງໜ້ອຍ 27 ປະເທດທີ່ປະຊາກອນຈະຫຼຸດລົງຢ່າງໜ້ອຍ 1% ເນື່ອງຈາກອັດຕາການຈະເລີນພັນຫຼຸດລົງນັບແຕ່ປີ 2010 ເປັນຕົ້ນມາ ຊຶ່ງບາງປະເທດເຊັ່ນ ເບລາຣຸສ ເອສໂຕເນຍ ເຢຍລະມັນ ຮັງກາຣີ ອີຕາລີ ຍີ່ປຸ່ນ ຣັດ ເຊຍ ເຊີຣເບຍ ແລະ ຢູເຄຣນ ຈະມີອັດຕາການເສຍຊີວິດຫຼາຍກວ່າອັດຕາການເກີດ ແຕ່ຈຳນວນຜູ້ອົບພະຍົບທີ່ເຂົ້າມາໃນປະເທດຈະຊ່ວຍຊົດເຊີຍຈຳນວນອັດຕາທີ່ສູນເສຍໄປ.
ສຳລັບອັດຕາອາຍຸໄຂຂອງປະຊາກອນທົ່ວໂລກສະເລ່ຍຢູ່ທີ່ 77 ປີໃນປີ 2050 ຊຶ່ງເພີ່ມຂຶ້ນຈາກປັດຈຸບັນທີ່ອາຍຸໄຂສະເລ່ຍຂອງປະ ຊາກອນໂລກຢູ່ທີ່ 72,6 ປີ ແລະ ເພີ່ມຂຶ້ນພໍສົມຄວນເມື່ອທຽບກັບປີ 1990 ຊຶ່ງຢູ່ທີ່ 64,2 ປີ ອັນເນື່ອງມາຈາກເຕັກໂນໂລຊີດ້ານການແພດທີ່ກ້າວໜ້າ ແລະ ທັນສະໄໝຂຶ້ນ.
ຮຽບຮຽງ: ສະຫະລັດ ອວນທິວົງໄຊ
ຮູບພາບ: posttoday