ປັດຈຸບັນ ນົມພ້ອມດື່ມທີ່ວາງຂາຍຕາມທ້ອງຕະຫຼາດມີຫຼາຍແບບຫຼາຍຊະນິດໃຫ້ເລືອກ ແຕ່ຮູ້ ຫຼື ບໍ່ວ່າຄວນຈະເລືອກດື່ມນົມແບບຈຶ່ງຈະໄດ້ປະໂຫຍດ ແລະ ເໝາະສົມກັບຊ່ວງອາຍຸຂອງແຕ່ລະຄົນ.
ນົມຖືເປັນແຫຼ່ງລວມຂອງສານອາຫານຈາກທຳມະຊາດທີ່ມີຄຸນຄ່າທາງໂພຊະນາການສູງ ສຳລັບເດັກທີ່ຢູ່ໃນໄວຈະເລີນເຕີບໂຕ ແລະ ໄວໜຸ່ມສາວປະລິມານທີ່ຄວນດື່ມກໍຄື 2-3 ຈອກຕໍ່ວັນ ສ່ວນຜູ້ໃຫຍ່ແມ່ນ 1-2 ຈອກ.
ນົມສົດ 100% (whole milk) ຄືນົມທີ່ໄດ້ຈາກແມ່ງົວ ແລະ ຈຳໜ່າຍໂດຍກົງໃຫ້ຜູ້ບໍລິໂພກ ໂດຍຈະຜ່ານວິທີການພາສເຈີໄຣ ຫຼື ອຸ່ນທຳລາຍເຊື້ອພະຍາດກ່ອນ ຊຶ່ງນົມຊະນິດນີ້ຈະມີໄຂມັນຢູ່ໃນລະດັບ 3,8% ຈຶ່ງເຮັດໃຫ້ລົດຊາດເຂັ້ມຂຸ້ນ ແລະ ຫອມມັນ ທັງເປັນແຫຼ່ງຂອງສານອາຫານສົມບູນ ເໝາະກັບເດັກທີ່ຢູ່ໃນຊ່ວງຈະເລີນເຕີບໂຕ ເນື່ອງຈາກມີປະລິມານແຄລຊຽມເຖິງ 200-300 ມິລິກຣາມຕໍ່ຈອກ.
ສຳລັບນົມໄຂມັນຕ່ຳ (Low Fat) ເປັນນົມທີ່ສະກັດໄຂມັນອອກໄປບາງສ່ວນເຮັດໃຫ້ມີພະລັງງານຕ່ຳລົງ ແລະ ມີປະລິມານໄຂມັນພຽງເລັກນ້ອຍ ແຕ່ຂໍ້ເສຍກໍຄື ໄຂມັນທີ່ໜ້ອຍລົງກໍຈະໄປຫຼຸດການໄດ້ຮັບວິຕາມິນທີ່ລະລາຍໃນໄຂມັນຊຶ່ງປະກອບມີ ວິຕາມິນ A D E ແລະ K ຢ່າງໃດກໍຕາມ ນົມຊະນິດນີ້ຍັງມີໂປຣຕີນ ແລະ ແຄລຊຽມໃນປະລິມານທີ່ໃກ້ຄຽງກັບນົມສົດ ຊຶ່ງເໝາະສຳລັບຜູ້ທີ່ມີອາຍຸ 25 ປີຂຶ້ນໄປ ແລະ ຜູ້ທີ່ຕ້ອງການຫຼຸດນ້ຳໜັກ ຫຼື ຜູ້ທີ່ມີໄຂມັນໃນເລືອດສູງ ລວມເຖິງຄົນທີ່ຮັບປະທານໄຂມັນບໍ່ໄດ້ແຕ່ຕ້ອງການເສີມໂປຣຕີນ ແລະ ແຄລຊຽມ ແຕ່ບໍ່ເໝາະສົມລັບເດັກອາຍຸຕ່ຳກວ່າ 2 ປີ.
ສຳລັບນົມຊະນິດ Fat Free ຫຼື Skim milk ເປັນນົມທີ່ແຍກໄຂມັນອອກເຫຼືອສະເພາະໂປຣຕີນ ແລະ ຄາໂບໄຮເດຣດ ມີໄຂມັນຕ່ຳກວ່າ 0,15% ມີແຄລຊຽມ ແລະ ໂປຣຕີນສູງ ສ່ວນວິຕາມິນ ແລະ ແຮ່ທາດຕ່າງໆກໍຍັງມີຢູ່ໃນປະລິມານທີ່ແຕກຕ່າງກັບນົມສົດ 100% ນົມຊະນິດນີ້ເໝາະສຳລັບຄົນທີ່ຕ້ອງການຫຼີກເວັ້ນໄຂມັນ ຄົນທີ່ຄວບຄຸມນ້ຳໜັກ ແລະ ຄົນທີ່ມີລະດັບໄຂມັນໃນເລືອດສູງ.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: freepik