ຊາວສະວິດເຊີແລນຫຼາຍກວ່າ 63% ເຫັນດີໃຫ້ລັດຖະບານປະຕິຮູບກົດໝາຍອາວຸດປືນໃຫ້ມີຄວາມເຂັ້ມງວດເພີ່ມຂຶ້ນຕາມແນວທາງຂອງສະຫະພາບເອີຣົບ ຊຶ່ງໄດ້ມີການລົງມະຕິເມື່ອວັນທີ 19 ພຶດສະພາຜ່ານມາໃນຫົວຂໍ້ຄຳຖາມກ່ຽວກັບການເພີ່ມຄວາມເຂັ້ມງວດໃຫ້ກັບກົດໝາຍອາວຸດປືນໃນປະເທດ.

ຊຶ່ງປາກົດວ່າມີປະຊາຊົນເຖິງ 63,7% ຈາກຈຳນວນຜູ້ໃຊ້ສິດປະມານ 1,5 ລ້ານຄົນສະໜັບສະໜູນໃຫ້ລັດຖະບານກາງປະຕິຮູບກົດໝາຍດັ່ງກ່າວ ທັງນີ້ ຄະແນນສຽງສະໜັບສະໜູນມີທັງໝົດ 25 ຈາກ 26 ລັດ ຍົກເວັ້ນລັດຕີຊີໂນ ຊຶ່ງຢູ່ທາງໃຕ້ສຸດ ແລະ ມີປະຊາກອນສ່ວນໃຫຍ່ໃຊ້ພາສາອີຕາລຽນ ຢ່າງໃດກໍຕາມ ການທີ່ມີຄະແນນສຽງເກີນ 2 ໃນ 3 ຂອງຈຳນວນລັດທັງໝົດໃນປະເທດຖືວ່າຜົນການລົງປະຊາມະຕິຄັ້ງນີ້ສົມບູນເປັນເອກະສັນ.

ປັດຈຸບັນ ສະວິດເຊີແລນມີປະຊາກອນປະມານ 8,5 ລ້ານຄົນ ແລະ 48% ຂອງຄົວເຮືອນໃນປະເທດມີອາວຸດປືນຢ່າງໜ້ອຍ 1 ກະບອກ ຂະນະທີ່ການລົງປະຊາມະຕິຖືເປັນຂະບວນການຕາມກົດໝາຍຂອງສະວິດເຊີແລນທີ່ປົກຄອງປະເທດດ້ວຍລະບອບປະຊາທິປະໄຕ ຊຶ່ງໃຫ້ສິດທິປະຊາຊົນເປັນຜູ້ພິຈາລະນາລິເລີ່ມນະໂຍບາຍຂອງລັດ.

ຮຽບຮຽງ: ສະຫະລັດ ວອນທິວົງໄຊ

ຮູບພາບ:AP,REUTERS