ກົມອຸຕຸນິຍົມ ແລະ ອຸທົກກະສາດປະກາດເຕືອນນັບແຕ່ວັນທີ 5-7 ມິຖຸນາ 2019 ຈະມີຝົນຕົກໃນລະດັບຄ່ອຍເຖິງປານກາງເປັນບໍລິເວນກວ້າງ ແລະ ຈະຕົກໜັກໃນບາງພື້ນທີ່ ພ້ອມທັງມີລົມພັດແຮງໃນຕອນທ່ຽງຫາຕອນຄ່ຳໃນບາງພື້ນທີ່ທົ່ວປະເທດ ບວກກັບກະແສລົມຕາເວັນຕົກສຽງໃຕ້ທີ່ມີກຳລັງແຮງເພີ່ມຂຶ້ນ ຊຶ່ງຈະສົ່ງຜົນໃຫ້ມີຝົນຕົກ ຟ້າຮ້ອງ ແລະ ຟ້າເຫຼື້ອມ.
ພາກເໜືອດ້ານຕາເວັນອອກ ໃນຊ່ວງວັນທີ 5-7 ມິຖຸນາ 2019 ຈະມີຝົນຕົກໃນລະດັບຄ່ອຍເຖິງປານກາງ ພ້ອມກັບມີລົມພັດແຮງຢູ່ບາງທ້ງຖິ່ນຂອງແຂວງຜົ້ງສາລີ ຫົວພັນ ແລະ ຊຽງຂວາງ ຊຶ່ງຈະສົ່ງຜົນໃຫ້ອາກາດເຢັນໃນຕອນກາງຄືນຫາຕອນເຊົ້າ ແລະ ຈະຮ້ອນໃນຊ່ວງຕອນບ່າຍ ພ້ອມນີ້ ກໍຈະມີຝົນຕົກ ຟ້າຮ້ອງ ຟ້າເຫຼື້ອມໃນລະດັບຄ່ອຍຫາປານກາງ ແລະ ຈະມີລົມພັດແຮງຢູ່ບາງເຂດຂອງແຂວງຊຽງຂວາງ ຂະນະທີ່ອຸນຫະພູມຕ່ຳສຸດຢູ່ທີ່ 16-23 ອົງສາ ແລະ ສູງສຸດຢູ່ທີ່ 28-30 ອົງສາ.
ພາກເໜືອດ້ານຕາເວັນຕົກ ຈະມີຝົນຕົກ ຟ້າຮ້ອງ ຟ້າເຫຼື້ອມໃນລະດັບຄ່ອຍຫາປານກາງ ແລະ ຈະມີລົມພັດແຮງຢູ່ບາງທ້ອງຖິ່ນ.
ພາກກາງ ຈະມີຝົນຕົກລະດັບຄ່ອຍຫາປານກາງ ສະເພາະຢູ່ແຂວງໄຊສົມບູນ ຫຼັກ 20 ເມືອງວຽງທອງ ແລະ ເມືອງນາກາຍ ພ້ອມນີ້ ອາກາດກໍຈະຮ້ອນໃນຊ່ວງບ່າຍ ແລະ ຈະມີຝົນຕົກລະດັບຄ່ອຍຫາປານກາງເປັນບໍລິເວນກວ້າງ ລວມທັງມີລົມພັດແຮງຢູ່ບາງທ້ອງຖິ່ນ.
ພາກໃຕ້ ຝົນຍັງສືບຕໍ່ຕົກເປັນບໍລິເວນກວ້າງ ພ້ອມກັບມີລົມພັດແຮງຢູ່ບາງເຂດຂອງແຂວງສາລະວັນ ເຊກອງ ຈຳປາສັກ ແລະ ອັດຕະປື.
ສະເພາະເຂດພູພຽງບໍລະເວນ ອາກາດຈະເຢັນໃນຊ່ວງຕອນເຊົ້າ ມີຝົນຕົກໃນລະດັບຄ່ອຍຫາປານກາງຢູ່ຫຼາຍເຂດ ແລະ ມີລົມພັດແຮງຢູ່ບາງທ້ອງຖິ່ນ.
ນະຄອນຫຼວງວຽງຈັນ ຈະມີຝົນຕົກ ຟ້າຮ້ອງ ຟ້າເຫຼື້ອມຍ້ອນກະແສລົມຕາເວັນຕົກສຽງໃຕ້ມີກຳລັງແຮງ.
ຂໍ້ມູນ: ກົມອຸຕຸນິຍົມ ແລະ ອຸທົກກະສາດ