ກົມສົ່ງເສີມການຄ້າລະຫວ່າງປະເທດ ກະຊວງພານິດຮ່ວມມືກັບການຄ້າໄທ ແລະ Coelnmesse ປະເທດ ເຢຍລະມັນ ຈັດງານສະແດງສິນຄ້າອາຫານ ແລະ ເຄື່ອງດື່ມລະດັບໂລກ “THAIFEX – World of Food ASIA 2019” ທີ່ປະເທດໄທ ເຊີນຊວນຜູ້ທີ່ສົນໃຈຈາກຫຼາຍໆປະເທດທົ່ວໂລກລວມທັງ ສປປ ລາວ ຮ່ວມເຈລະຈາທຸລະກິດກັບຜູ້ຜະລິດ, ຜູ້ສົ່ງອອກ, ຜູ້ນຳເຂົ້າ ແລະ ຕົວແທນຈຳໜ່າຍສິນຄ້າເຂົ້າຮ່ວມງານສະແດງສິນຄ້າ-ອາຫານ ຍິ່ງໃຫຍ່ລະດັບໂລກທີ່ ປະເທດໄທ “THAIFEX – World of Food ASIA 2019”ລະຫວ່າງວັນທີ 28 ພຶດສະພາ – 1 ມິຖຸນາ 2019 ເວລາ 10:00-18:00 ທີ່ຕຶກ IMPACT Challenger ເມືອງທອງທານີ ແຂວງນົນທະບູລີ ປະເທດໄທ ໂດຍມີສິນຄ້າຫລາກຫຼາຍລາຍການທີ່ຈະເຂົ້າຮ່ວມ.
ເຊິ່ງງານຖະແຫຼງຂ່າວໄດ້ຈັດຂຶ້ນໃນວັນທີ 15 ມີນາ 2019 ທີ່ສູນການຄ້າລາວໄອເຕັກໂດຍມີ ທ່ານ ວິດທະຍາກອນ ມະນີເນດ ຮອງອະທິບໍດີ ກົມສົ່ງເສີມການຄ້າລະຫວ່າງປະເທດ ກະຊວງພານິດໄທ ໃນຖານະຜູ້ແທນຜູ້ຈັດງານຈາກລັດຖະບານໄທ, ທ່ານນາງ ວະຣິສະຣາ ໄນຢະຊິດ ຜູ້ອຳນວຍການໂຄງການ ຜູ້ແທນຈາກບໍລິສັດ Coelnmesse ຈຳກັດ ພ້ອມດ້ວຍສື່ມວນຊົນເຂົ້າຮ່ວມ.
ໃນໂອກາດດັ່ງກ່າວ ທ່ານ ວິດທະຍາກອນ ມະນີເນດ ໄດ້ກ່າວວ່າ: ການວາງສະແດງສິນຄ້າຄັ້ງນີ້ເປັນເວທີທີ່ເປີດໂອກາດໃຫ້ຜູ້ປະກອບການຈາກທົ່ວໂລກໄດ້ມາເຈລະຈາການຄ້າກັບຜູ້ປະກອບການອາຫານຂອງປະເທດໄທ ແລະ ຜູ້ປະກອບການຈາກພາກພື້ນຕ່າງໆ ທົ່ວໂລກຫຼາຍກວ່າ 40 ປະເທດ ບໍ່ວ່າຈະເປັນອາຊີຕາເວັນອອກ, ອາຊຽນ, ເອີຣົບ, ສະຫະລັດອາເມລິກາ, ລາຕິນອາເມລິກາ, ອາຟຣິກາ ເຊິ່ງພ້ອມໃຈກັນມາຈັດງານສະແດງສິນຄ້າລວມຫຼາຍກ່ວາ 2,700 ບໍລິສັດ ງານນີ້ຈິ່ງຖືໄດ້ວ່າເປັນງານຈັດສະແດງອາຫານ ແລະ ເຄື່ອງດື່ມ ທີ່ຍິ່ງໃຫຍ່ທີ່ສຸດໜຶ່ງໃນອາຊີ, ໂດຍມີມູນຄ່າການຊື້ຂາຍຫຼາຍກວ່າ 10,000 ລ້ານບາດ ແລະ ເປັນງານສຳຄັນສຳລັບຜູ້ປະກອບການຈາກຫຼາຍໆປະເທດ.
ທ່ານ ວິດທະຍາກອນ ຍັງໄດ້ກ່າວອີກວ່າ: ສິນຄ້າຂອງ ສປປ ລາວ ຫຼາຍຊະນິດທີ່ມີຊື່ສຽງ ແລະ ມີໂອກາດໃນການເຮັດທຸລະກິດທັງໃນໄທ ແລະ ຕ່າງປະເທດ ບໍ່ວ່າຈະເປັນກາເຟສີໜຸກ, ກາເຟ ແລະ ໝາກໄມ້ອົບແຫ້ງດາວ, ຊາຜົ້ງສາລີ ແລະ ເບຍລາວ ເປັນຕົ້ນ, ຈິ່ງມີຄວາມຕັ້ງໃຈມາເຊີນຊວນນັກທຸລະກິດ ແລະ ຜູ້ທີ່ສົນໃຈປະກອບທຸລະກິດອາຫານ ແລະ ເຄື່ອງດື່ມຈາກ ສປປ ລາວ ໄປເຂົ້າຮ່ວມ ແລະ ເຂົ້າເບິ່ງໃນງານ THAIFEX 2019 ເພື່ອໄປເບິ່ງຊ່ອງທາງ ແລະ ໂອກາດທາງທຸລະກິດ ລວມໄປເຖິງການອັບເດດເທຣນສິນຄ້າອາຫານ ແລະ ເຄື່ອງດື່ມໃໝ່ໆກ່ອນໃຜໆຈາກທົ່ວໂລກ.
ດັ່ງນັ້ນ, ກົມສົ່ງເສີມການຄ້າລະຫວ່າງປະເທດ ຫໍການຄ້າໄທ ແລະ Coelnmesse ຢາກຂໍເຊີນຊວນຜູ້ຜະລິດ, ຜູ້ນຳເຂົ້າ, ຜູ້ສົ່ງອອກ ແລະ ຜູ້ສົນໃຈເຮັດທຸລະກິດຈາກ ສປປ ລາວ ເຂົ້າຮ່ວມໃນງານ “THAIFEX – World of Food ASIA 2019”
ສົນໃຈສອບຖາມຂໍ້ມູນເພີ່ມຕື່ມ:
ສຳນັກງານສົ່ງເສີມການຄ້າໃນຕ່າງປະເທດ ຝ່າຍການພານິດ
ສະຖານເອກອັກຄະລາດຊະທູດໄທ ປະຈຳ ສປປ ລາວ
ໂທ: +856-21-413701, 413706
ໂດຍ: ແຟນຊິສ ສະຫວັນຄຳ