ປະທານາທິບໍດີ ໂດນັລ ທຣັມ ແຫ່ງສະຫະລັດອາເມຣິກາໄດ້ອອກມາກ່າວເຖິງບັນຫາທີ່ມີຄວາມຍືດເຍື້ອກັບຮົວເຫວີຍ ທີ່ເຄີຍກ່າວວ່າຮົວເຫວີຍເປັນອັນຕະລາຍຕໍ່ຄວາມໝັ້ນຄົງຂອງອາເມຣິກາ ທັງນີ້ ທຣັມ ກໍພ້ອມແລ້ວທີ່ຈະເຈລະຈາຂໍ້ຕົກລົງຕ່າງໆເພື່ອຢຸດຕິບັນ ຫາສົງຄາມການຄ້າລະຫວ່າງອາເມຣິກາ ແລະ ສປ ຈີນ ເປັນຄັ້ງທຳອິດ.
ຜູ້ນຳອາເມຣິກາກ່າວວ່າ ມີຄວາມເປັນໄປໄດ້ທີ່ວໍຊິງຕັນຈະບັນລຸຂໍ້ຕົກລົງກັບລັດຖະບານປັກກິ່ງເພື່ອຢຸດຕິທຸກກໍລະນີ ໂດຍສະເພາະທາງດ້ານການຄ້າທີ່ພວມທະວີຄວາມຮຸນແຮງ ແລະ ກໍມີຄວາມເປັນໄປໄດ້ທີ່ຮົວເຫວີຍອາດຈະລວມຢູ່ໃນຂໍ້ຕົກລົງທາງການຄ້າດັ່ງກ່າວ.
ທັງນີ້ ທັດສະນະຄະຕິຂອງ ທຣັມ ແມ່ນຂັດແຍ່ງໂດຍກົງກັບຄຳກ່າວຂອງລັດຖະມົນຕີຕ່າງປະເທດ ໄມ ປອມເປໂອ ຊຶ່ງໄດ້ອອກມາກ່າວບໍ່ເທົ່າໃດຊົ່ວໂມງກ່ອນທີ່ຈະເກີດປະເດັນເລື່ອງຮົວເຫວີຍກັບບັນຫາການຄ້າແມ່ນບໍ່ມີຄວາມເຊື່ອມໂຍກັນ ພ້ອມນີ້ ກໍໄດ້ກ່າວອີກວ່າ ທັງ 2 ປະເດັນທີ່ແຍກກັນກໍຄື ປະເດັນຄວາມໝັ້ນຄົງຂອງຊາດ ແລະ ຄວາມພະຍາຍາມສ້າງຄວາມສຳພັນທາງການຄ້າທີ່ຍຸຕິທຳ ແລະ ສົມດຸນລະຫວ່າງ 2 ປະເທດ ຊຶ່ງອາເມຣິກາມີຄວາມຈຳເປັນທີ່ຈະຕ້ອງປົກປ້ອງຄວາມໝັ້ນຄົງຂອງຊາດ ແລະຕ້ອງມີຄວາມໝັ້ນໃຈວ່າຈະມີກົດລະບຽບດ້ານການຄ້າທີ່ຖືກຕ້ອງ.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: nation