ແຮງງານແມ່ນພະລັງງານທາງດ້ານຮ່າງກາຍ ແລະ ມັນສະໝອງຂອງມະນຸດທີ່ນຳໃຊ້ເຂົ້າໃນການເຮັດວຽກຊຶ່ງກໍ່ໃຫ້ເກີດຜົນທາງດ້ານເສດຖະກິດ ວັດທະນະທຳ-ສັງຄົມ.
ສຳລັບການຈ້າງງານໃນ ສປປ ລາວ ແມ່ນຈະມີຢູ່ 2 ເວລາຄື ຈ້າງງານຕອນກາງເວັນ ແລະ ກາງຄືນ ໂດຍໃນກົດໝາຍໄດ້ລະບຸໄວ້ວ່າ ໃນຕອນກາງເວັນແມ່ນເຮັດວຽກ 8 ຊົ່ວໂມງ ສ່ວນໂມງເຮັດວຽກກາງຄືນແມ່ນບໍ່ຕໍ່າກວ່າ 7 ຊົ່ວໂມງຄື ເລີ່ມແຕ່ 20:00 ຫາ 6:00 ໂມງເຊົ້າ ຖ້າຄິດໄລ່ແລ້ວແມ່ນຕົກຢູ່ 11 ຊົ່ວໂມງ.
ສຳລັບການເຮັດວຽກກາງຄືນ ໂດຍສະເພາະແມ່ນເຮັດວຽກຕາມຮ້ານອາຫານ ຫຼື ສະຖານບັນເທີງຕ່າງໆ ຊຶ່ງບາງຮ້ານຈະກຳນົດໃຫ້ເລີ່ມເຂົ້າວຽກແຕ່ເວລາ 18:00 ໂມງ ແຕ່ຜູ້ອອກແຮງງານອາດຕ້ອງໄດ້ມາຮອດສະຖານທີ່ເຮັດວຽກຊ້າສຸດປະມານ 17:00 ໂມງ ບາງວັນອາດເລີກເດິກຮອດ 24:00 ໂມງ ຫຼື ກາຍໂມງ ເພາະອີງໃສ່ສະພາບໃນຮ້ານ ຫຼື ງານຕົວຈິງ.
ແຕ່ທີ່ສັງເກດກໍຈະພົບວ່າຄ່າແຮງງານສຳລັບຄົນເຮັດວຽກກາງເວັນ ແລະ ກາງຄືນ ແມ່ນມີຄວາມແຕກຕ່າງກັນເລັກໜ້ອຍ ເພາະວຽກຕອນກາງເວັນຄ່າແຮງງານຈະຕົກຢູ່ທີ່ 800.000 ກີບຂຶ້ນໄປ (ຕາມທີ່ໄດ້ເກັບກຳຂໍ້ມູນຈາກຄົນທີ່ເຮັດອາຊີບກາງຄືນ) ໂດຍສະເພາະແມ່ນພະນັກງານເສີບອາຫານ ບາງບ່ອນແມ່ນຈະໄດ້ຮັບຄ່າແຮງງານພຽງເດືອນລະ 600.000 – 800.000 ກີບ ຊຶ່ງເລີ່ມເຂົ້າວຽກແຕ່ 17:00 ໂມງ ແລະ ເລີກວຽກບາງມື້ 24:00 ໂມງ ຫຼື ກາຍໂມງ ແລະ ຄົນທີ່ເຮັດອາຊີບເສີບຢູ່ໃນຮ້ານອາຫານຈະບໍ່ມີມື້ພັກ (ເຮັດວຽກ 7 ມື້) ເນື່ອງຈາກເປັນງານບໍລິການ ຂະນະທີ່ສ່ວນຫຼາຍແມ່ນຍັງບໍ່ທັນມີການຄຸ້ມຄອງກ່ຽວກັບສະຫວັດດີການ ໂດຍສະເພາະແມ່ນການເຮັດປະກັນສັງຄົມ.
ໃນກົດໝາຍ ສປປ ລາວ ລະບຸໄວ້ວ່າ ຄ່າແຮງງານຂັ້ນຕໍ່າແມ່ນ 1.100.000 ກີບ ແລະ ໃນມາດຕາ 61 ການເຮັດວຽກໃນເວລາກາງຄືນ ໃຫ້ນັບແຕ່ 20:00-6:00 ໂມງເຊົ້າ ວຽກກາງຄືນແມ່ນທຸກວຽກທີ່ປະຕິບັດບໍ່ຕໍ່າກວ່າ 7 ຊົ່ວໂມງ ຕິດຕໍ່ກັນ ຜູ້ອອກແຮງງານທີ່ເຮັດວຽກກາງຄືນມີສິດໄດ້ພັກວຽກຢ່າງໜ້ອຍ 11 ຊົ່ວໂມງກ່ອນຈະເລີ່ມວຽກໃນວັນໃໝ່ ໃນກໍລະນີຜູ້ເຮັດວຽກກາງຄືນບໍ່ສາມາດເຮັດວຽກໄດ້ຍ້ອນເຫດຜົນທາງສຸຂະພາບໂດຍມີການຢັ້ງຢືນຂອງແພດ ໃຫ້ຜູ້ໃຊ້ແຮງງານຊັບຊ້ອນ ຫຼື ຍົກຍ້າຍຜູ້ກ່ຽວໄປເຮັດວຽກອື່ນທີ່ເໝາະສົມຊົ່ວຄາວ ໂດຍຈະໄດ້ຮັບເງິນເດືອນ ຫຼື ຄ່າແຮງງານ.
ສຳລັບຜູ້ທີ່ເຮັດວຽກໃນເວລາກາງເວັນແມ່ນເຮັດວຽກມື້ໜຶ່ງ 8 ຊົ່ວໂມງ ຕາມກົດໝາຍຜູ້ອອກແຮງງານຕ້ອງມີວັນພັກຢ່າງໜ້ອຍອາທິດລ່ະ 1 ມື້ ແລະ ມີສິດພັກໃນວັນພັກລັດຖະການ ລວມການເຮັດວຽກເພີ່ມໂມງທີ່ລະບຸໄວ້ໃນມາດຕາ 53 ຊຶ່ງຊົ່ວໂມງໃນການເຮັດວຽກລ່ວງເວລາເດືອນໜຶ່ງບໍ່ໃຫ້ເກີນ 45 ຊົ່ວໂມງ ຫຼື ມື້ໜຶ່ງບໍ່ໃຫ້ເກີນ 3 ຊົ່ວໂມງ ແຕ່ບໍ່ໃຫ້ເຮັດວຽກເພີ່ມເກີນໂມງຕິດຕໍ່ກັນ 4 ວັນ ຍົກເວັ້ນກໍລະນີມີເຫດສຸກເສີນ ໃນການເຮັດວຽກເພີ່ມແຕ່ລະຄັ້ງນາຍຈ້າງຕ້ອງແຈ້ງລ່ວງໜ້າ ພ້ອມຕ້ອງຈ່າຍຄ່າແຮງງານເພີ່ມໂມງຕາມທີ່ໄດ້ກຳນົດໄວ້ໃນກົດໝາຍ.
ຄ່າແຮງງານ ຫຼື ຊົ່ວໂມງການເຮັດວຽກຂອງທັງສອງເວລານີ້ ຫຼື ການໄດ້ຮັບສະຫວັດດີການ ຫຼື ນະໂຍບາຍຕ່າງໆຍັງມີຄວາມຫຼຸດໂຕນກັນຢ່າງຊັດເຈນ ແລະ ນີ້ກໍເປັນອີກໜຶ່ງປະເດັນທີ່ຄວນໄດ້ຮັບການພິຈາລະນາຄືນຈາກພາກສ່ວນທີ່ກ່ຽວຂ້ອງ.
ໂດຍ: ບຸດສະດີ ສາຍນໍ້າມັດ