ກະຊວງສາທາລະນະສຸກ ເປີດກອງປະຊູມສະຫຼຸບການຈັດຕັ້ງປະຕິບັດວຽກງານສາທາລະນະສຸກປີ 2018 ແລະ ທິດທາງແຜນການປີ 2019 ໃນລະຫວ່າງວັນທີ 26-28 ກຸມພາ 2019, ທີ່ຫໍປະຊຸມແຫ່ງຊາດ ໂດຍການເປັນປະທານຂອງທ່ານ ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ, ມີບັນດາຮອງລັດຖະມົນຕີ, ເຈົ້າແຂວງ-ຮອງເຈົ້າແຂວງ, ອະທິການບໍດີ-ຄະນະບໍດີ, ອຳນວຍການໂຮງໝໍ, ຫົວໜ້າພະແນກສາທາແຂວງ, ນະຄອນຫຼວງ ແລະ ພະນັກງານກ່ຽວຂ້ອງເຂົ້າຮ່ວມ.
ພິທີດັ່ງກ່າວ, ທ່ານ ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ ກ່າວວ່າ: ເພື່ອຜັນຂະຫຍາຍມະຕິກອງປະຊຸມໃຫຍ່ ຄັ້ງທີ X ຂອງພັກ ທີ່ຖືເອົາວຽກງານກັນພະຍາດ ແລະ ສົ່ງເສີມສຸຂະພາບເປັນວຽກງານສຳຄັນ ໂດຍເອົາການບໍລິການປິ່ນປົວທີ່ມີຄຸນນະພາບທົ່ວເຖິງ ແລະ ເປັນທຳເປັນວຽກງານຕົ້ນຕໍຄື: ສູ້ຊົນປະຕິບັດ 10 ຕົວຊີ້ວັດໃຫ້ສາມາດບັນລຸຕາມຄາດໝາຍທີ່ວາງໄວ້. ການຈັດຕັ້ງປະຕິບັດແຜນພັດທະນາສາທາລະນະສຸກປີ 2018 ຕາມ 8 ແຜນງານ, 42 ແຜນງານຍ່ອຍ ແລະ 97 ໂຄງການ ຕາມຂອບຍຸດທະສາດປະຕິຮູບສາທາໄລຍະ II ໂດຍສຸມໃສ່ 5 ດ້ານຄື: ດ້ານຊັບພະຍາກອນມະນຸດ, ບໍລິການຄຸ້ມຄອງ, ການເງິນສາທາ, ການບໍລິການສາທາ ແລະ ດ້ານຂໍ້ມູນຂ່າວສານສາທາ. ພ້ອມນັ້ນ, ໄດ້ຮັບຮອງໃຫ້ກະຊວງສາທາລະນະສຸກ ຈັດຕັ້ງປະຕິບັດຫຼາຍຕົວຊີ້ວັດໃຫ້ມີຄວາມຄືບໜ້າເປັນທີ່ພໍໃຈ.
ອີງຕາມຕົວເລກລາຍງານປົກກະຕິຈາກ 18 ແຂວງຈຳນວນການຕາຍຂອງແມ່ປີ 2017 ໄດ້ຫຼຸດລົງ 151 ຄົນ ແລະ ປີ 2018 ມີພຽງ 129 ຄົນ; ການຊົມໃຊ້ວິດຖ່າຍປີ 2012 ເພີ່ມຂຶ້ນຈາກ 56,9% ໃນປີ 2017 ມາເປັນ 73,8% ຄາດໝາຍ ປີ 2018 ແມ່ນ 73% ຖືວ່າບັນລຸໄດ້; ການປົກຄຸມການປະກັນສຸຂະພາບປີ 2017 ເພີ່ມຂຶ້ນ 71% ໃນປີ 2018 ມາເປັນ 75% ບັນລຸໄດ້.
ສ່ວນຕົວຊີ້ວັດທີ່ຍັງບໍ່ທັນສາມາດບັນລຸ ປີ 2018 ອັດຕາເດັກນ້ອຍລຸ່ມ 5 ປີ ທີ່ມີນ້ຳໜັກຕ່ຳກວ່າມາດຕະຖານຫຼຸດລົງຈາກ 27% ປີ 2012 ຍັງເຫຼືອ 21,1% ປີ 2017 ຄາດໝາຍປີ 2018 ແມ່ນ 21% ເກືອບບັນລຸ ຕ້ອງສືບຕໍ່ສູ້ຊົນ; ການເກີດລູກມີແພດຊ່ວຍຫຼຸດລົງຈາກ 41,5% ປີ 2012 ມາເປັນ 64,4% ປີ 2017 ຄາດໝາຍປີ 2018 ແມ່ນ 74%; ການສັກຢາກັນພະຍາດຂໍ້ມູນລາຍງານຈາກ DHIS2 ປີ 2017 DPT3 83% ຄາດໝາຍ 2018 ແມ່ນ 90% ແຕ່ການລາຍງານໄດ້ພຽງແຕ່ 84%; ການຊົມໃຊ້ນ້ຳສະອາດເພີ່ມຂຶ້ມຈາກ 69,9% ປີ 2012 ມາເປັນ 83,9% ປີ 2017 ຄາດໝາຍປີ 2018 ແມ່ນ 88% ຈຶ່ງຖືວ່າຍັງບໍ່ທັນບັນລຸເທື່ອ.
ຂຽນໂດຍ: ໃບບົວ ຈັນທະລັງສີ
ຮູບພາບ: ວຽງຈັນໃໝ່