ເມື່ອວັນທີ 5 ມິຖຸນາຜ່ານມາ ທ່ານ ກຽດຕິຄຸນ ຊາດປະເສີດ ເອກອັກຄະຣາຊະທູດໄທປະຈຳ ສປປ ລາວ ພ້ອມພັນລະຍາ ໄດ້ເຂົ້າຮ່ວມພິທີເປີດໂຄງການບໍລິການທັນຕະກຳເພື່ອຖວາຍແດ່ພຣະສົງ ແລະ ສາມະເນນ ເນື່ອງໃນໂອກາດພຣະຣາຊະພິທີບໍຣົມຣາຊາພິເສກ ພຸດທະສັກກະລາດ 2562 ແລະ ວັນສະເຫຼີມພະຊົນມະພັນສາສົມເດັດພະນາງເຈົ້າພຣະບໍຣົມຣາຊິນີ ປະຈຳປີພຸດທະສັກກະລາດ 2562 ຊຶ່ງຈັດຂຶ້ນທີ່ວັດອົງຕື້ມະຫາວິຫານ ນະຄອນຫຼວງວຽງຈັນ.
ໂດຍມີຜູ້ຊ່ຽວຊານຈາກປະເທດກໍຄື ຜູ້ຊ່ວຍສາສະດາຈານທັນຕະແພດ ດຣ ສຸສິດ ພູນທອງ ຄະນະບໍດີທັນຕະແພດສາດ ຈຸລາລົງກອນມະຫາວິທະຍາໄລ ແລະ ຝ່າຍລາວມີພຣະອາຈານໃຫຍ່ ປອ ພວງປະເສີດ ພູມມາວົງ ຜູ້ອຳນວຍການວິທະຍາໄລສົງ ແລະ ເຈົ້າອາວາດວັດອົງຕື້ ມີຮອງສາສະດາຈານ ດຣ ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ ທ່ານ ຈັນທະວົງ ແສນອາມາດມົນຕີ ຮອງປະທານສູນກາງແນວລາວສ້າງຊາດ ທ່ານ ນາງ ບົວລອນ ວົງດາລາແສນ ເຈົ້າເມືອງຈັນທະບູລີ ທ່ານ ນາງ ສີສະຫຼຽວ ທຳມະເທວາ ປະທານມູນນິທິຊ່ວຍເຫຼືອຄົນທຸກຍາກແຫ່ງ ສປປ ລາວ ທ່ານ ນາງ ປ້າພູທອນ ພູມສະຫວັນ ຄະນະບໍລິຫານງານມູນນິທິຊ່ວຍເຫຼືອຄົນທຸກຍາກແຫ່ງ ສປປ ລາວ ທ່ານນາງ ປອ ວິພາວັນ ພົມວິຫານ ພັນລະຍາປະທານສູນກາງແນວລາວສ້າງຊາດ ທ່ານ ບຸນທະວີ ພອນທະສິນ ຮອງຫົວໜ້າກົມສາສະໜາສູນກາງແນວລາວສ້າງຊາດ ທ່ານ ສຸລິລັກ ສຸລິນທອນ ຮອງຫົວໜ້າກົມອາຊີ-ປາຊີຟິກ ແລະ ອາຟຣິກາ ກະຊວງການຕ່າງປະເທດ ທ່ານ ດຣ ບຸນຍົງ ສີດາພອນ ຄະນະບໍດີທັນຕະແພດສາດ ມະຫາວິທະຍາໄລວິທະຍາສາດສຸຂະພາບກໍໄດ້ໃຫ້ກຽດເຂົ້າຮ່ວມ.
ໂຄງການດັ່ງກ່າວເປັນການຮ່ວມມືລະຫວ່າງສະຖານເອກອັກຄະຣາຊະທູດໄທປະຈຳ ສປປ ລາວ ຄະນະທັນຕະແພດສາດ ຈຸລາລົງກອນມະຫາວິທະຍາໄລ ແລະ ວິທະຍາໄລອົງຕື້ ວັດອົງຕື້ມະຫາວິຫານ ໂດຍການອອກໜ່ວຍທັນຕະກຳເຄື່ອນທີ່ຂອງຄະນະທັນຕະ ແພດ ແລະ ເຈົ້າໜ້າທີ່ຈາກຄະນະທັນຕະແພດສາດ ຈຸລາລົງກອນມະຫາວິທະຍາໄລ ລວມ 70 ທ່ານ ໂຄງການດັ່ງກ່າວຈັດຂຶ້ນລະຫວ່າງວັນທີ 5-6 ມິຖຸນາ 2652 ທີ່ວັດອົງຕື້ມະຫາວິຫານ ເພື່ອໃຫ້ບໍລິການແດ່ພຣະສົງ ແລະ ສາມະເນນ ລວມ 999 ອົງ ໂດຍໄດ້ຮັບການສະໜັບສະໜູນຈາກພາກເອກກະຊົນໄທ ລາວ ແລະ ຜູ້ມີຈິດສັດທາຊາວໄທໃນ ສປປ ລາວ.
ໂດຍ: ສະຫະລັດ ວອນທິວົງໄຊ