ລັດຖະບານຍີ່ປຸ່ນກຽມສະເໜີໃຫ້ພາກທຸລະກິດຍົກເລີກອາຍຸກະສຽນ ແລະ ເປີດຊ່ອງທາງໃຫ້ບຸກຄົນທົ່ວໄປສາມາດເຮັດວຽກໄດ້ຈົນເຖິງອາຍຸ 70 ປີ ເພື່ອແກ້ໄຂບັນຫາຂາດແຄນແຮງງານ ແລະ ພາລະດ້ານສະຫວັດດີການສັງຄົມ.
ປັດຈຸບັນ ຫຼາຍໆບໍລິສັດໃນຍີ່ປຸ່ນສາມາດໃຫ້ພະນັກງານທີ່ຕ້ອງການເຮັດວຽກຕໍ່ເນື່ອງໄດ້ຈົນເຖິງອາຍຸ 65 ປີ ແຕ່ລັດຖະບານຍີ່ປຸ່ນມີແຜນກຽມຊຸກຍູ້ໂດຍຈະສະເໜີກົດໝາຍໃໝ່ເພື່ອໃຫ້ຂະຫຍາຍອາຍຸກະສຽນຂອງຄົນເຮັດວຽກຈາກ 65 ປີເປັນ 70 ປີ ແລະ ມີທ່າອຽງວ່າຈະເປັນມາດຕະການບັງຄັບທີ່ຕ້ອງປະຕິບັດຕາມ.
ທັງນີ້ ແຜນການຂອງລັດຖະບານຍີ່ປຸ່ນຈະເປີດຊ່ອງທາງໃຫ້ພະນັກງານ ແລະ ຜູ້ບໍລິຫານຕົກລົງຮ່ວມກັນວ່າຈະເຮັດວຽກຕໍ່ໄປຈົນເຖິງອາຍຸເທົ່າໃດ? ຊຶ່ງຫາກທາງບໍລິສັດບໍ່ປະສົງຈະໃຫ້ເຮັດວຽກຕໍ່ພະນັກງານສູງໄວກໍສາມາດໄປເຮັດວຽກຢູ່ບໍລິສັດອື່ນໄດ້ ຂະນະທີ່ ທ່ານ ຊິນໂຊ ອາເບະ ນາຍົກລັດຖະມົນຕີຂອງຍີ່ປຸ່ນກໍໄດ້ກ່າວວ່າ ຕົນເອງຄາດຫວັງໄວ້ວ່າຜູ້ອາຍຸສູງເຫຼົ່ານີ້ຈະນຳໃຊ້ຄວາມຮູ້ ແລະ ປະສົບການເພື່ອໃຫ້ເກີດປະໂຫຍດສູງທຸດທັງຕໍ່ຕົນເອງ ແລະ ສ່ວນລວມ.
ຂະນະທີ່ພາວະຂາດແຄນແຮງງານ ແລະ ງົບປະມານດ້ານສະຫວັດດີການສັງຄົມທີ່ພວມຫຼຸດລົງໄດ້ເຮັດໃຫ້ຜູ້ອາຍຸສູງຈຳນວນຫຼາຍໃນຍີ່ປຸ່ນກັບມາເຮັດວຽກໃນຊ່ວງອາຍຸສູງ ແຕ່ກໍມີຫຼາຍບໍລິສັດທີ່ບໍ່ຕ້ອງການຈ່າຍຄ່າແຮງງານທີ່ເພີ່ມຂຶ້ນຕາມອາຍຸການເຮັດວຽກ ຊຶ່ງວຽກສ່ວນໃຫຍ່ທີ່ຜູ້ອາຍຸສູງເຮັດຈຶ່ງຖືເປັນວຽກທີ່ໄດ້ຄ່າຕອບແທນບໍ່ສູງເຊັ່ນ ຮັກສາຄວາມປອດໄພ ດູແລສະຖານທີ່ພັກອາໄສ ຫຼື ພະນັກງານບໍລິການໃນຮ້ານຕ່າງໆ.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: mgronline.com