ໃນວັນທີ 1 ມີນາ 2019 ລັດຖະບານຢີ່ປຸ່ນໄດ້ເຊັນສັນຍາຊ່ວຍເຫຼືອກໍ່ສ້າງຫໍສະໝຸດໂຮງຮຽນມັດທະຍົມແຂວງວຽງຈັນຈຳນວນ 170.429 ໂດລາ ໂດຍມີທ່ານ ທາເຄຊິ ຮີຄິຮາຣະ ເອກອັກຄະຣາຊະທູດຢີ່ປຸ່ນ ປະຈຳ ສປປລາວ, ທ່ານ ຄຳຜາຍ ສີສະຫວັນ ຮອງລັດຖະມົນຕີກະຊວງສຶກສາທິການ ແລະ ກິລາ, ທ່ານ ນາງ ຈັນທະສອນ ອິນທະວົງ ຕົວແທນຈາກອົງການເດັກນ້ອຍລາວ ເຊິ່ງເປັນອົງການຈັດຕັ້ງທີ່ບໍ່ສັງກັດລັດຖະບານຢີ່ປຸ່ນ ພ້ອມດ້ວຍພະນັກງານ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ສໍາລັບໂຄງການພັດທະນາເດັກນ້ອຍລາວຜ່ານການສົ່ງເສີມການອ່ານ ແລະ ກໍ່ສ້າງຫໍສະໝຸດໃນໂຮງຮຽນມັດທະຍົມແຂວງວຽງຈັນຄັ້ງນີ້ໂດຍມີເປົ້າໝາຍເພື່ອສ້າງສັງຄົມໃຫ້ມີຄວາມເທົ່າທຽມ ແລະ ສະຫງົບສຸກ ໂດຍສົ່ງເສີມການອ່ານໃຫ້ແກ່ນ້ອງນັກຮຽນ ເຊິ່ງການສ້າງຫໍສະໝຸດຄັ້ງນີ້ປະກອບມີ 3ຫ້ອງ ແລະ 3ແຫ່ງຢູ່ແຂວງວຽງຈັນ. ນອກຈາກນີ້ຍັງຈະມອບປຶ້ມ ແລະ ຝຶກອົບຮົມອາຈານສົ່ງເສີມຄວາມຮູ້ດ້ານການອ່ານ ແລະ ຊຸກຍູ້ໃຫ້ນັກຮຽນອ່ານໂດຍຕົນເອງ.
ອົງການເດັກນ້ອຍລາວ(ALC) ໄດ້ເຄື່ອນໄຫວກິດຈະກຳໃນ ສປປ ລາວ ແລະ ຢີ່ປຸ່ນ ເພື່ອສົງເສີມການເຕີບໂຕທີ່ດີຂອງເດັກນ້ອຍລາວໃນປີ 214 ແລະ ໄດ້ຈັດຕັ້ງປະຕິບັດຊ່ວຍເຫຼືອຫໍສະໝຸດໃນນະຄອນຫລວງວຽງຈັນໃນປີຜ່ານມາ.
ຂຽນໂດຍ: ແຟນຊິສ ສະຫວັນຄຳ