ເມື່ອວັນທີ 17 ມິຖຸນາ 2019 ສຳນັກຂ່າວເອພີລາຍງານສະຖານະການຊຸມນຸມປະທ້ວງຂອງປະຊາຊົນຊາວຮົງກົງເພື່ອກົດດັນລັດຖະບານໃຫ້ຖອນຮ່າງກົດໝາຍສົ່ງຕົວຜູ້ຮ້າຍຂ້າມແດນໃຫ້ຈີນ ຊຶ່ງໃນວັນອາທິດທີ 16 ມິຖຸນາທີ່ຜ່ານມາຜູ້ຈັດການປະທ້ວງປະກາດວ່າ ມີປະຊາຊົນເກືອບ 2 ລ້ານຄົນຈາກປະຊາກອນໃນປະເທດ 7 ລ້ານຄົນຖືວ່າເປັນການປະທ້ວງສູງສຸດໃນຮອບ 30 ປີ.
ໃນການປະທ້ວງຄັ້ງນີ້ມີຄລິບໜຶ່ງໄດ້ຖືກແຊຣກັນຫຼາຍໃນໂລກໂຊໂຊຽວ ຊຶ່ງເປັນຄລິບທີ່ຜູ້ຊຸມນຸມປະທ້ວງເກືອບ 2 ລ້ານຄົນຫຼີກທາງໃຫ້ລົດໂຮງໝໍຄັນໜຶ່ງຜ່ານໄປ ພ້ອມກັບຂໍ້ຄວາມທີ່ວ່າ ນາທີນີ້ສະທ້ອນການຊຸມນຸມເປັນໄປໂດຍສັນຕິ ບໍ່ມີຄວາມວຸ້ນວາຍ ປ່ວນເມືອງ.
https://youtu.be/ondFCQXDJCg
ລັດຖະບານຮົງກົງ ທ່ານ ນາງ ແຄຣຣີ ຫຼໍາ ອອກຖະແຫຼງການຂໍໂທດໃນຕອນເດິກ ແຕ່ຍັງບໍ່ປະກາດຖອນຮ່າງກົດໝາຍໄປໃຫ້ເດັດຂາດຕາມທີ່ຜູ້ຊຸມນຸມຮຽກຮ້ອງ.
ຖະແຫຼງການຂອງ ທ່ານ ນາງ ແຄຣຣີ ຫຼຳ ໄດ້ມີເນື້ອໃຈສຳຄັນວ່າ “ລັດຖະບານເຂົ້າໃຈດີວ່າມຸມມອງຄວາມເຫັນຂອງຜູ້ຊຸມນຸມເຮັດດ້ວຍຄວາມຮັກ ແລະ ຄວາມຫ່ວງໃຍຕໍ່ຮົງກົງ ຈຶ່ງຂໍໂທດຕໍ່ປະຊາຊົນຮົງກົງທີ່ເຮັດໃຫ້ເກີດຄວາມວຸ້ນວາຍຂຶ້ນ ແລະ ສັນຍາວ່າຈະສະແດງທັດສະນະຄະຕິທີ່ຈິງໃຈ ແລະ ອ່ອນນ້ອມເພື່ອຮັບຟັງສຽງວິພາກວິຈານ ພ້ອມປັບປຸງການເຮັດວຽກຂອງລັດຖະບານ”.
ຫຼັງຄຳຖະແຫຼງການເຜີຍແຜ່ອອກມາ ແກນນຳຜູ້ຊຸມນຸມຕ່າງບໍ່ຍອມຮັບຖະແຫຼງການຂອງກຸ່ມສິດທິພົນລະເມືອງແນວໜ້າລະບຸວ່າ “ນີ້ເປັນຄຳຖະແຫຼງການດູໜິ່ນປະຊາຊົນທີ່ອອກມາເດີນຂະບວນປະທ້ວງຕາມທ້ອງຖະໜົນ” ຫຼັງຈາກທາງກຸ່ມໄດ້ຮຽກຮ້ອງໃຫ້ລັດ ຖະບານຖອນຮ່າງກົດໝາຍທີ່ຈີນສະໜັບສະໜູນອອກໄປໃຫ້ໝົດ ແລະ ໃຫ້ນາງ ຫຼຳ ລາອອກຈາກຕຳແໜ່ງຫົວໜ້າຄະນະເຂດປົກຄອງພິເສດຮົງກົງ ເພື່ອຮັບພິຊອບຕໍ່ຄວາມວຸ້ນວາຍທີ່ເກີດຂຶ້ນ.
ຮຽບຮຽງ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: khaosod.co.th