ຄວາມປອດໄພຕາມທ້ອງຖະໜົນເປັນບັນຫາສຳຄັນຢູ່ໃນນະຄອນຫລວງວຽງຈັນ ແລະ ຫລາຍແຂວງອື່ນໆໃນທົ່ວປະເທດ. ເມື່ອປະເທດມີການຂະຫຍາຍຕົວທາງດ້ານເສດຖະກິດ ຕາມທ້ອງຖະໜົນພາຫະນະຊະນິດຕ່າງໆກໍເພີ່ມຈຳນວນຂຶ້ນຕາມ ເມື່ອພາຫານະໃນທ້ອງຖະໜົນເພີ່ມຫລາຍຂຶ້ນ ອາດຈະໝາຍຄວາມວ່າອຸປະຕິເຫດອາດຈະຫລາຍຂຶ້ນຕາມດ້ວຍເຊັ່ນກັນ. ນອກຈາກວ່າພວກເຮົາທຸກຄົນແມ່ນໄດ້ຜ່ານການຮຽນຮູ້ລະບຽບການຂັບຂີ່, ປະຕິບັດຕາມກົດລະບຽບໃນການຂັບຂີ່ຢ່າງເຄັ່ງຄັດ ແລະ ຂັບຂີ່ພາຫານະດ້ວຍຄວາມລະມັດລະວັງ.
ໃນຂະນະທີ່ພວກເຮົາກຳລັງກ້າວເຂົ້າສູ່ຊ່ວງໄລຍະແຫ່ງການພັກຜ່ອນ ຂອງເທດສະການທີ່ສຳຄັນຕ່າງໆ, ພວກເຮົາຮູ້ດີວ່າຄົນຈຳນວນຫລວງຫລາຍຈະຕ້ອງດື່ມແອຣກໍຮໍ ໃນການສະເຫລີມສະຫລອງບຸນປີໃໝ່ລາວທີ່ກຳລັງຈະກ້າວເຂົ້າມາເຖິງ. ແຕ່ການດື່ມເຫຼົ້າແລ້ວຂັບລົດແມ່ນເປັນສິ່ງທີ່ຈະເຮັດໃຫ້ເກີດອັນຕະລາຍທີ່ສຸດ ແລະ ເປັນສິ່ງທີ່ບໍ່ຄວນເຮັດຢ່າງຍິ່ງ. ໂດຍສະເພາະແມ່ນໃນຂະນະທີ່ທຸກຄົນຫົດນໍ້າ ແລະ ສາດນໍ້າໃສ່ລົດໃຫຍ່ ແລະ ລົດຈັກທີ່ແລ່ນຜ່ານໄປມາ. ເຊິ່ງມັນຈະກາຍເປັນສູນລວມທີ່ກໍ່ໃຫ້ເກີດຫາຍະນະຕາມມາ.
ພວກເຮົາ ເວັບໄຊ້ ລາວໂພສ ໄດ້ຮວບຮວມຂໍ້ມູນອັດຕາການເກີດອຸບັດຕິເຫດ ແລະ ການເສຍຊີວິດໃນຊ່ວງບຸນປີໃໝ່ລາວ ແຕ່ປີ 2014 – 2018 ມາໃຫ້ທ່ານໄດ້ຮັບຮູ້ເພື່ອຄວາມເປັນປະໂຫຍດ ແລະ ຂໍ້ມູນທີ່ຊັດເຈນແລ້ວ ດັ່ງນີ້:
ດັ່ງຂໍ້ມູນຂ້າງເທິງພວກເຮົາເຫັນວ່າຈຳນວນຕົວເລກອຸປະຕິເຫດແມ່ນຫລຸດລົງຫລັງຈາກປີ 2015 , ແຕ່ກັບເພີ່ມຂຶ້ນອີກຄັ້ງໃນປີ 2017 ແລະ ມີແນວໂນ້ມທີ່ຈະເພີ່ມຂຶ້ນອີກຄັ້ງພາຍໃນປີ 2018 ນີ້. ນອກເສຍຈາກພວກເຮົາທຸກຄົນຈະຮ່ວມກັນເຮັດໜ້າທີ່ຂອງຕົນເອງໃຫ້ດີທີ່ສຸດນັ້ນຄືການຂັບຂີ່ຢ່າງປອດໄພ.
ໃນຊ່ວງໄລຍະການສະເຫລີມສະຫລອງບຸນປີໃໝ່ສາກົນໃນປີນີ້ ມີການບັນທຶກການເກີດອຸບັດຕິເຫດທັງໝົດຈຳນວນ 187ຄັ້ງ ໃນທົ່ວປະເທດ, ແລະ ເຮັດໃຫ້ມີຜູ້ເສຍຊີວິດທັງໝົດ 38 ຄົນ. ສັງເກດເຫັນໄດ້ວ່າຕົວເລກຜູ້ເສຍຊີວິດ ແລະ ຈຳນວນຄັ້ງຂອງການເກີດອຸບັດຕິເຫດແມ່ນຫລາຍກວ່າຊ່ວງປີໃໝ່ລາວໃນປີທີ່ຜ່ານມາ. ເຊິ່ງຖືເປັນເລື່ອງທີ່ໜ້າເປັນຫ່ວງທີ່ສຸດ ແລະ ສະເເດງໃຫ້ເຫັນວ່າແນວໂນ້ມການເກີດອຸບັດຕິເຫດແມ່ນກຳລັງເພີ່ມຂຶ້ນ.
ສະນັ້ນ, ເວັບໄຊ້ ລາວໂພສ, ຈິ່ງໄດ້ເລີ່ມຕົ້ນໂຄງການປະຊາສຳພັນກ່ຽວກັບຄວາມຮັບຮູ້ດ້ານຄວາມປອດໄພຕາມທ້ອງຖະໜົນຂອງພວກເຮົາເອງ, ເລີ່ມຕົ້ນແຕ່ ວັນປີ 15 ກຸມພາ ຫາ ວັນທີ 15 ມີນາ. ໂດຍການສົ່ງຂໍ້ຄວາມທີ່ຊັດເຈນວ່າມັນຂຶ້ນກັບທຸກຄົນວ່າຈະຕັດສິນໃຈເຂົ້າມາເປັນສ່ວນຮ່ວມຫລືບໍ່, ແນ່ນອນວ່າຖ້າຫາກພວກເຮົາຮ່ວມມືຮ່ວມໃຈກັນພວກເຮົາຈະສາມາດປ່ຽນແປງໃຫ້ເປັນໄປໃນທາງທີ່ດີຂຶ້ນ ແລະ ສາມາດຫລຸດຜ່ອນຈຳນວນອຸບັດຕິເຫດຕາມທ້ອງຖະໜົນລົງໄດ້.
ໃນຕະຫລອດໄລຍະເວລາຂອງໂຄງການປະຊາສຳພັນນີ້, ພວກເຮົາຈະເພີ່ມຈໍານວນບົດຄວາມກ່ຽວກັບຄວາມປອດໄພຕາມທ້ອງຖະໜົນໃຫ້ຫລາຍຂຶ້ນ. ໃຫ້ຂໍ້ມູນທີ່ເປັນຄວາມຮູ້ກ່ຽວກັບກົດລະບຽບຈາລະຈອນ, ແລະ ການໃຫ້ຄຳແນະນຳແກ່ຜູ້ອ່ານໃນການຫລີກເວັ້ນສາເຫດທີ່ອາດຈະເຮັດໃຫ້ເກີດອຸບັດຕິເຫດ ແລະ ເດີນທາງຕາມທ້ອງຖະໜົນໄດ້ຢ່າງປອດໄພ.
ຮຽນຮູ້ກົດຈາລະຈອນ, ປະຕິບັດຕາມກົດຈາລະຈອນ, ແລະ ຂັບຂີ່ຢ່າງປອດໄພ.
ຂຽນ ແລະ ຮຽບຮຽງໂດຍ: ແຟນຊິສ ສະຫວັນຄຳ