ສຳນັກຂ່າວເອພີ ລາຍງານຈາກປະເທດສະຫະລັດອາເມລິກາ ເມື່ອວັນທີ 8 ກຸມພາ 2019 ທີ່ຜ່ານມາວ່າ ດຣ. ເຈວອນ ຄລາກ ສັດຕະວະແພດແຫ່ງຄຣີນິກຮັກສາສັດໃນເມືອງ ຄາລິສເປລ ເປີດເຜີຍເມື່ອວັນພະຫັດວ່າ ຟລັບຟີ ແມວເພດເມຍໂຕໜຶ່ງຢູ່ໃນສະພາບໝົດສະຕິໂຕແຂງ ແລະ ມີນໍໍ້າແຂງເກາະຫຸ້ມເຕັມໂຕແຕ່ຫົວຮອດຫາງ ບໍ່ສາມາດວັດແທກອຸນຫະພູມຮ່າງກາຍໄດ້ດ້ວຍເຄື່ອງກວດວັດອຸນຫະພູມຂອງຄຣີນິກ ເຊິ່ງເຈົ້າຂອງແມວໄດ້ນຳມາສົ່ງໃຫ້ຄຣີນິກເມື່ອວັນທີ 31 ມັງກອນ 2019 ທີ່ຜ່ານມາ.
ສັດຕະວະແພດໃນຄຣີນິກໄດ້ຮີບຮ້ອນໃຫ້ການຮັກສາດ້ວຍການຫົ່ມຜ້າຫົ່ມໃຫ້ແມວເພື່ອສ້າງຄວາມອົບອຸ່ນ ແລະ ຍັງໃຫ້ຂອງເຫຼວຜ່ານທາງຫຼອດເລືອດດຳແກ່ແມວ ຟລັບຟີ ຈາກນັ້ນປະມານ 1 ຊົ່ວໂມງຕໍ່ມາ ມັນເລີ່ມສົ່ງສຽງຮ້ອງ ເຮັດໃຫ້ ດຣ. ຄລາກ ຮູ້ວ່າມັນຈະຕ້ອງລອດຊີວິດ ແລະ ຫາຍດີເປັນປົກກະຕິ.
ຫຼັງຈາກນັ້ນກໍ່ເປັນໜ້າທີ່ຂອງ ດຣ. ໄຊນ່າ ຄໍຣຳ ແລະ ເຈົ້າໜ້າທີ່ແພດໄດ້ຊ່ວຍກັນແກະນໍ້າແຂງອອກຈາກໂຕແມວ ແລະ ມັນກໍ່ເລີ່ມເຄື່ອນໄຫວໄດ້ ເຈົ້າໜ້າທີ່ຈິ່ງໄດ້ຍ້າຍໄປຫ້ອງສຸກເສີນເພື່ອເຮັດໃຫ້ຮ່າງກາຍອົບອຸ່ນຂຶ້ນປະກົດວ່າອາການຂອງມັນດີຂຶ້ນຫຼາຍຈົນສັດຕະວະແພດອະນຸຍາດໃຫ້ເຈົ້າຂອງແມວນຳຕົວມັນກັບບ້ານໄດ້.
ເຈົ້າຂອງແມວຟລັບຟີໄດ້ເລົ່າໃຫ້ຟັງວ່າເມື່ອວັນທີ 31 ມັງກອນ 2019 ລາວໄດ້ກັບມາຮອດເຮືອນ ແລະ ພົບວ່າ ແມວຟລັບຟີມີນໍ້າແຂງເກາະຫຸ້ມເຕັມຕົວຢູ່ທີ່ກອງຫິມະ ເຊື່ອວ່າມັນຄົງນັ່ງຢູ່ບ່ອນນັ້ນເປັນເວລາດົນໃນຂະນະທີ່ຫິມະຕົກໜັກ.
ຮຽບຮຽງບົດ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: dailynews