ໃນສາຍຕາຫຼາຍຄົນອາດຈະລື້ງເຄີຍກັບລົດບັນທຸກສິນຄ້າແລ່ນເຂົ້າ-ອອກເມືອງບໍ່ເວັ້ນວັນ, ລຽນຊາບລາບຢູ່ແຄມທາງ, ໜ້າຮ້ານຄ້າ, ຕະຫຼາດ ເຊິ່ງເຫັນແລ້ວເປັນສິ່ງທີ່ຜູ້ໃຊ້ພາຫະນະຕ້ອງໄດ້ລົບຫຼີກແບບສ່ຽງເປັນສ່ຽງຕາຍ ຫຼື ຕ້ອງຈອດລໍຖ້າເປັນແຖວຍາວຢຽດເປັນເວລາດົນ ບາງຄັ້ງຈົນເກີດມີອຸບັດຕິເຫດ ທັງນີ້ກໍເນື່ອງມາຈາກມີລົດບັນທຸກສິນຄ້າເຂົ້າ-ອອກປ່ຽນຖ່າຍສິນຄ້າຢູ່ຕາມໜ້າຮ້ານຄ້າ, ໂຮງງານ ແລະ ສະຖານທີ່່ອື່ນໆ ທີ່ບໍ່ປະຕິບັດຕາມເວລາທີ່ ລັດຖະບານ ກໍານົດໄວ້.
ຂະນະທີ່ກອງປະຊຸມລັດຖະບານສະໄໝສາມັນປະຈໍາເດືອນ ກຸມພາ 2019 ລາຍງານວ່າ: “ໃນເດືອນ ມີນາ ທີ່ໃກ້ຈະມາຮອດນີ້, ລັດຖະບານ ຈະສຸມໃສ່ປະຕິບັດວຽກຈຸດສຸມຕົ້ນຕໍຈໍານວນໜຶ່ງ ໃນນັ້ນ, ສືບຕໍ່ເອົາໃຈໃສ່ແກ້ໄຂປະກົດການຫຍໍ້ທໍ້ໃນສັງຄົມ ເປັນຕົ້ນແມ່ນ: ອຸປະຕິເຫດຕາມທ້ອງຖະໜົນ, ການຂາຍເຄື່ອງຜິດກົດໝາຍ” (ຄັດຈາກ: Lao National Radio).
ອີງຕາມດໍາລັດເລກທີ 188/ນຍ, ມາດຕາ 35 ວ່າດ້ວຍການປ່ຽນຖ່າຍສິນຄ້າ, ສິ່ງກີດຂວາງການສັນຈອນ: ລົດບັນທຸກທີ່ມີຂະໜາດບັນທຸກສິນຄ້າແຕ່ 5 ໂຕນຂຶ້ນໄປຕ້ອງບໍ່ໃຫ້ກີດຂວາງການສັນຈອນໃນເວລາຂົນສົ່ງສິນຄ້າຂຶ້ນ-ລົງຢູ່ສະຖານທີ່ແຄມທາງ ແລະ ເຂດຊຸມຊົນ ເຊັ່ນ: ຮ້ານຄ້າ, ອາຄານ, ສາງເຄື່ອງ, ຮ້ານຄ້າທີ່ຕັ້ງຢູ່ເຂດຕະຫຼາດ ແລະ ເຂດກໍ່ສ້າງທີ່ມີການສັນຈອນໜາແໜ້ນ ຫ້າມເອົາສິນຄ້າຂຶ້ນລົດ-ລົງລົດຕາມກໍານົດເວລາໃນວັນລັດຖະການດັ່ງນີ້: ຕອນເຊົ້າແຕ່ 7:00-9:00 ໂມງ ແລະ ຕອນແລງແຕ່ 16:00-16:00-17:30 ໂມງ ຫາກຜູ້ໃດລະເມີດຈະຖືກປັບໃໝຄັ້ງລະ 200.000 ກີບ ຖ້າລະເມີດເກີນ 3 ຄັ້ງ ຈະຖອນໃບອະນຸຍາດຂັບຂີ່, ໃບອະນຸຍາດດໍາເນີນທຸລະກິດ ແລະ ສັ່ງປິດ. ດັ່ງນັ້ນ, ສະແດງວ່ານອກເໜືອຈາກເວລາທີ່ກໍານົດໄວ້ລົດບັນທຸກກໍສາມາດເຂົ້າມາໃນເມືອງໄດ້.
ຕໍ່ກັບມາດຕາດັ່ງກ່າວ, ລັດຖະບານ ໄດ້ປະກາດໃຊ້ມາແຕ່ 2007 ເຫັນວ່າສັງຄົມກໍຍັງປະຕິບັດບໍ່ໄດ້ ເຊິ່ງບັນຫານີ້ຕ້ອງມີການເພີ່ມເອົາໃຈໃສ່ຢ່າງຈິງຈັງ ຖ້າບໍ່ດັ່ງນັ້ນມັນຈະກາຍເປັນ “ເສດເຈ້ຍທໍາມະດາທີ່ບໍ່ມີຜົນສັກສິດຫຍັງເລີຍໃນບ້ານເມືອງຂອງເຮົາ” ຄໍາທີ່ຜູ້ໃຊ້ສັງຄົມອອນລາຍ ຫຼື ຄົນທົ່ວໄປມັກເວົ້າກັນ. ນອກນັ້ນ, ບັນດາພໍ່ຄ້າຊາວຂາຍ, ນັກລົງທຶນ, ຜູ້ຜະລິດກໍຈະຍິ່ງເພີ່ມຈໍານວນລົດຂົນສົ່ງສິນຄ້າເຂົ້າມາໃນເມືອງຫຼາຍຂຶ້ນ ແລ້ວຜົນຕາມມາກໍເປັນບັນຫາຊໍ້າໆເດີມໆ ເຊັ່ນ: ການສັນຈອນແອອັດ, ລົດຕິດ, ມົນລະພິດທາງອາກາດ, ອຸບັດຕິເຫດ, ເສັ້ນທາງເປ່ເພ ແລະ ອື່ນໆ ຍັງບໍ່ໜົດເທົ່ານັ້ນ, ປະຊາຊົນໃນສັງຄົມກໍຈະຍັງສືບແນວຄວາມຄິດທີ່ວ່າ: “ກົດລະບຽບ-ກົດໝາຍ, ດໍາລັດ, ຂໍ້ກໍານົດອື່ນໆ ບໍ່ມີຄວາມສັກສິດ ແລະ ປະຕິບັດບໍ່ໄດ້ ແລ້ວໃນອະນາຄົດກໍຈະບໍ່ມີໃຜປະຕິບັດຕາມສີ່ງທີ່ກຳນົດອອກມາ”.
ຮູບພາບ-ຂຽນໂດຍ: ໃບບົວ ຈັນທະລັງສີ