ສຳນັກຂ່າວຕ່າງປະເທດລາຍງານວ່າ ອົງການນາຊາ (NASA) ໄດ້ເປີດເຜີຍຜົນການສຶກສາເກັບກຳຂໍ້ມູນດ້ານສິ່ງແວດລ້ອມ ໂດຍພົບວ່າປະເທດຈີນ ແລະ ປະເທດອິນເດຍ ທັງສອງປະເທດທີ່ມີປະຊາກອນຫຼາຍທີ່ສຸດໃນໂລກ ແຕ່ກາຍເປັນປະເທດທີ່ມີການເພີ່ມພື້ນທີ່ສີຂຽວໃຫ້ກັບໂລກຫຼາຍທີ່ສຸດໃນຊ່ວງໄລຍະ 20 ປີທີ່ຜ່ານມາ. ໂດຍຈີນ ແລະ ອິນເດຍມີພື້ນທີ່ 1 ໃນ 3 ຂອງປະເທດທີ່ເປັນພື້ນທີ່ປ່າສີຂຽວ.
ທັງນີ້, ກໍ່ຍ້ອນວ່າທາງລັດຖະບານຈີນໄດ້ມີໂຄງການປູກຕົ້ນໄມ້ທີ່ໄດ້ດຳເນີນການຢ່າງເຄັ່່ງຄັດມາຕະຫຼອດ ສ່ວນອິນດຽວກໍ່ຍັງມີການລົນນະລົງໃຫ້ປະຊາຊົນເຮັດກະສິກຳແບບປະສົມປະສານ.
ປະເທດຈີນສາມາດປູກປ່າເພີ່ມຂຶ້ນເຮັດໃຫ້ມີພື້ນທີ່ປ່າຫຼາຍຕິດ 1 ໃນ 4 ຂອງໂລກ ເຖິງແມ່ນວ່າພື້ນທີ່ປູກປ່າຂອງໂລກຈະສະເລ່ຍໄດ້ 6.6% ກໍ່ຕາມ ແຕ່ໃນໄລຍະ 20 ປີທີ່ຜ່ານມາ ທາງລັດຖະບານຈີນໄດ້ລິເລີ່ມເຮັດຈິງຈັງກັບການອະນຸລັກສິ່ງແວດລ້ອມ ແລະ ເພີ່ມພື້ນທີ່ປ່າຂຶ້ນເຖິງ 42% ແລະ ເຮັດການກະສິກຳແບບປະສົມປະສານເພີ່ມຂຶ້ນ 32%.
ໜຶ່ງໃນໂຄງການທີ່ປະສົບຄວາມສຳເລັດທີ່ສຸດຂອງຈີນຄືການປູກພືດໃນທະເລຊາຍຄູບີຊີ ທະເລຊາຍທີ່ໃຫຍ່ເປັນອັນດັບ 7 ຂອງໂລກ ພື້ນທີ່ 1 ໃນ 3 ຂອງທະເລຊາຍກາຍເປັນພື້ນທີ່ປ່າມີພືດຫຼາກຫຼາຍສາຍພັນ ເຊິ່ງມາຈາກຄວາມພະຍາຍາມຂອງຈີນ.
ນອກຈາກນີ້ຍັງພົບວ່າ ຈີນໄດ້ຄອບຄອງພື້ນທີ່ປ່າ 21.6% ແຕ່ໄດ້ຕັ້ງເປົ້າເປັນ 23% ພາຍໃນປີ 2020 ແລະ ຈະເພີ່ມເປັນ 26 % ກ່ອນຮອດປີ 2050 ເຮັດໃຫ້ປັດຈຸບັນປະເທດຈີນໄດ້ວາງມາດຕະການຕ່າງໆໃນການປູກປ່າ ແລະ ສ້າງພື້ນທີ່ອະນຸລັກທຳະຊາດເພີ່ມຂຶ້ນ.
ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: sanook