ສຳນັກຂ່າວຕ່າງປະເທດລາຍງານຈາກປະເທດສະຫະລັດອາເມລິກາ ເມື່ອວັນທີ 14 ກຸມພາ 2019 ວ່າ ກະຊວງການເງິນຂອງສະຫະລັດອອກຖະແຫຼງການວ່າອັດຕາໜີ້ສາທາລະນະຂອງປະເທດນັບຕັ້ງແຕ່ປີ 1993 ຮອດ ວັນທີ 13 ກຸມພາ 2019 ນີ້ ມີໜີ້ສູງຂຶ້ນເຖິງ 22.01 ລ້ານລ້ານໂດລາ ເປັນຄັ້ງທຳອິດ ທີ່ມີອັດຕາໜີ້ສິນຫຼາຍກວ່າມູນຄ່າຜະລິດຕະພັນລວມໃນປະເທດ (ຈີດີພີ) ໝົດປີ.
ນັກວິເຄາະໄດ້ກ່າວວ່າ “ນີ້ຄືຄວາມສ່ຽງທີ່ໃຫຍ່ຫຼວງ” ຕໍ່ເສດຖະກິດຂອງສະຫະລັດເຊິ່ງມີຂະໜາດໃຫຍ່ທີ່ສຸດໃນໂລກ ແລະ ຄຸນນະພາບຊີວິດຂອງຊາວອາເມລິກາທຸກຄົນ ເນື່ອງຈາກໄດ້ມີການຄຳນວນໂດຍການສະເລ່ຍພົບວ່າໜີ້ສາທາລະນະຂອງສະຫະລັດເພີ່ມຂຶ້ນ 1.000ລ້ານໂດລາຕໍ່ມື້.
ລາຍງານດັ່່ງກ່າວໄດ້ຖືກເຜີຍອອກມາໃນຊ່ວງເວລາທີ່ຄະນະຜູ້ແທນເຈລະຈາການຄ້າຂອງສະຫະລັດ ເດີນທາງໄປຢ້ຽມຢາມນະຄອນຫຼວງປັກກິ່ງ ປະເທດຈີນ ເພື່ອພົບປະຫາລືກັບ ທ່ານ ຫຼິວ ເຮີ່ ຮອງນາຍົກລັດຖະມົນຕີ ແລະ ທີ່ປຶກສາດ້ານນະໂຍບາຍເສດຖະກິດຂອງປະທານາທິບໍດີ ສີ ຈິ້ນ ຜິງ ເປັນການປະຊຸມຕໍ່ຍອດຈາກການປະຊຸມສຸດຍອດຜູ້ນຳກຸ່ມປະເທດເສດຖະກິດຂະໜາດໃຫຍ່ “ຈີ20”.
ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: dailynews