ຕອນເຊົ້າຂອງວັນທີ 23 ພຶດສະພາ 2019 ນີ້ ພົບສິ້ນສ່ວນເສດວັດຖຸອະວະກາດຂອງຈີນຕົກລົງຢູ່ 3 ພື້ນທີ່ໃນເຂດພາກໃຕ້ຄື ແຂວງ ຈຳປາສັກ ທີ່ບ້ານບຶງງາມ ເມືອງໂຂງ ຖືກບໍລິເວນດິນຂອງປະຊາຊົນ ແລະ ຕົກຢູ່ບ້ານທົ່ງເສັດ ເມືອງປາກຊ່ອງ ແຂວງຈຳປາສັກ ຖືກເຮືອນຂອງປະຊາຊົນ ນອກນີ້ ຍັງຕົກຢູ່ແຂວງສາລະວັນ ທີ່ເດີນໂຮງຮຽນບ້ານໜອງຕົມ ເມືອງເລົ່າງາມ ປັດຈຸບັນຍັງບໍ່ມີລາຍງານຜູ້ໄດ້ຮັບບາດເຈັບ ຫຼື ເສຍຊີວິດ.
ໂດຍອ້າງຈາກຂໍ້ມູນຂອງພາກສ່ວນກ່ຽວຂ້ອງເມືອງປາກຊ່ອງຊຶ່ງໄດ້ໃຫ້ຂໍ້ມູນບາງສ່ວນກັບລາວໂພສວ່າ ປັດຈຸບັນທາງພາກສ່ວນຮັບຊອບທາງເມືອງກຳລັງລົງຕິດຕາມເກັບກຳຂໍ້ມູນລາຍລະອຽດຕ່າງໆ ຊຶ່ງເບື້ອງຕົ້ນເສດວັດຖະອະວະກາດຂອງຈີນໄດ້ຕົກໃນເຂດເມືອງປາກຊ່ອງທັງໝົດ 7 ຈຸດ ໃນນັ້ນ 2 ຈຸດຕົກຖືກເຮືອນປະຊາຊົນທີ່ບ້ານທົ່ງເສັດ ແລະ ບ້ານຫຼັກ 5 ທົ່ງກະຕ່າຍ ແລະ ອີກ 5 ຈຸດ ແມ່ນຕົກໃສ່ດິນນາ-ດິນສວນຂອງປະຊາຊົນ ຂະນະທີ່ແຂວງສາລະວັນ ແລະ ຈຸດອື່ນໆທີ່ມີຂ່າວທາງເຈົ້າໜ້າທີ່ຮັບຜິດຊອບພວມລົງພື້ນທີ່ເພື່ອເກັບກຳຂໍ້ມູນ ຖ້າມີຄວາມຄືບໜ້າແນວໃດຈະແຈ້ງອອກສື່ຕາມພາຍຫຼັງ.
ຕໍ່ກັບເຫດການທີ່ເກີດຂຶ້ນກໍມີຫຼາຍຝ່າຍຕັ້ງຄຳຖາມຂຶ້ນມາວ່າ ສຳລັບຄວາມເສຍຫາຍທີ່ເກີດຂຶ້ນແມ່ນພາກສ່ວນໃດຈະຮັບຜິດ ຊອບ? ປັດຈຸບັນຍັງເປັນຄຳຖາມທີ່ບໍ່ມີຄຳຕອບ ແຕ່ຫວັງວ່າຈະມີໜ່ວຍງານ ຫຼື ພາກສ່ວນໃດໜຶ່ງທີ່ສາມາດໃຫ້ຄຳຕອບໃນເລື່ອງນີ້ໄດ້.
ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: ນັກຂ່່າວ ຖະແຫຼງຂ່າວ,ວັດທະນະທຳ ແລະ ທ່ອງທ່ຽວ ເມືອງປາກຊ່ອງ