ໄຂຂຶ້ນຢ່າງເປັນທາງການເມື່ອວັນທີ 25 ພຶດສະພາຜ່ານມາ ສຳລັບງານປະເພນີ “ບຸນລາວ” ປະຈຳປີ 2019 ໄດ້ຈັດຂຶ້ນທີ່ນະຄອນຫຼວງໂຕກຽວ ປະເທດຍີ່ປຸ່ນ ເພື່ອເປັນການເສີມສ້າງສາຍພົວພັນມິດຕະພາບລະຫວ່າງສອງປະເທດ ລາວ-ຍີ່ປຸ່ນ.
ໂດຍມີທ່ານ ບໍ່ແສງຄຳ ວົງດາລາ ລັດຖະມົນຕີກະຊວງຖະແຫລງຂ່າວ ວັດທະນະທຳ ແລະ ທ່ອງທ່ຽວ ພ້ອມດ້ວຍຄະນະ ທ່ານ ວິໂຣດ ສູນດາລາ ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສປປ ລາວ ປະຈຳປະເທດຍີ່ປຸ່ນ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ໂອກາດດັ່ງກ່າວ ທ່ານ ບໍ່ແສງຄຳ ກໍໄດ້ກ່າວວ່າ ງານບຸນລາວໄດ້ເລີ່ມຈັດມາເປັນເວລາເກືອບ 10 ປີແລ້ວ (ນັບແຕ່ປີ 2007 ເປັນຕົ້ນມາ) ເປັນບຸນເທສະການປະຈຳປີທີ່ຕິດພັນກັບວັດທະນະທຳທີ່ຊາວຍີ່ປຸ່ນຮັບຮູ້ຢ່າງກວ້າງຂວາງ ໂດຍສະເພາະແມ່ນຊາວນະຄອນ ຫຼວງໂຕກຽວ ທັງເປັນກິດຈະກຳໜຶ່ງທີ່ປະກອບສ່ວນອັນສຳຄັນເຂົ້າໃນການເສີມສ້າງສາຍພົວພັນມິດຕະພາບລະຫວ່າງສອງປະເທດ ລາວ-ຍີ່ປຸ່ນ ຍີ່ປຸ່ນ-ລາວ ໃຫ້ນັບມື້ແໜ້ນແຟ້ນ ພ້ອມທັງສ້າງຄວາມເຂົ້າໃຈຊຶ່ງກັນ ແລະ ກັນ ລະຫວ່າງປະຊາຊົນສອງຊາດຜ່ານການສະແດງສິລະປະວັດທະນະທໍາຫຼາກຫຼາຍຮູບແບບຂອງລາວ ແລະ ຍີ່ປຸ່ນ ລວມເຖິງການຮ່ວມມືທີ່ເປັນມູນເຊື້ອມາແຕ່ດົນນານ.
ພາຍໃນງານບຸນດັ່ງກ່າວ ມີລາຍການສະແດງສິລະປະແບບປະສົມປະສານກັບກິດຈະກຳທີ່ສ່ອງແສງໃຫ້ເຫັນເຖິງຮີດຄອງປະເພນີທີ່ໜ້າສົນໃຈໃນຮູບແບບແຕກຕ່າງກັນ ທັງນີ້ ກໍມີຫ້ອງວາງສະແດງ ແລະ ສອບຖາມກ່ຽວກັບການທ່ອງທ່ຽວ ບູ໊ດອາຫານ ເຄື່ອງດື່ມລາວ ແລະ ຂອງທີ່ລະນຶກຕ່າງໆ.
ຄຽງຄູກັບການຈັດງານບຸນລາວໃນຄັ້ງນີ້ ຍັງໄດ້ຈັດກອງປະຊຸມດ້ານວິຊາການຊຶ່ງຈັດຂຶ້ນຢູ່ທີ່ສູນອາຊຽນ-ຍີ່ປຸ່ນ ເພື່ອໂຄສະນາການທ່ອງທ່ຽວລາວໃຫ້ປະຊາຊົນຍີ່ປຸ່ນສາມາດຮັບຮູ້ ແລະ ເຂົ້າໃຈກ່ຽວກັບປະເທດລາວໃນຫຼາກຫຼາຍຮູບແບບ ແລະ ໃຫ້ເລິກເຊິ່ງ.
ຂ່າວ: ສະຫະລັດ ວອນທິວົງໄຊ