ບໍລິສັດ ດວງປະເສີດກໍ່ສ້າງຂົວທາງ ຈຳກັດ ໄດ້ເຊັນສັນຍາສຳປະທານທີ່ດິນເດີ່ນທາດຫຼວງ ຢູ່ບ້ານທາດຫຼວງ ເມືອງ
ຫຼວງພະບາງ ແຂວງຫຼວງພະບາງ ເພື່ອພັດທະນາເປັນສວນສາທາລະນະ ຮັບໃຊ້ກິດຈະກຳຕ່າງໆ ຄາດໃຊ້ເວລາກໍ່ສ້າງ
2 ປີໃຫ້ສຳເລັດ, ຊຶ່ງມີມູນຄ່າການກໍ່ສ້າງທັງໝົດ 3 ລ້ານໂດລາສະຫະລັດ, ໃນໄລຍະສຳປະທານ 30 ປີ.
ທ່ານ ນາງ ສີລິພອນ ສຸພັນທອງ ຮອງຫົວຫນ້າແຜນການ ແລະ ການລົງທຶນ ແຂວງຫຼວງພະບາງໄດ້ໃຫ້ຮູ້ວ່າ: ເພື່ອແນ
ໃສ່ແຜນພັດທະນາເສດຖະກິດ-ສັງຄົມຂອງແຂວງຫຼວງພະບາງ ເພີ່ມ ສິ່ງຮອງຮັບ ແລະ ອຳນວຍຄວາມສະດວກໃນ
ການບໍລິການໃຫ້ແກ່ສັງຄົມ ກໍຄືຂະແໜງການທ່ອງທ່ຽວ ທັງເປັນການພັດທະນາທີ່ດິນຂອງລັດກໍຄືເດີ່ນທາດຫຼວງໃຫ້
ເກີດປະໂຫຍດສູງສຸດ ສະນັ້ນທາງພະແນກແຜນການ ແລະ ການລົງທຶນແຂວງຫຼວງພະບາງຈິ່ງໄດ້ໃຫ້ ບໍລິສັດ ດວງປະ
ເສີດ ເຊັນສັນຍາສຳປະທານ ເປັນເວລາ 30 ປີ ນັບແຕ່ວັນທີ 6 ຕຸລາ 2014 ຫາ ວັນທີ 5 ຕຸລາ 2044, ມີເນື້ອທີ່ທັງຫມົດ
48.620 ຕາແມັດ, ລວມມູນຄ່າການລົງທຶນແມ່ນ 3 ລ້ານໂດລາສະຫະລັດ, ເປັນການລົງທຶນພາຍໃນ 100%, ຄາດໃຊ້ເວ
ລາກໍ່ສ້າງ 2 ປີໃຫ້ສຳເລັດ.
ເມື່ອສ້າງສຳເລັດຈະກາຍເປັນສະຖານທີ່ຮອງຮັບ ການວາງສະແດງສິລະປະວັດທະນະທຳລາວ, ຮ້ານອາຫານ, ບ່ອນຈັດ
ງານລ້ຽງຕ່າງໆ, ຕະຫຼາດກາງຄືນ, ສວນສາທາລະນະ, ມີສວນຫຍ້າ ແລະ ຜາມໄຊເພື່ອຈັດກິດຈະກຳຕ່າງໆ ຊຶ່ງຄ່າສຳປະ
ທານທຸກໆ 5 ປີໃດຈະເພີ່ມຂຶ້ນ 5% ລວມ 30 ປີ ຜູ້ລົງທຶນຈະ ໄດ້ຈ່າຍໃຫ້ທາງແຂວງແມ່ນ 447.650 ໂດລາສະຫະລັດຕໍ່ປີ,
ພ້ອມນັ້ນຍັງຈະໄດ້ສະໜັບສະໜູນທາງພາກລັດ ກ່ຽວກັບການຈັດງານບຸນຕ່າງໆເປັນຕົ້ນແມ່ນບຸນປີໃໝ່ລາວ, ບຸນ
ຊ່ວງເຮືອປະຈຳປີ ແລະ ບຸນອອກພັນສາ ທາງຜູ້ລົງທຶນຈະໄດ້ຈ່າຍແມ່ນ 740 ລ້ານກີບຕໍ່ປີ (ເງິນຈຳນວນດັ່ງກ່າວແມ່ນ
ຈະມອບກ່ອນງານບຸນຢ່າງນ້ອຍ 15 ວັນ) ພ້ອມນັ້ນຍັງມີນະໂຍບາຍການລົງທຶນ ຍົກເວັ້ນອາກອນກຳໄລເປັນເວລາ 2 ປີ.
ພິທີເຊັນສັນຍາແມ່ນໄດ້ຈັດຂຶ້ນໃນວັນທີ 6 ຕຸລາຜ່ານມານີ້ ຢູ່ທີ່ຫ້ອງປະຊຸມຂອງໂຮງແຮມຫຼວງພະບາງວິວ ຕາງໜ້າ
ຝ່າຍອຳນາດການປົກຄອງແຂວງ ເຊັນແມ່ນ ທ່ານ ນາງ ສີລິພອນ ສຸພັນທອງ ຮອງຫົວຫນ້າພະແນກແຜນການ ແລະ
ການລົງທຶນ ແຂວງຫຼວງພະບາງ ກັບ ທ່ານ ບຸນທ່ຽງ ດວງປະເສີດ ປະທານບໍລິສັດດວງປະເສີດ ກໍ່ສ້າງຂົວທາງ ຈຳກັດ,
ໃຫ້ກຽດເຂົ້າຮ່ວມເປັນສັກຂີພິຍານຂອງ ທ່ານ ດຣ. ຄຳແພງ ໄຊສົມແພງ ເຈົ້າແຂວງໆຫຼວງພະບາງ, ມີບັນດາຫົວໜ້າ
ພະແນກການທີ່ກ່ຽວຂ້ອງພ້ອມດ້ວຍນັກວິຊາການຂອງບໍລິສັດເຂົ້າຮ່ວມ.
ແຫລ່ງຂ່າວ: ເສດຖະກິດ – ສັງຄົມ