1. ຊັ້ນວາງຂອງເປີດໂລ່ງ
ເທນການແຕ່ງເຮືອນສະໄໝນີ້ເນັ້ນຄວາມໂປ່ງ,ເປີດເຜີຍ, ລຽບງ່າຍ ບັນດາເຟີນິເຈີເປີດໂລ່ງແບບຊັ້ນວາງເຄື່ອງ ຕູ້ໂຊ ຊຶ່ງຈຸດນີ້ແຫລະ ທີ່ມັກຈະສະສົມຝຸ່ນເອົາໄວ້ຫລາຍ ໂດຍທີ່ເຮົາເອງກໍເຮັດເປັນລືມໆມັນໄປ ເວລາທີ່ເຮັດຄວາມສະອາດເຮືອນກໍເລີຍບໍ່ໄດ້ເຊັດທຳຄວາມສະອາດຕູ້ໂຊເຫລົ່ານີ້ສຸດທ້າຍພື້ນທີ່ອື່ນໆ ໃນເຮືອນສະອາດໝົດ ເຫລືອກໍແຕ່ຊັ້ນວາງເຄື່ອງແບບເປີດໂລ່ງທີ່ເປັນຈຸດອ່ອນ
2. ດອກໄຟ
ແປກໃຈແມ່ນບໍ່ວ່າເປັນຫຍັງບັນຢາກາດຂອງເຮືອນເຖິງເບິ່ງແປກໆບໍ່ສົດໃສ ທັງທີ່ເຮັດຄວາມສະອາດເຮືອນໄປແລ້ວ ນັ້ນກໍອາດເປັນເພາະວ່າ ເຈົ້າລືມທຳຄວາມສະອາດດອກໄຟ ໂຄມໄຟໃນເຮືອນ ເພາະສິ່ງເຫລົ້ານີ້ກໍມີຝຸ່ນເກາະຢູ່ຄືກັນ ຊຶ່ງກໍຈະເຮັດໃຫ້ດອກໄຟເປັ້ງແສງສະຫວ່າງໄດ້ບໍ່ເຕັມທີ່ ບັນຢາກາດໃນເຮືອນເລີຍບໍ່ຄ່ອຍແຈ້ງເທົ່າໃດ
3. ເຄົາເຕີເຮືອນຄົວທີ່ເຮັດດ້ວຍຫິນອອນ
ສຳລັບເຄົາເຕີເຮືອນຄົວທີ່ເປັນຫິນອ່ອນ ຫລັງທຳຄວາມສະອາດໄປແລ້ວຈະເຫັນເລີຍວ່າຄາບສົກກະປົກຍັງບໍ່ຫາຍໄປງ່າຍໆ ກໍລະນີນີ້ຕ້ອງອາໄສເຄັດລັບເຮັດຄວາມສະອາດເຄົາເຕີຫິນອ່ອນໂດຍສະເພາະ ດ້ວຍການປະສົມໄຮໂດນເຈນເປີອອກໄຊ ກັບແປ້ງສາລີໃຫ້ພໍເປັນເນື້ອຄີມໜຽວ ຈາກນັ້ນນຳມາທາໃຫ້ທົ່ວພື້ນທີ່ເຄົາເຕີ ປະໄວ້ 24ຊົ່ວໂມງແລ້ວຄ່ອຍຂູດແປ້ງອອກ ຈາກນັ້ນກໍເຮັດຄວາມສະອາດຕາມປົກກະຕິ ສຳລັບຄາບເປື້ອນຈາກນ້ຳມັນ ໃຫ້ປ່ຽນສ່ວນປະສົມຈາກໄຮໂດນເຈນເປີອອກໄຊເປັນນ້ຳຢາລ້າງຈານແທນ
4. ຜ້າເຊັດມືໃນຫ້ອງນ້ຳ
ທັງຜ້າເຊັດມື ແລະຜ້າເຊັດຕີນໃນຫ້ອງນ້ຳ ມັກຈະສະສົມທັງຄວາມຊື້ນ ແລະເຊື້ອພະຍາດໄດ້ດີກວ່າພື້ນທີ່ອື່ນໆ ສະນັ້ນຕໍ່ໃຫ້ເຮັດຄວາມສະອາດຫ້ອງນ້ຳພຽງໃດໃດ ແຕ່ລືມປ່ຽນຜ້າເຊັດມື ແລະຊັກຜ້າເຊັດຕີນ ຫ້ອງນ້ຳຂອງທ່ານກໍຍັງມີຄວາມສົກກະປົກຢູ່ດີ
5. ກະຕ່າໃສ່ເຄື່ອງ
ກິ່ນເໝັນໆ ພາຍໃນຫ້ອງຊັກລີດ ຫລື ຫ້ອງນອນອາດບໍ່ໄດ້ເກີດຈາກເຄື່ອງທີ່ຍັງບໍ່ໄດ້ຊັກ ຫລື ວັດດຸອື່ນໆ ກໍໄດ້ ອາດມີທີ່ມາຈາກກະຕ່າໃສ່ເຄື່ອງຂອງທ່ານຕ່າງຫາກ ລອງຄິດເບິ່ງວ່າ ກະຕ່າເຄື່ອງຮັບຫນ້າທີ່ແບກເຄື່ອງທີ່ຍັງບໍ່ໄດ້ຊັກຕັ້ງຈັກໂຕ ເຮັດຫນ້າທີ່ມາດົນຕັ້ງຈັກເດືອນຈັກ-ປີ ສະນັ້ນກໍບໍ່ຕ້ອງແປກໃຈເລີຍວ່າເປັນຫຍັງເສື້ອຜ້າເຖິງບໍ່ຄ່ອຍສະອາດເທົ່າທີ່ຄວນ ຫລື ອາກາດພາຍໃນຫ້ອງນອນເຖິງບໍ່ສົດຊື່ນເທົ່າທີ່ຢາກໃຫ້ເປັນ ນັບຈາກນີ້ຕໍ່ໄປກໍຢ່າລືມເຮັດຄວາມສະອາດກະຕ່າໃສ່ເຄື່ອງນຳແນ່ເດີ້
