ກົມອຸຕຸນິຍົມ ແລະ ອຸທົກກະສາດຄາດຄະເນສະພາບອາກາດໃນລະຫວ່າງວັນທີ 25-31 ມີນາ 2019 ວ່າ ບໍລິເວນຄວາມກົດດັນອາກາດຕໍ່າຂອງອາກາດຮ້ອນທີ່ມີກຳລັງອ່ອນຫາປານກາງ ຍັງສືບຕໍ່ປົກຄຸມຢູ່ທົ່ວທຸກພາກຂອງປະເທດລາວ,​ ສົມທົບກັບກະແສລົມຕາເວັນຕົກ – ຕາເວັນຕົກສຽງໃຕ້ພັດປົກຄຸມເປັນສ່ວນໃຫຍ່, ເຊິ່ງຈະເຮັດໃຫ້ອາກາດໂດຍທົ່ວໄປ ຮ້ອນຂຶ້ນໃນຕອນບ່າຍຢູ່ໃນແຕ່ລະພາກ ແລະ ຈະມີຝົນຕົກຟ້າຮ້ອງ, ຟ້າເຫຼື້ອມ ໃນລະດັບຄ່ອຍ ແລະ ຕົກປານກາງ ພ້ອມມີລົມພັດແຮງຢູ່ເປັນບາງທ້ອງຖິ່ນໃນຕອນບ່າຍຫາຄໍ່າ ຂອງແຂວງພາກກາງ ຫາ ພາກໃຕ້.

ພາກເໜືອດ້ານຕາເວັນອອກ: ໃນໄລຍະວັນທີ 25-27 ມີນາ 2019 ໂດຍທົ່ວໄປອາກາດເຢັນໃນຕອນກາງຄືນ ຫາ ຕອນເຊົ້າ ແລະ ໃນຕອນບ່າຍຫາຄໍ່າອາກາດຈະຮ້ອນຂຶ້ນ. ຈາກນັ້ນວັນທີ 28-31 ມີນາ 2019 ຈະມີຝົນຕົກ, ຟ້າຮ້ອງ, ຟ້າເຫຼື້ອມໃນລະດັບຄ່ອຍພ້ອມມີລົມພັດແຮງຢູ່ບາງທ້ອງຖິ່ນ ແຂວງ ຜົ້ງສາລີ, ຫົວພັນ ແລະ ຊຽງຂວາງ.

ພາກເໜືອດ້ານຕາເວັນຕົກ: ໃນໄລຍະວັນທີ 25-27 ມີນາ 2019 ອາກາດເຢັນໃນຕອນເຊົ້າພ້ອມມີໝອກບາງປົກຫຸ້ມໃນຕອນເຊົ້າ, ສ່ວນໃນຕອນບ່າຍອາກາດຈະຮ້ອຍຂຶ້ນພ້ອມມີໝອກແຫ້ງປົກຫຸ້ມຢູ່ທົ່ວໄປ. ຈາກນັ້ນວັນທີ 28-31 ມີນາ 2019 ຈະມີຝົນຕົກ, ຟ້າຮ້ອງ, ຟ້າເຫຼື້ອມໃນລະດັບຄ່ອຍ ແລະ ປານກາງເປັນບາງໂອກາດ.

ພາກກາງ: ໃນໄລຍະວັນທີ 25-27 ມີນາ 2019 ອາກາດຈະຮ້ອນຂຶ້ນໃນຕອນບ່າຍ. ຈາກນັ້ນ ວັນທີ 28-31 ມີນາ 2019 ອາກາດຈະສືບຕໍ່ຮ້ອນໃນໄລຍະຕອນບ່າຍ ແລະ ຈະມີຝົນຕົກຟ້າຮ້ອງຟ້າເຫຼື້ອມ ໃນລະດັບຄ່ອຍຢູ່ທົ່ວໄປ ແລະ ຕົກໃນລະດັບປານກາງຢູ່ບາງທ້ອງຖິ່ນ ແຂວງ ວຽງຈັນ, ບໍລິຄຳໄຊ, ຄຳມ່ວນ ແລະ ສະຫວັນນະເຂດ ພ້ອມມີລົມພັດແຮງເປັນບາງໂອກດ.

ສະເພາະແຂວງ ໄຊສົມບູນ,ເຂດຫຼັກ 20, ເມືອງ ວຽງທອງ ແລະ ເມືອງ ນາກາຍ: ໃນໄລຍະວັນທີ 25-27 ມີນາ 2019 ອາກາດຈະເຢັນຫາໜາວເຢັນໃນຕອນກາງຄືນຫາຕອນເຊົ້າ, ພ້ອມມີລົມພັດແຮງເປັນບາງໂອກາດຢູ່ບາງບໍລິເວນ, ຈກນັ້ນໃນວັນທີ 28-31 ມີນາ 2019 ຈະມີຝົນຕົກຟ້າຮ້ອງຟ້າເຫຼື້ອມໃນລະດັບຄ່ອຍຢູ່ບາງທ້ອງຖິ່ນ ແຂວງ ສາລະວັນ, ຈຳປາສັກ, ເຊກອງ ແລະ ອັດຕະປື.

ສະເພາະເຂດພູພຽງບໍລະເວນ: ໃນໄລຍະວັນທີ 25-27 ມີນາ 2019 ອາກາດຈະເຢັນຫາໜາວເຢັນ. ຈາກນັ້ນໃນວັນທີ 28-31 ມີນາ 2019 ອາກາດຈະສືບຕໍ່ໜາວເຢັນ ແລະ ຍັງຈະມີຝົນຕົກຟ້າເຫຼື້ອມໃນລະດັບຄ່ອຍພ້ອມມີລົມພັດແຮງເປັນບາງໂອກາດຢູ່ບາງບໍລິເວນ.

ນະຄອນຫຼວງວຽງຈັນ: ໃນໄລຍະວັນທີ 25-27 ມີນາ 2019 ອາກາດຈະຮ້ອນຂຶ້ນໃນຕອນບ່າຍ ພ້ອມມີໝອກແຫ້ງປົກຫຸ້ມໃນຕອນເຊົ້າ. ຈາກນັ້ນວັນທີ 28-31 ມີນາ 2019 ຈະມີຝົນຕົກຟ້າຮ້ອງຟ້າເຫຼື້ອມ ໃນລະດັບຄ່ອຍຢູ່ບາງບໍລິເວນພ້ອມມີລົມພັດແຮງເປັນບາງໂອກາດ.

ຮຽບຮຽງໂດຍ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: ກົມອຸຕຸນິຍົມ ແລະ ອຸທົກກະສາດ