ທີ່ປະຊຸມກຸ່ມປະເທດສະມາຊິກຄວາມຮ່ວມມືອາຊີກາງເຫັນພ້ອມການສົ່ງເສີມຄວາມຮ່ວມມືກັນຢ່າງຍືນຍົງທັງໃນດ້ານການເມືອງ ເສດຖະກິດ ແລະ ຄວາມໝັ້ນຄົງ.
ສຳນັກຂ່າວຕ່າງປະເທດລາຍງານຈາກນະຄອນດູຊານເບ ປະເທດທາຈິກິສຖານເມື່ອວັນທີ 16 ມິຖຸນາຜ່ານມາວ່າ ການປະຊຸມວ່າດ້ວຍການສົ່ງເສີມປະຕິສຳພັນ ແລະ ມາດຕະການການສ້າງຄວາມໄວ້ເນື້ອເຊື່ອໃຈລະຫວ່າງປະເທດໃນພູມີພາກອາຊີຄັ້ງທີ 5 ຊຶ່ງຈັດຂຶ້ນທີ່ນະຄອນດູຊານເບເມື່ອອາທິດທີ່ຜ່ານມາ ໂດຍການປະຊຸມດັ່ງກ່າວເປັນການປະຊຸມລະຫວ່າງປະເທດເພື່ອສົ່ງເສີມຄວາມຮ່ວມມືພາຍໃນກຸ່ມປະເທດອາຊີກາງ ແລະ ພູມີພາກໃກ້ຄຽງ.
ທັງນີ້ ສະມາຊິກທັງ 27 ປະເທດ ລວມທັງ ສປ ຈີນ ຣັດເຊຍ ອິນເດຍ ຕວັກກີ ສ.ເກົາຫຼີ ອີຣານ ແລະ ໄທ ອອກຖະແຫຼງການຮ່ວມກັນໂດຍໄດ້ບັນລະຍາຍກ່ຽວກັບການຍົກລະດັບຄວາມຮ່ວມມືທັງໃນດ້ານຄວາມໝັ້ນຄົງ ແລະ ການພັດທະນາເສດຖະກິດຢ່າງຍືນຍົງໃນກຸ່ມປະເທດສະມາຊິກ ໂດຍທີ່ປະຊຸມມີຄວາມເຫັນພ້ອມວ່າ ໄພຄຸກຄາມຈາກການກໍ່ການຮ້າຍກຳລັງຄືບຄານເຂົ້າສູ່ອາຊີກາງ ແລະ ອາຊີຕາເວັນອອກສຽງໃຕ້ ພາຍຫຼັງກຸ່ມໄອເອສສູນເສຍຖານທີ່ໝັ້ນໃນອີຣັກ ແລະ ຊີເຣຍ ຂະນະດຽວກັນ ສະມາຊິກຍັງໄດ້ຕົກລົງເພີ່ມຄວາມຮ່ວມມືໃນດ້ານການເມືອງເພື່ອເສີມສ້າງຄວາມເຊື່ອໝັ້ນ ແລະ ການປະຕິຮູບນະໂຍບາຍການຄ້າໃຫ້ມີຄວາມສົມດຸນເພີ່ມຂຶ້ນກວ່າເກົ່າ.
ສຳລັບການປະຊຸມຄັ້ງຕໍ່ໄປຊຶ່ງເປັນຄັ້ງທີ 6 ຈະມີຂຶ້ນໃນປີ 2022 ແຕ່ຍັງບໍ່ມີການປະກາດປະເທດເຈົ້າພາບຢ່າງເປັນທາງການ ພ້ອມນີ້ ການປະຊຸມດັ່ງກ່າວເກີດຂຶ້ນຄັ້ງທຳອິດເມື່ອປີ 1991 ທີ່ປະເທດຄາຊັກສະຖານຕາມແນວຄິດລິເລີ່ມຂອງ ທ່ານ ນູຣສຸລະຕານ ນາຊາຣບາເຢຟ ປະທານາທິບໍດີຂອງຄາຊັກສະຖານໃນເວລານັ້ນເພື່ອກະຊັບຄວາມສຳພັນລະຫວ່າງພູມີພາກໃນທະວີບອາຊີ.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: dailynews.co.th