ສຳນັກຂ່າວຕ່າງປະເທດລາຍງານ ຈາກປະເທດເອທິໂອປີ ເມື່ອວັນທີ 10 ມີນາ 2019 ວ່າ ສາຍການບິນເອທິໂອປີ ແອຣ໌ລາຍ ອອກຖະແຫຼງການໂດຍ ປະທານເຈົ້າໜ້າທີ່ບໍລິຫານຂອງເອທິໂອປີແອຣ໌ລາຍ ສະແດງຄວາມເສຍໃຈທີ່ຈະຕ້ອງຢືນຢັນວ່າບໍ່ພົບຜູ້ລອດຊີວິດ ຈາກເຫດການເຮືອບິນໂດຍສານໂບອິ້ງ 737 ຖ້ຽວບິນ ET 302 ທີ່ເດີນທາງຈາກແອດດິສອາບາບາ ມຸ່ງໜ້າສູ່ຈຸດໝາຍປາຍທາງທີ່ ນະຄອນໄນໂຣບີ ປະເທດເຄນຢາ ພ້ອມຜູ້ໂດຍສານ 149ຄົນ ແລະ ລູກເຮືອ 8 ຄົນ ລວມເປັນ 157ຄົນ ເກີດອຸບັດຕິເຫດຫຼັງຈາກຂຶ້ນບິນໄດ້ບໍ່ດົນເພາະຂາດການຕິດຕໍ່ 6 ນາທີຫຼັງຈາກບິນຂຶ້ນ.
ໂຄສົກຂອງສາຍການບິນເອທິໂອປີແອຣ໌ລາຍ ຖະແຫຼງຂ່າວວ່າ ຜູ້ໂດຍສານ ແລະ ລູກເຮືອເທິງເຮືອບິນມີບຸກຄົນສັນຊາດຕ່າງໆ 33 ປະເທດ ແລະ ຮູ້ວ່າເປັນຊາວເຄນຢາ 32 ຄົນ ແລະ ເອທິໂອປີ 17 ຄົນ.
ສະຫະປະຊາຊາດ (UN) ອອກຖະແຫຼງການຈາກສໍານັກງານໃຫຍ່ທີ່ນະຄອນນິວຢອກ ແລະ ໜ່ວຍງານທຸກແຫ່ງໃນສັງກັດຂອງຢູເອັນ ຫຼື ທີ່ເປັນພັນທະມິດ ລົດທຸງລົງເຄິ່ງເສົາໃນວັນຈັນ, ວັນທີ 11 ມີນາ 2019 ຄືກັນກັບລັດຖະບານເອທິໂອປີທີ່ປະກາດໃຫ້ເປັນວັນໄວ້ອາໄລທົ່ວປະເທດ 1 ວັນ. ໂດຍລາຍງານຂອງຢູເອັນລະບຸວ່າ ຈຳນວນຜູ້ເສຍຊີວິດທັງໝົດນັ້ນ ມີເຈົ້າໜ້າທີ່ຈາກໜ່ວຍງານຂອງ UN ທັງໝົດ 19 ຄົນ.
ດ້ານບໍລິສັດໂບອິ້ງຜູ້ຜະລິດເຮືອບິນໂດຍສານລາຍໃຫຍ່ຂອງສະຫະລັດ ອອກຖະແຫຼງການວ່າ ບໍລິສັດໂບອິ້ງ ຂໍສະແດງຄວາມເສຍໃຈຢ່າງສຸດຊຶ້ງຕໍ່ການເສຍຊີວິດທັງໝົດ 157 ຄົນ ຂອງຜູ້ໂດຍສານ ແລະ ລູກເຮືອໃນທ້ຽວບິນ ET 302 ພ້ອມກັບຈະໃຫ້ຄວາມຊ່ວຍເຫຼືອດ້ານເຕັກນິກໃນການກວດສອບເພື່ອຫາສາເຫດຂອງອຸບັດຕິເຫດເຮືອບິນຕົກໃນຄັ້ງນີ້ ເຊິ່ງເປັນເຮືອບິນໂດຍສານຮຸ້ນໂບອິ້ງ 737 ແມັກ 8 ເປັນເຮືອບິນໃໝ່ທີ່ຫາກໍ່ສົ່ງມອບໃຫ້ເມື່ອປີ 2018.
ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: dailynews