ເທດສະການອາຫານ ແລະ ງານໂຄມໄຟນາໆຊາດຄັ້ງທີ1 ປະຈໍາປີ 2019 ເພື່ອສົ່ງເສີມການທ່ອງທ່ຽວລາວກ້າວສູ່ຄວາມຢືນຍົງ ຈະຈັດຂຶ້ນທີ່ຟາມພູຕາເວັນ ເມືອງ ທ່າພະບາດ, ແຂວງ ບໍລິຄໍາໄຊ ໃນລະຫວ່າງວັນທີ 7-10 ມີນາ 2019. ງານດັ່ງກ່າວ, ຈະລວມເອົາໂຄມໄຟຢູ່ໃນລາວ ແລະ ຕ່າງປະເທດ ຮ່ວມສະແດງ. ນອກນັ້ນ, ຍັງມີງານວາງສະແດງ ແລະ ຂາຍອາຫານ, ສິນຄ້າ ຈາກຜູ້ປະກອບການແມ່ຍິງລາວ ແລະ ງານຄອນເສີດໃຫຍ່ທີ່ລວມເອົານັກສິລະປິນລາວ-ໄທ ຢ່າງຍິ່ງໃຫຍ່.
ທ່ານ ນາງ ຈັນທະຈອນ ວົງໄຊ ປະທານສະມາຄົມນັກທຸລະກິດແມ່ຍິງ, ປະທານກໍາມະການຈັດງານໂຄມໄຟນາໆຊາດ ກ່າວໃນພິທີຖະແຫຼງຂ່າວໃນວັນທີ 19 ກຸມພາ 2019 ວ່າ: ໃນວັນທີ 7-10 ກຸມພາ 2019 (ເປັນເວລາ 4 ວັນ) ທາງສະມາຄົມນັກທຸລະກິດແມ່ຍິງລາວ ຮ່ວມກັບຟາມພູຕາເວັນ ຈັດງານເທດສະການໂຄມໄຟນາໆຊາດຄັ້ງທີ I ຂຶ້ນທີ່ ຟາມພູຕາເວັນ ບ້ານ ນາໄຊ, ເມືອງ ທ່າພະບາດ, ແຂວງ ບໍລິຄໍາໄຊ ເຊິ່ງຫ່າງຈາກນະຄອນຫຼວງວຽງຈັນປະມານ 62 ຫຼັກ. ງານດັ່ງກ່າວ, ຈັດຂຶ້ນເພື່ອເປັນການສົ່ງເສີມ ແລະ ສ້າງວຽກເຮັດງານທໍາໃຫ້ແກ່ຊຸມຊົນ ແລະ ໝູ່ບ້ານໃກ້ຄຽງກັບຟາມພູຕາເວັນ, ເປັນການເຊື່ອມໂຍງການທ່ອງທ່ຽວຕາມຍຸດທະສາດລະຫວ່າງກຸ່ມປະເທດອາຊຽນ, ສົ່ງເສີມປີທ່ອງທ່ຽວລາວ-ຈີນ 2019, ເຮັດໃຫ້ການທ່ອງທ່ຽວລາວກ້າວສູ່ຄວາມຢືນຍົງ ແລະ ສົ່ງເສີມຜະລິດຕະພັນພາຍໃນປະເທດກ້າວສູ່ຕະຫຼາດສາກົນໃນຍຸກ AEC.
ທ່ານ ນາງ ດາລຸນນີ ດວງປະເສີດ ກ່າວຕື່ມວ່າ: ໃນງານຄັ້ງນີ້, ຈະນໍາເອົາໂຄມໄຟນາໆຊາດ ປະກອບມີໂຄມໄຟຂອງລາວ, ຫວຽດນາມ, ຈີນ, ຢີ່ປຸ່ນ, ເກົາຫຼີ ແລະ ປະເທດໄທ ເຂົ້າຮ່ວມວາງສະແດງ ເຮັດໃຫ້ຜູ້ສົນໃຈເຂົ້າຮ່ວມໄດ້ຮູ້ວ່າໂຄມໄຟແຕ່ລະປະເທດແຕກຕ່າງກັນຢ່າງໃດ ພ້ອມນັ້ນ, ຍັງມີງານຕະຫຼາດນັດໂດຍໄດ້ລວມເອົາຜະລິດຕະພັນສິນຄ້າຂອງແມ່ຍິງທົ່ວປະເທດມາວາງສະແດງບໍ່ວ່າຈະເປັນເຄື່ອງຫັດຖະກໍາ-ກະສິກໍາ, ອາຫານ-ເຄື່ອງດື່ມ ແລະ ອື່ນໆ ຫຼາຍກວ່າ 50 ຮ້ານ. ນອກນັ້ນ, ວັນທີ 9 ເດືອນ ມີນາ ຈະມີການສະແດງຄອນເສີດຈາກສິນລະປິນຊື່ດັງລາວ-ໄທ. ຕະຫຼອດເທດສະການນີ້, ພວກເຮົາຍັງຄັດຈ້ອນເອົາປະຊາຊົນ ໂດຍສະເພາະແມ່ຍິງແຕ່ລະບ້ານອ້ອມຂ້າງເຂົ້າມາທ່ຽວຊົມງານໂດຍບໍ່ເສຍຄ່າ ເພື່ອເປັນຂອງຂັວນໃນວັນແມ່ຍິງສາກົນ ທີ 8 ເດືອນ ມິນາ, ສະເພາະລາຄາຄ່າເຂົ້າງານເທດສະການຄັ້ງນີ້ພຽງ 25.000 ກີບ/ຕໍ່ຄົນ ແຕ່ສຳລັບເດັກນ້ອຍສູງ 120 ຊັງຕີແມັດລົງມາ, ຜູ້ທີ່ມີອາຍຸ 60 ປີຂຶ້ນໄປ, ຄູບາອາຈານ ພວກເຮົາຈະນະໂຍບາຍໃຫ້ເຂົ້າຊົມຟີ; ສ່ວນລາຄາສຳລັບບັດຄອນເສີດວັນທີ 9 ມີນາ ຈະຂາຍບັດຢູທີ 50.000 ກີບ/ຕໍ່ບັດ.
ຮູບພາບ-ຂຽນຂ່າວໂດຍ: ໃບບົວ ຈັນທະລັງສີ