ປະທານາທິບໍດີແຕ່ງຕັ້ງນາຍົກຄົນໃໝ່ຊຶ່ງເປັນເພດຍິງຄົນທຳອິດຂອງອອສເຕຣຍ ໂດຍມີໜ້າທີ່ດູແລລັດຖະບານຊົ່ວຄາວຈົນກວ່າຈະມີການເລືອກຕັ້ງໃໝ່.
ລາຍງານຂ່າວຕ່າງປະເທດເມື່ອວັນທີ 30 ພຶດສະພາຜ່ານມາໃຫ້ຮູ້ວ່າ ປະທານາທິບໍດີ ອາເລັກຊານເດີຣ ຟານເດີຣ ແຫ່ງປະເທດອອສເຕຣຍໄດ້ປະກາດແຕ່ງຕັ້ງໃຫ້ ທ່ານ ນາງ ບຣິກິຕເທີ ເບຍເລນ ປະທານສານລັດຖະທຳມະນູນເປັນນາຍົກລັດຖະມົນຕີຄົນໃໝ່ຂອງປະເທດ ຫຼັງຈາກທີ່ ທ່ານ ເຊບາສຕຽນ ຄຣູຊ ແພ້ຄະແນນໂຫວດບໍ່ໄວ້ວາງໃຈໃນສະພາ ແລະ ຖືກປົດອອກຈາກຕຳແໜ່ງພ້ອມຄະນະລັດຖະມົນຕີ.
ທັງນີ້ ທ່ານ ນາງ ເບຍເລນ ໃນໄວ 69 ປີກາຍເປັນຜູ້ນຳລັດຖະບານຊົ່ວຄາວຂອງອອສເຕຣຍ ຊຶ່ງທ່ານນາງຈະດຳລົງຕຳແໜ່ງໄປຈົນກວ່າຈະມີການເລືອກຕັ້ງໃໝ່ ຊຶ່ງຄາດຄະເນ ວ່າຈະເກີດຂຶ້ນໃນເດືອນກັນຍາທີ່ຈະເຖິງນີ້.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: ໄທຣັດ