ເດືອນ ມີນາ 2019 ນີ້, ລັດຖະບານ ຈະສຸມໃສ່ປະຕິບັດວຽກຈຸດສຸມຕົ້ນຕໍ ໂດຍສືບຕໍ່ເອົາໃຈໃສ່ແກ້ໄຂອຸປະຕິເຫດຕາມທ້ອງຖະໜົນ, ການຄ້າຂາຍຜິດກົດໝາຍ; ການເກັບລາຍຮັບຕ້ອງສູ້ຊົນໃຫ້ບັນລຸ 25%; ເອົາໃຈໃສ່ປະຕິບັດຂໍ້ຕົກລົງ ເລກທີ 12/ນຍ ວ່າດ້ວຍການຕິດຕາມ, ກວດກາ ແລະ ຊຸກຍູ້ການຈັດຕັ້ງປະຕິບັດວຽກງານຈຸດສຸມຕົ້ນຕໍ ຂອງແຜນພັດທະນາເສດຖະກິດ-ສັງຄົມ ແຫ່ງຊາດ ແລະ ແຜນງົບປະມານແຫ່ງລັດ ປະຈໍາປີ 2019.
ກອງປະຊຸມລັດຖະບານສະໄໝສາມັນປະຈໍາເດືອນ ກຸມພາ 2019 ລັດຖະບານ ຈະສຸມໃສ່ປະຕິບັດວຽກຈຸດສຸມຕົ້ນຕໍຈໍານວນໜຶ່ງ ໂດຍສືບຕໍ່ແກ້ໄຂປະກົດການຫຍໍ້ທໍ້ໃນສັງຄົມ ເປັນຕົ້ນ: ອຸປະຕິເຫດຕາມທ້ອງຖະນົນ, ການຄ້າຂາຍຜິດກົດໝາຍ, ການປຸ້ນຈີ້ຊິງຊັບ ແລະ ອື່ນໆ ຫຼຸດລົງໃຫ້ໄດ້ຢ່າງຈິງຈັງ; ການເກັບລາຍຮັບໃນທ້າຍເດືອນ ມີນາ ຕ້ອງສູ້ຊົນໃຫ້ບັນລຸ 25% ຫຼື ຢ່າງໜ້ອຍກໍ່ບໍ່ຄວນຫຼຸດ 20 % ຂອງແຜນການປີ; ເອົາໃຈໃສ່ວຽກງານຫັນເປັນທັນສະໄໝການເກັບລາຍຮັບງົບປະມານໃຫ້ໄວກວ່າເກົ່າ ແລະ ລົງຕິດຕາມກວດກາ, ຊີ້ນໍາການເກັບລາຍຮັບງົບປະມານໃຫ້ມີປະສິດທິຜົນ; ເລັ່ງຟື້ນຟູເຂດຖືກຜົນກະທົບຈາກໄພພິບັດຢູ່ເມືອງສະໜາມໄຊ, ແຂວງອັດຕະປື ໃຫ້ໄວ້, ຮີບຮ້ອນຍົກຍ້າຍປະຊາຊົນ ແລະ ນັກຮຽນ ອອກຈາກເຕັ້ນໄປຢູ່ທີ່ພັກອາໄສຊົ່ວຄາວ ແລະ ອາຄານຮຽນທີ່ໄດ້ມາດຕະຖານໃຫ້ໄວເທົ່າທີ່ຈະໄວໄດ້; ແນະນໍາການຜະລິດກະສິກໍາທີ່ ເໝາະສົມ, ສະໜອງແນວພັນ ແລະ ວາງແຜນສ້າງໂຄງລ່າງຊົນລະປະທານໃຫ້ແກ່ປະຊາຊົນ; ຄົ້ນຄວ້າ ແລະ ສະເໜີຫັນປ່ຽນເປົ້າໝາຍນຳໃຊ້ທີ່ດິນ ທີ່ຈະນໍາໃຊ້ເປັນເຂດຜະລິດ ແລະ ຈັດສັນໃຫ້ປະຊາຊົນຕັ້ງຖິ່ນຖານ ຈາກດິນປ່າປ້ອງກັນ ມາເປັນດິນຜະລິດ ເພື່ອຂໍອະນຸມັດຈາກສະພາແຫ່ງຊາດ ຕາມກົດໝາຍ.
ໃນກອງປະຊຸມດັ່ງກ່າວ, ໄດ້ມອບໃຫ້ບັນດາທ່ານຮອງນາຍົກລັດຖະມົນຕີ ແລະ ລັດຖະມົນຕີກະຊວງປ້ອງກັນປະເທດ ເອົາໃຈໃສ່ປະຕິບັດຂໍ້ຕົກລົງ ເລກທີ 12/ນຍ ວ່າດ້ວຍການຕິດຕາມ, ກວດກາ ແລະ ຊຸກຍູ້ວຽກງານຈຸດສຸມຂອງແຜນພັດທະນາເສດຖະກິດ-ສັງຄົມແຫ່ງຊາດ ແລະ ແຜນງົບປະມານແຫ່ງລັດ ປະຈໍາປີ 2019; ສະມາຊິກລັດຖະບານ ເອົາໃຈໃສ່ຊີ້ນໍາວຽກງານຈຸດສຸມປະຈໍາເດືອນ ມີນາ ທີ່ຕົນຮັບຜິດຊອບ ແລະ ລາຍງານຄວາມຄືບໜ້າພາຍໃນວັນທີ 15 ຂອງເດືອນ ມີນາ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: Lao National Radio
ຮູບພາບ: vientianemai.net