ສ້າງຄວາມເຂັ້ມແຂງ ແລະ ເຂົ້າໃຈດ້ານກົດໝາຍທີ່ກ່ຽວຂ້ອງ ແລະ ການມີສ່ວນຮ່ວມໃນຂະບວນການຍຸຕິທໍາ ການຕ້ານການຄ້າມະນຸດດ້ານແຮງງານໃຫ້ແກ່ພະນັກງານຂະແໜງແຮງງານ ເຈົ້າໜ້າທີ່ຕໍາຫຼວດສະກັດກັ້ນ ການຕ້ານການຄ້າມະນຸດ ໃນການປົກ ປ້ອງ ແລະ ການສືບສວນການຄ້າມະນຸດ ແລະ ການປັບປຸງການປະສານງານຮ່ວມກັບຜູ້ບັງຄັບໃຊ້ກົດໝາຍອາຍາໃນອາຊຽນ.
ໂດຍການເປັນປະທານຂອງ ທ່ານ ພົງໄຊສັກ ອິນຖາລາດ ຫົວໜ້າກົມຄຸ້ມຄອງແຮງງານ ກະຊວງແຮງງານ ແລະ ສະຫວັດດີການສັງຄົມ ທັງເປັນຫົວໜ້າໜ່ວຍງານເຈົ້າໜ້າທີ່ອາວຸໂສແຮງງານອາຊຽນຂອງ ສປປ ລາວ ໂດຍໄດ້ຮັບການສະໜັບສະໜູນດ້ານງົບປະມານຈາກລັດຖະບານອົດສະຕຣາລີຜ່ານມູນນິທິກອງທຶນອາຊີ ແລະ ໄດ້ຮັບການສະໜັບສະໜູນດ້ານວິຊາການຈາກອົງການແຮງງານສາກົນ ໜ່ວຍງານສະກັດກັ້ນການຕ້ານການຄ້າມະນຸດອົດສະຕຣາລີ ອາຊຽນ ແລະ ກອງເລຂາອາຊຽນ ກອງປະຊຸມດັ່ງກ່າວຈັດຂຶ້ນລະຫວ່າງວັນທີ 27-28 ພຶດສະພາ 2019 ທີ່ນະຄອນຫຼວງພຣະບາງ ສປປ ລາວ.
ກອງປະຊຸມຄັ້ງນີ້ແມ່ນ ສປປ ລາວ ເປັນເຈົ້າພາບພາຍໃຕ້ແຜນງານຄະນະກຳມະການປົກປ້ອງ ແລະ ສົ່ງເສີມສິດທິແຮງງານເຄື່ອນຍ້າຍອາຊຽນ (ACMW) ໄລຍະແຕ່ປີ 2016-2020 ໂດຍມີຈຸດປະສົງເພື່ອສ້າງຄວາມຮັບຮູ້ ແລະ ເຂົ້າໃຈດ້ານກົດໝາຍທີ່ກ່ຽວ ຂ້ອງ ແລະ ການມີສ່ວນຮ່ວມໃນຂະບວນການຍຸຕິທໍາ ການຕ້ານການຄ້າມະນຸດດ້ານແຮງງານ ສ້າງຄວາມເຂັ້ມແຂງໃຫ້ເຈົ້າໜ້າທີ່ ກວດກາແຮງງານໃນການປົກປ້ອງ ແລະ ສືບສວນການລະເມີດສິດທິດ້ານແຮງງານ ແລະ ອໍານວຍຄວາມສະດວກການປະສານງານ ແລະ ການຮ່ວມມືໃຫ້ມີປະສິດທິພາບຍິ່ງຂຶ້ນ ທັງໃຫ້ເຂົາເຈົ້າໄດ້ເຂົ້າໃຈເຖິງນິຍາມຂອງສາກົນ ແລະ ພາກພື້ນກ່ຽວກັບແຮງງານຖືກບັງຄັບ ແລະ ການຄ້າມະນຸດ ເພື່ອກໍານົດຂໍ້ແນະນໍາກ່ຽວກັບການປະສານງານ ແລະ ການຮ່ວມມືລະຫວ່າງໜ່ວຍງານກວດກາແຮງງານ ໜ່ວຍງານສ້າງລະບຽບການຄຸ້ມຄອງ ບໍສິສັດຈັດຫາງານ ແລະ ໜ່ວຍງານສະກັດກັ້ນ ແລະ ຕ້ານການຄ້າມະນຸດ.
ໂດຍ: ສະຫະລັດ ວອນທິວົງໄຊ