ແນໃສ່ຕອບສະໜອງຄວາມຮຽກຮ້ອງຕ້ອງການຂອງຂະແໜງບໍລິການໃຫ້ມີສິ່ງຮອງຮັບການມາພັກເຊົາຂອງບັນດາແຂກຄົນທີ່ຈະເດີນທາງມາແຂວງຫົວພັນໃຫ້ມີຈຳນວນຫຼາຍຂຶ້ນ ສົມກັບທ່າແຮງດ້ານການທ່ອງທ່ຽວ ທາງການ ແຂວງໄດ້ອະນຸມັດໃຫ້ນັກທຸລະກິດຫວຽດນາມເຂົ້າມາສຳປະທານ ເພື່ອປຸກໂຮງແຮມ 3 ດາວຢູ່ເມືອງວຽງໄຊ ຖິ່ນກຳເນີດຂອງການປະຕິວັດ.
ພິທີລົງນາມສຳປະທານທີ່ດິນໄດ້ຈັດຂຶ້ນໃນແລງວັນທີ 6 ຕຸລາ 2014 ນີ້ທີ່ພະແນກແຜນການ ແລະ ການລົງທຶນແຂວງຫົວພັນ ເຊັນຕາງໜ້າໃຫ້ອຳນາດການປົກຄອງແຂວງໂດຍທ່ານ ພອນໄຊ ອິນທະວົງ ຫົວໜ້າພະແນກແຜນການ ແລະ ການລົງທຶນ, ທ່ານ ເຂັມພອນ ທະວີໄຊ ຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ຝ່າຍບໍລິສັດແມ່ນ ທ່ານ ເລວັນຮືງ ອຳນວຍການບໍລິສັດຮຶງຟາດ ຈຳກັດ ແລະ ທ່ານ ອານວັນຕວນ ອຳນວຍການບໍລິສັດຂຸດຄົ້ນ ແລະ ປຸງແຕ່ງແຮ່ທາດຮວ່າງເຊີນ ຈຳກັດ ແຫ່ງ ສສ ຫວຽດນາມ ໂດຍໃຫ້ກຽດເຂົ້າຮ່ວມເປັນສັກຂີພິຍານຂອງ ທ່ານ ຄຳຮຸ່ງ ເຮືອງວົງໃສ ເຈົ້າແຂວງໆຫົວພັນ, ມີບັນດາພາກສ່ວນກ່ຽວຂ້ອງຂັ້ນແຂວງ, ເມືອງວຽງໄຊ ພ້ອມດ້ວຍພະນັກງານວິຊາການທັງສາມຝ່າຍເຂົ້າຮ່ວມນຳ.
ທັງນີ້ ການເຂົ້າມາຂອງນັກທຸລະກິດຫວຽດນາມຄັ້ງນີ້ແມ່ນເພື່ອຂໍສຳປະທານເນື້ອທີ່ດິນ 6.121 ຕາແມັດ ສ້າງຕັ້ງພັດຕາຄານຮຶງຟາດ ແລະ ສຳປະທານໂຮງແຮມເລກ 1 ຢູ່ບ້ານວຽງໄຊ ເມືອງວຽງໄຊ ແຂວງຫົວພັນ ໃນການສັນຍາທັງສອງໂຄງການນີ້ມີໄລຍະສຳປະທານ 50 ປີ ໃນນີ້ບໍລິສັດຂຸດຄົ້ນ ແລະ ປຸງແຕ່ງແຮ່ທາດຮວ່າງຟຸກລາງເຊີນມີເນື້ອທີ່ສຳປະທານ 2,2 ເຮັກຕາ ເພື່ອປຸກສ້າງເປັນໂຮງແຮມ 3 ດາວ.
ຂ່າວ: ນິດຖະໜອມ ໜັງສືພິມເສດຖະກິດ-ສັງຄົມ